Dee mati u Gadu an ta du hogi

Saatan ta ganjan sëmbë u du hogi. Ee wan sëmbë kë dë wan mati u Gadu, nöö a musu buuse dee soni di Jehovah ta buuse (Loomë 12:9). Woo go luku wanlö u dee soni di dee mati u Gadu an ta du:

Zöndu a di së u manu ku mujëë soni. ’Ja musu tei woto sëmbë mujëë’ nasö „woto sëmbë manu” (1 Kolenti 6:9). Söseei an bunu fii kandi ku wan womi nasö ku wan mujëë bifö i tööu ku ën.​—1 Kolenti 6:18.

Bebe daan dööngö. ’Dee dööngöma . . . an o dou a di könuköndë u Gadu.’​—1 Kolenti 6:10.

Kii sëmbë ku puu bëë. „Ja musu kii sëmbë.”​—Jakobosi 2:11.

Fufuu. „Ja musu fufuu.”​—Loomë 13:9.

Lëgëdë nasö mindi soni. „Un musu kaba ku mindi soni.”​—Efeise 4:25.

Hogidu ku taku hatiboonu. ’Jehovah ta buuse hiniwan sëmbë di lo u du hogi’ (Psalöm 11:5). „Dee soni di hati fii ta manda i fii du . . . [dë sö seei tu] te i a’ taku hatiboonu.”​—Galasia 5:19, 20.

Möni pëë. ’Wa musu hulu sëmbë dee ta kai de seepi biibima, ma . . . de a’ langahati.’​—1 Kolenti 5:11.

Buuse u woto lö sëmbë nasö sëmbë di kiija a wan woto fasi. ’Un musu ta lobi dee felantima fuunu e. Un musu ta begi da dee sëmbë dee ta du hogi ku unu.’​—Mateosi 5:43, 44.

Dee soni Gadu ta taki da u, o puu u bunu. A taanga so toon u disa hogidu. Ku di heepi u Jehovah nasö di heepi u dee Kotoigi fëën, i sa kaba ku dee soni di an ta piizii Gadu hati.​—Jesaaja 48:17; Filipi 4:13; Hebelejën 10:24, 25.