WOTO 6

Be sëmbë si gbelingbelin faandi mbei i lesi di tëkisi

Johanisi 10:33-36

DI SONI DI I MUSU DU: Na lesi wan tëkisi söndö fii puu ën da dee haikama. Be dee haikama si gbelingbelin unfa di tëkisi di i lesi nama ku di woto di i ta konda.

FA I MUSU DU ËN:

Buta pakisei a dee möön fanöudu pisi. Te i kaba lesi wan tëkisi, nöö buta pakisei a dee möön fanöudu pisi di nama ku di woto di i ta konda. I sa du di soni aki te joo toona lesi dee pisi dë baka, nasö i sa buta wan hakisi di o heepi dee haikama u si andi da dee möön fanöudu pisi u di tëkisi di i lesi.

Ee joo taki dee soni dee sikifi a di tëkisi ku i eigi wöutu, nöö dee haikama musu sa si jeti unfa dee soni dee i ta taki nama ku dee soni dee sikifi a di tëkisi.
Be dee haikama fusutan di fanöudu soni di i kë lei de. Ee i piki dee haikama faandi mbei joo lesi wan tëkisi, nöö te i kaba lesi ën, nöö i musu lei de unfa di tëkisi nama ku di soni di i piki de.

Di Bëibel fii musu dë jabijabi te i ta konda soni u di tëkisi. Di soni aki o heepi dee haikama u disa di Bëibel u de jabijabi tu, nöö de o si taa dee soni dee i ta taki sikifi a di tëkisi di i lesi da de.
Lei dee haikama unfa de sa du di soni di sikifi a di tëkisi. Na taki u dee pisi u di tëkisi di an nama ku di woto di i ta konda. Te i ta hoi a pakisei andi dee haikama sabi kaa u di woto, nöö di dë o heepi i fii ko sabi un hia soni i musu taki u heepi de u fusutan di woto.