WOTO 14

Heepi sëmbë u de ko fusutan dee möön fanöudu soni

Hebelejën 8:1

DI SONI DI I MUSU DU: Heepi dee haikama u de fusutan di taki fii. Be de si unfa hii dee fanöudu pisi u di taki fii nama ku di soni di i kë lei de, söseei ku di në u di taki fii.

FA I MUSU DU ËN:

Sabi un maaka i kë dou ku di taki fii. I musu luku ee di taki fii da u mbei sëmbë ko sabi wan soni, u mbei de dë seiki u wan woto, nasö u da de taanga u du wan soni. Sölugu taa hii dee fanöudu pisi u di taki fii heepi i fii dou di maaka dë.

Hakisi iseei di soni aki: ’Un soni dee haikama bi sa hakisi deseei u di woto aki, nasö andi bi sa taanga da de u fusutan u di woto?’ Te i piki wan hakisi kaa, nöö pakisei un woto soni de bi o sa hakisi u di woto dë. Baka di dë, seeka di taki fii a sö wan fasi taa a ta piki dee hakisi di dee haikama abi, nöö du ën a sö wan fasi taa an taanga da de u fusutan, söseei u de biibi di soni di i ta lei de.
Be a dë gbelingbelin u jei fuun soni di taki fii nango. A hii di taki fii dee haikama musu sa fusutan fuun soni i ta taki. Fii sa du di soni aki, nöö ta kai so u dee wöutu u di në u di taki fii hiniwan juu baka.
Be dee möön fanöudu soni ko gbelingbelin a fesi, nöö de an musu taanga u fusutan. Taki finifini u dee möön fanöudu soni di nama ku di në u di taki fii, nöö du ën a di juu di sikifi. Di taki fii an musu abi hia hedipakisei poi. Be dee haikama fusutan dee fanöudu pisi gbelingbelin, wakiti piki sö ufö i bigi taki u wan woto hedipakisei, nöö be dee haikama fusutan taa joo bigi taki u wan woto hedipakisei.

I sa kai dee möön fanöudu pisi u di taki fii te joo bigi hoi di taki, sö taa dee haikama sa sabi fuun soni joo taki nasö i sa kai de a kaba u di taki fii, u dee haikama sa toona mëni de baka.