Na go nama ku poipoi keiki

Saatan ku dee taku jeje fëën an kë taa i dini Gadu. De kë bia hiniwan sëmbë puu a Gadu pasi, ee de bi sa. Unfa de ta pooba u du di soni aki? Wan u dee fasi hën da poipoi keiki (2 Kolenti 11:13-15). Wan keiki an bunu ee an ta lei sëmbë di tuutuu lei u Bëibel. Poipoi keiki dë kuma falisi möni. A sa djei tuutuu möni, ma an sa heepi a na wan soni. Booko hedi tö a sa tja ko da i.

Jehovah, di Gadu u di tuutuu lei an ta piizii ku dee poipoi lei u keiki. Di Jesosi bi dë a goonliba, wanlö keikima bi kë kii ën. De bi mëni taa di fasi fa de bi ta dini Gadu bi dë di bunu wan. De bi taki taa: „Masa Gaangadu mii seei u dë. Hën nöö da u Tata.” Di soni aki bi kai ku Jesosi ö? Nönö! A piki de taa: „Di didibi seei wë da unu tata” (Johanisi 8:41, 44). A di ten aki hia sëmbë ta mëni taa de ta dini Gadu. Ma fu taki ën kumafa a dë, Saatan ku dee taku jeje fëën de ta dini e!​—1 Kolenti 10:20.

Leti kumafa wan poipoi pau ta pai poipoi njanjan, söseei poipi keiki ta mbei sëmbë ta du hogi. Soni an nango bunu a goonliba seei, biga sëmbë ta du hogi. Sëmbë ta libi fanafiti a di së u manu ku mujëë soni, sëmbë ta feti, de ta fufuu, de ta pena wotowan, de ta kii wotowan, söseei de ta kisi mujëë. Sömëni u dee sëmbë dee ta du dee soni aki nango a keiki. Ma di keiki u de an ta lei de u du bumbuu soni. Ee dee sëmbë aki kë dë mati u Gadu, nöö de musu kaba ku dee hogi de ta du.​—Mateosi 7:17, 18.

Poipoi keiki ta lei sëmbë u dini pindi. Gadu taa wa musu dini pindi. U sa fusutan faandi mbei a taki sö. I bi o feni ën bunu ee wan sëmbë an ta fan ku i nöiti, ma a ta fan ku wan footoo fii nöö u? Di sëmbë dë sa dë wan mati fii ö? Nönö, kwetikweti. Jehovah kë taa sëmbë fan ku ën, an kë taa de ta fan ku wan pobiki nasö wan peentje. Dee soni dë an ta libi.​—Ëkisodesi 20:4, 5.

Poipoi keiki ta lei taa a bunu u kii sëmbë a gaan feti. Jesosi bi taki taa dee mati u Gadu musu lobi de na de. Wa ta kii sëmbë di u lobi (Johanisi 13:35). A dë wan gaan soni da u seei u kii takuhati sëmbë. Di dee felantima u Jesosi bi ko u kisi ën, nöö an bi disa dee bakama fëën feti dëën.​—Mateosi 26:51, 52.

Poipoi keiki ta lei taa dee hogidu sëmbë o tjuma u nöömö a faja. Ma di Bëibel ta lei taa zöndu hën ta tja dëdë ko (Loomë 6:23). Jehovah da wan Gadu di aa lobi. Wan lobihati Gadu bi o tjuma sëmbë u teego a faja nö? Wë nönö! A di Paladëisi wan kodo fasi u dini Gadu nöö o dë. Hën da di fasi di Jehovah feni bunu (Akoalimbo 15:4). Na wan u dee keiki dee ta lei sëmbë dee lëgëdë soni u Saatan, o dë möön.