WOTO 21

Andi da Bëtëli?

Tu Jehovah Kotoigi ta wooko a Bëtëli, a di kamian ka de ta seeka peentje ku footoo u dee buku fuu — Kamian u seeka peentje ku footoo u dee buku, Amëëkanköndë

Wan Jehovah Kotoigi ta wooko a di Bëtëli fu Alumanköndë a di kamian ka de ta doloki buku — Alumanköndë

Wan Jehovah Kotoigi ta wooko a di Bëtëli u Keinia a di kamian ka de ta wasi koosulai — Keinia

Baaa di ta wooko a di njanjan wosu a di Bëtëli u Kolombia — Kolombia

Di Hebelejën wöutu Bëtëli kë taki „Wosu u Gadu” (Kenesesi 28:17, 19). Di në aki fiti dee wosu dee Jehovah kotoigi abi a hii goonliba, u di naandë de dë ta tii di peleikiwooko, söseei de dë kuma wan ahala da di peleikiwooko. Di Tii Kulupu ta wooko a di hedikantoo di dë na Amëëkanköndë a di foto New York, nöö naandë de ta dë ta tii di wooko di ta du a dee bëikantoo a sömëni köndë. Dee sëmbë dee ta wooko kuma wan kulupu a dee kamian dë, da sëmbë di wotowan sabi kuma sëmbë u di Bëtëli famii. De ta libi kuma wan famii a wan kamian, de ta wooko makandi, de ta njan makandi söseei de ta lei soni u Bëibel makandi tu.—Psalöm 133:1.

Wan apaiti kamian ka sëmbë di ta libi kuma famii dë kabakaba u da deseei u wooko. A hii dee Bëtëli i abi womi ku mujëë di dë bakama u Keesitu, nöö de da deseei u du di kë u Gadu, söseei u du di wooko u di Könuköndë wanwan a de libi (Mateosi 6:33). Na wan u de ta kisi möni u dee wooko di de ta du, ma hii de tuu abi wan kamian u tan, söseei hii de tuu ta feni soni u njan. Ma de ta kisi wan piki möni u bai dee soni de abi fanöudu. Hiniwan sëmbë abi wan wooko u du, ee a kantoo, a boiwosu nasö a njanjanwosu. Wotowan ta wooko ka de ta doloki buku nasö ka de ta mbei buku, wotowan ta seeka kamba, wotowan ta wasi koosu, wotowan ta seeka soni u de an booko nasö de ta du woto soni.

Wan kamian ka sëmbë ta wooko taanga u heepi du di Könuköndë peleikiwooko. Di möön gaan maaka di hii Bëtëli wosu kë dou, hën da u mbei möiti u feni gaan hia sëmbë di de sa feni u ko sabi dee tuutuu lei u Bëibel. Di buku aki ta lei i taa sö a dë tuutuu. Di Tii Kulupu hën mbei taa di buku aki sikifi, hën de mandëën ku computer go da höndöhöndö kulupu sëmbë di ta puu buku ko a woto töngö a hii goonliba. Baka di dë, de bi doloki ën a masini di ta doloki buku hesihesi di dë a so u dee Bëtëli ka de ta doloki buku, hën de mandëën ku boto go a möön leki 110.000 kemeente. Hii dee wooko di dee Bëtëli famii ta du, ta heepi u u du di möön fanöudu wooko, di wooko u paaja di bunu buka.—Maikusi 13:10.

Ambë ta wooko a Bëtëli, nöö unfa de ta sölugu de?
Un gaan wooko hii dee Bëtëli ta heepi u du?