Ambë da dee mati u Gadu?

Jesosi Keesitu da di Womi mii u Gadu. A dë di möön zuntu mati u Jehovah, söseei a dë di sëmbë di a möön lobi. Ufö Jesosi ko libi a goonliba kuma wan womi sëmbë, a bi ta libi kuma wan makiti jeje a Gadu Köndë (Johanisi 17:5). Baka di dë, a ko a goonliba u lei sëmbë di tuutuu lei u Gadu (Johanisi 18:37). A dëdë da dee libisëmbë dee ta haika Gadu, u puu de a zöndu ku dëdë basu (Loomë 6:23). Nöunöu, Jesosi da di Könu u Gadu Könuköndë. Di Könuköndë dë da di tii u Gadu Köndë di o tja di Paladëisi ko a goonliba.​—Akoalimbo 19:16.

Dee ëngëli dë mati u Gadu tu. Dee ëngëli an bigi libi a goonliba kuma libisëmbë. Gadu bi mbei de a Gadu Köndë ufö a mbei goonliba (Jopu 38:4-7). Milionmilion ëngëli dë a Gadu Köndë (Daniëli 7:10). Dee lö mati u Gadu aki, kë taa sëmbë ko sabi di tuutuu lei u Jehovah.​—Akoalimbo 14:6, 7.

Gadu aa mati a goonliba tu. A ta kai de kotoigi fëën. Wan kotoigi di dë a wan kuutubangi ta konda dee soni a sabi u wan sëmbë ee nasö u wan soni. Jehovah Kotoigi ta konda dee soni de sabi u Jehovah da woto sëmbë. Söseei de ta konda da sëmbë andi Jehovah o du (Jesaaja 43:10). Leti kumafa dee ëngëli ta du, söseei dee Kotoigi kë heepi i fii ko sabi di tuutuu lei u Jehovah. De kë taa i seei ko dë wan mati u Gadu tu.