PISI 8

Andi di dëdë u Jesosi kë taki da i?

Jesosi dëdë sö taa u sa libi. Johanisi 3:16

Wan mujëë ta luku di kamian ka de bi bei Jesosi

Dii daka baka di Jesosi dëdë, wan tu mujëë bi go a di geebi ka de bi bei ën, ma na wan soni bi sai dë möön. Jehovah bi weki Jesosi puu a dëdë.

Jesosi ko a dee apösutu fëën, hën bakaten a toona go a Gadu köndë ala

Bakaten, Jesosi bi mbei dee apösutu fëën si ën.

Awa, Jehovah bi weki Jesosi baka faa libi kuma wan makiti jeje di an sa dëdë möön. Dee bakama u Jesosi bi si fa a bi ta hopo sii go a hemel.

Gadu weki Jesosi baka, nöö a butëën kuma Könu u di Könuköndë u Gadu. Daniëli 7:13, 14

Jesosi dë a di könubangi fëën a liba ala ta tii libisëmbë a wan paladëisi a goonliba aki

Jesosi tuwë di libi fëën u paka di lusupaima da libisëmbë (Mateosi 20:28). Di lusupaima dë, hën mbei taa Gadu sa da u di libi u teego.

Jehovah buta Jesosi kuma Könu u tii hii di goonliba. Hën ku 144.000 sëmbë di hoi deseei a Gadu, nöö di toona weki u go libi a hemel, o tii makandi. Jesosi ku dee 144.000 sëmbë o dë makandi a di bumbuu tii u Gadu di dë a hemel. Hën da di Könuköndë u Gadu.—Akoalimbo 14:1-3.

Di Könuköndë u Gadu o mbei taa di goonliba toon wan paladëisi. Feti, hogidu, pooti fasi, ku gaan hangi an o dë möön. Sëmbë o dë ku piizii seei.—Psalöm 145:16.