PISI 2

Wan paati ku unuseei

„Dee sëmbë gadu tja ko makandi sö kaa, nöö na wan sëmbë abi leti u paati de.”—Maikusi 10:9

Jehovah kë taa u musu lobi „leti libi” (Mika 6:8). Te i toou kaa, a dë möön fanöudu seei u libi leti, biga teka sëmbë ta ganjan de seei futoou an sa sai dë. Söseei a dë fanöudu u ta futoou unuseei sö taa di lobi fuunu sa göö ko möön taanga.

A di ten aki, möönmöön sëmbë ta ganjan de seei a di toou libi. Ee i kë taa soni musu waka bunu a di toou libi fii, nöö i musu dë kabakaba u du tu soni.

1 BUTA DI TOOU LIBI FII A DI FOSU KAMIAN

DI BËIBEL TA TAKI TAA: „Woon ko sabi unfa u wegi soni te un kaba luku ee undi da di möön bunu wan fuun tei” (Filipi 1:10). Di toou libi fii da wan u dee möön fanöudu soni a di libi fii. Fëën mbei a musu dë wan u dee fosu soni di i musu ta buta mëni nëën.

Jehovah kë taa i musu buta pakisei a di sëmbë di i ku ën toou, söseei a kë taa un musu ta ’piizii makandi a di libi’ (Peleikima 9:9). Jehovah ta lei u gbelingbelin taa ja musu ta sösö di mujëë fii nasö di manu fii ta butëën a wan së, ma a kë taa un musu ta suku fasi fuun ta piizii makandi (1 Kolenti 10:24). Mbei i mujëë nasö i manu fii taa i abi ën fanöudu, söseei taa i lobi ën.

Wan womi ta tja wan kindikindi te go da di mujëë fëën; wan womi kumutu a wooko ko a wosu, nöö a ta si hën mujëë ta boi soni

SONI DI I SA DU:

Buta ten a wan së fii ku i mujëë nasö fii ku i manu sa dë makandi, sö taa un sa buta pakisei a unuseei
Te i toou, ja musu ta pakisei da „wan” sëmbë nöö, ma i musu pakisei da „tu” sëmbë

Wan womi ku ën mujëë sindo ta njan makandi a döö

2 TJUBI I HATI

DI BËIBEL TA TAKI TAA: „Ma nöö mi taa di sëmbë di ta luku wan mujëë kuma a kë tei ën, nöö nëën hati a tei ën kaa e” (Mateosi 5:28). Ee hii juu wan sëmbë ta pakisei fanafiti soni a di së u womi ku mujëë, nöö a dë kuma sö wan sëmbë an ta hoi ënseei a di buka di a mbei ku di sëmbë di ën ku ën toou.

Jehovah taki taa a dë fanöudu u „tjubi i hati” (Nöngö 4:23; Jelemia 17:9). Fii sa tjubi i hati, ja musu ta luku soni di an fiti (Mateosi 5:29, 30). Djeesi di womi de kai Jöpu, di bi dë wan hedima u wosudendu di bi mbei wan buka ku ën wojo u na ta luku na wan woto mujëë a wan pei fasi kuma a kë tei ën (Jöpu 31:1). Nöiti ja musu kë luku di soni de ta kai porno. Söseei ja musu lobi wan woto sëmbë tjubitjubi a i hati, di na dë i mujëë nasö i manu.

Wan womi buta di footoo fëën ku hën mujëë nëën tafa liba a wookope

SONI DI I SA DU:

Mbei woto sëmbë si gbelingbelin taa i mujëë nasö i manu wanwan nöö i lobi
Hoi dee fii u di mujëë nasö di manu fii a pakisei. Ee i si taa di hulu di i ku wan sëmbë ta hulu, ta mbei i mujëë nasö i manu ta fii wan fasi, nöö i musu tapa ku ën wantewante