Unfa u sa feni di tuutuu biibi?

Ee i kë dë wan mati u Gadu, nöö i libi musu kai ku di lei di Gadu ta feni bunu. Jesosi bi taki taa di fasi fa ’dee tuutuu dinima’ bi o dini Gadu, bi o kai ku di ’tuutuu lei’ (Johanisi 4:23, 24). Wan kodo bunu fasi tö nöö dë fa u sa dini Gadu (Efeise 4:4-6). Tuutuu biibi ta tja sëmbë go a di teego libi, ma poipoi biibi ta tja sëmbë go dëdë.​—Mateosi 7:13, 14.

I sa feni di tuutuu biibi te i ta luku fini a dee sëmbë dee ta libi kumafa di tuutuu biibi ta lei. U di Jehovah dë wan bumbuu Gadu, hën mbei dee tuutuu dinima fëën musu dë bumbuu sëmbë tu. Leti kumafa wan bumbuu apeesina pau ta pai bumbuu apeesina, söseei di tuutuu biibi ta mbei bumbuu sëmbë.​—Mateosi 7:15-20.

Dee mati u Jehovah abi gaan lesipeki da di Bëibel. De sabi taa Jehovah hën da u di Bëibel. De ta mbei taa dee soni dee sikifi nëën dendu, tii di libi u de. Dee soni dë ta heepi de ku dee fuka u de, söseei de ta heepi de tu u ko sabi soni u Gadu (2 Timoteo 3:16). De ta mbei möiti u du dee soni de ta pleiki.

Dee mati u Jehovah ta söi taa de lobi de seei. Di lei Jesosi bi ta lei sëmbë soni u Gadu ku di kula di a bi ta kula suwakima, ta lei u taa a bi lobi sëmbë. Dee sëmbë dee ta libi kumafa di tuutuu biibi ta lei, lobi wotowan tu. Leti kumafa Jesosi bi ta du, söseei de an ta si sëmbë di pooti nasö woto lö sëmbë, kuma sösö sëmbë. Jesosi bi taki taa sëmbë bi o ko sabi dee tuutuu bakama fëën u di de bi o ta lobi de seei.​—Johanisi 13:35.

Dee mati u Gadu ta bigi hën në, Jehovah. Ee wan sëmbë an kë kai a i në, di sëmbë dë bi o dë i bumbuu mati ö? Nönö! Te u abi wan mati, nöö u ta kai ën nëën në, söseei u ta konda bunu soni fëën da wotowan. Hën mbei dee sëmbë dee kë dë mati u Gadu, musu kai ën nëën në, söseei de musu konda soni fëën da wotowan. Di soni dë Jehovah kë taa u musu du.​—Mateosi 6:9; Loomë 10:13, 14.

Dee mati u Gadu ta lei sëmbë soni u di Könuköndë u Gadu, leti kumafa Jesosi bi ta du. Di Könuköndë u Gadu da di tii di dë a Gadu Köndë di o mbei taa di goonliba toon wan paladëisi. Dee mati u Gadu ta konda di bunu njunsu u Gadu Könuköndë da wotowan.​—Mateosi 24:14.

Jehovah Kotoigi ta mbei möiti u dë mati u Gadu. De ta lesipeki di Bëibel, söseei de lobi de na de. De ta kai Gadu nëën në, de ta bigi Gadu në, söseei de ta lei woto sëmbë soni u Gadu Könuköndë tu. A di ten aki, Jehovah Kotoigi ta libi leti kumafa di tuutuu biibi ta lei. Sö a dë a hii di goonliba.