Mbei Gadu heepi i fii sa abi wan piizii toou libi

Jehovaha Gadu hën toou di fosu womi ku di fosu mujëë. Di Bëibel ta konda da u taa Gadu bi mbei di fosu mujëë hën a „tjëën go da di womi”. Adam bi wai tee a taa: „Disi da bonu u mi bonu ku sinkii u mi sinkii” (Kenesesi 2:22, 23). Te kuma tide Jehovah kë taa sëmbë di toou musu ta dë waiwai.

Te i toou, kandë i sa pakisei taa hii soni o ta waka bunu. Ma i musu hoi a pakisei taa womi ku mujëë di lobi de seei taanga seei o ta abi bookohedi so juu (1 Kolenti 7:28). A di buku aki, joo feni mama wëti di sa heepi i. Ee i fiti de a di libi fii, joo sa abi wan piizii toou libi ku wan piizii wosudendu libi.​—Psalöm 19:8-11.

1 TEI DI FAANTIWÖUTU DI JEHOVAH DA I

DI BËIBEL TA TAKI TAA: Di womi da di hedima u di wosudendu.​—Efeise 5:23.

Ee i da wan womi di toou, nöö Jehovah kë taa i musu libi ku di mujëë fii a wan lobihati fasi (1 Petuisi 3:7). Gadu mbei di mujëë fii u heepi i, nöö a kë taa i musu libi ku ën a wan lespeki fasi ku lobi (Kenesesi 2:18). I musu lobi di mujëë fii sö tee taa i dë kabakaba u du dee soni dee a lobi ufö i du dee soni dee i lobi.​—Efeise 5:25-29.

Ee i da wan mujëë di toou, nöö Jehovah kë taa i musu lesipeki i manu ku hii i hati, söseei a kë taa i musu heepi ën tja dee faantiwöutu fëën tu (1 Kolenti 11:3; Efeise 5:33). Heepi i manu a dee soni dee a buta taa a o du, söseei wooko makandi ku ën ku hii i hati (Kolosën 3:18). Te i du sö, nöö Jehovah ku i manu o wai ku i seei.​—1 Petuisi 3:1-6.

SONI DI I SA DU:

• Hakisi i mujëë nasö i manu andi i sa du u libi möön bunu ku ën. Haika bunu, söseei du andi i sa du u soni go möön bunu a di toou libi fii

• Hoi pasensi. A o tei ten fii ko sabi andi i ku i mujëë nasö andi i ku i manu musu ta du fuun sa ta dë waiwai

2 HOI A PAKISEI UNFA I MUJËË NASÖ I MANU TA FII

DI BËIBEL TAKI TAA: I musu suku u ko sabi andi i mujëë nasö i manu lobi (Filipi 2:3, 4). Libi ku ën kuma wan gaan dii soni di i abi, nöö hoi a pakisei taa Jehovah kë u dee dinima fëën musu libi a wan „saapi fasi ku hii sëmbë” (2 Timoteo 2:24). „Te sëmbë ta taki soni söndö u pakisei, nöö a dë kuma tjökö de ta tjökö wotowan ku wan feti ufangi, ma dee soni köni sëmbë ta taki, ta kula wotowan”. Hën mbei a dë fanöudu u taki soni a wan köni fasi (Nöngö 12:18). Di santa jeje u Jehovah sa heepi i u fan a wan sutifasi, söseei a wan lobihati fasi.​—Galasia 5:22, 23; Kolosën 4:6.

SONI DI I SA DU:

• Begi fii sa hoi iseei, söseei fii sa dë kabakaba u haika te i mujëë nasö i manu abi wan fanöudu soni u taki da i

• Mëni andi joo taki, söseei mëni fa joo taki ën

3 UN MUSU ABI DI WAN PAKISEI

DI BËIBEL TA TAKI TAA: Te un toou, nöö un ta ko dë „wan sinkii” (Mateosi 19:5). Ma tökuseei un dë tu apaiti sëmbë jeti, söseei a sa dë sö taa wan ta si soni a di wan seei fasi. Fëën mbei un musu lei u ta kai a wan te a nama ku dee soni un ta pakisei nasö ku di fasi fa un ta fii (Filipi 2:2). A dë fanöudu taa un musu ta kai a wan te a nama ku dee soni dee un kë du. Di Bëibel taki taa: „Lai u wotowan o mbei soni waka bunu da i” (Nöngö 20:18). Un mbei dee mama wëti u Bëibel tii unu te un kë du wan fanöudu soni makandi.​—Nöngö 8:32, 33.

SONI DI I SA DU:

• Konda da i mujëë nasö i manu unfa i ta fii tu, na dee soni dee i sabi nasö di fasi fa i ta pakisei nöö i musu ta konda dëën

• Taki ku i mujëë nasö ku i manu bifö i mbei buka u go du wan soni