WOTO 11
Andi o heepi i fii ko lo’ u lesi di Bëibel?
A bi pasa wan daka taa i bi kë du wan soni hën i ko si taa di soni dë taanga da i fii du ö? Wë fu an bi taanga da i sö möön, hën i bi bigi ta du ën pikipiki. Wë di wan seei soni nöö i sa du ee i kë lesi di Bëibel. Kandë i ta hakisi iseei taa: ’Na un pisi mi o bigi?’ A di woto aki woo luku wantu soni di i sa du di o heepi i fii sa lesi di Bëibel, söseei fii sa lei soni nëën.
1. Faandi mbei u musu ta lesi di Bëibel hiniwan daka?
Di sëmbë di ta lesi di Bëibel nasö „di wëti u Jehovah” hiniwan daka o ta dë waiwai, nöö soni o ta waka bunu dëën. (Lesi Psalöm 1:1-3.) Te joo bigi, nöö i sa ta lesi di Bëibel wantu miniti nöö hiniwan daka. Möön i ta ko guwenti di Wöutu u Gadu, möönmöön a o ta suti da i u lesi.
2. Andi o heepi i fii sa fusutan dee soni dee i ta lesi a di Bëibel?
Fuu sa fusutan dee soni dee u ta lesi a di Bëibel, nöö u musu ta tapa u lesi kölö sö u kai pakisei a dee soni dee u ta lesi. Na lesi nöö u musu ta lesi di Bëibel, ma u musu ta „pakisei fundu” u dee soni dee u ta lesi tu (Josua 1:8). Te i ta lesi, nöö hakisi iseei dee soni aki: ’Andi di soni aki ta lei mi u Jehovah Gadu? Unfa mi sa du di soni aki a mi libi? Unfa mi sa heepi woto sëmbë ku dee soni dee mi lei aki?’
3. Andi u musu du fuu sa feni ten u ta lesi di Bëibel?
A ta taanga da i fii feni ten u lesi di Bëibel ö? A ta taanga da gaansë fuu. Mbei möiti „u wooko ku di ten fii a wan bunu fasi” (Efeise 5:16). I sa du di soni aki te i buta wan apaiti juu ka joo ta lesi di Bëibel hiniwan daka. So sëmbë ta lesi di Bëibel a fuuku mamate. Woto sëmbë ta lesi ën a wan woto ten, kandë te de o go njan. Wotowan ta lesi ën ufö de go duumi. Andi da di möön bunu ten da i fii lesi di Bëibel?
WOTO SONI DI I SA LEI
Woo luku andi i sa du faa ta dë wan piizii soni da i u ta lesi di Bëibel. Söseei woo luku unfa i musu ta seeka iseei a fesi fii sa ta fusutan dee soni dee joo ta lei a di Bëibel.
Leti kumafa u sa lei u ko lobi tookatooka soni u njan, sö nöö u sa lei u ko lo’ u lesi di Bëibel
4. Lei u ko lo’ u lesi di Bëibel
A sa taanga u bigi lesi di Bëibel. Ma u sa „ko abi di hangi” u du’ ën, leti kuma te wan sëmbë ta lei lobi wan njunjun soni u njan. Lesi 1 Petuisi 2:2, noo taki u di hakisi aki:
I si kuma ee i ta lesi di Bëibel hiniwan daka a o ko dë wan soni di joo lo’ u ta du ö?
Pëë di fëlön fii sa si unfa so sëmbë bi bigi ko lo’ u lesi di Bëibel. Baka di dë, nöö piki dee hakisi aki.
Un bookohedi dee njönkuwan a di fëlön bi abi?
Andi bi heepi de u de hoi deseei a di maaka di de bi buta u ta lesi di Bëibel?
Andi de bi du u de bi ko lo’ u ta lesi di Bëibel?
Soni di sa heepi i fii bigi lesi di Bëibel:
Suku wan bunu Bëibel di an taanga u fusutan, söseei di an taanga u lesi. I sa lesi di Nyun-Grontapuvertaling Bëibel ee a dë a di töngö fii.
Bigi lesi wan pisi di i möön lobi. Fii sa si dee tookatooka woto, nöö go a di pisi „Lesi di Bëibel hiniwan daka.”
Maaka di pisi di i lesi kaa. Wooko ku di pisi „Skeima u lesi di Bëibel” di dë a di buku aki.
Wooko ku di JW Library® app. Ku di app aki i sa lesi nasö i sa haika di Bëibel a sömëni tookatooka töngö. I sa wooko ku di app aluwasi ka i dë, ee i abi wan tëlëfön nasö wan woto soni.
Wooko ku di brochure Studeri Gadu Wortu moro fini. A abi kaita, peentje, ku woto soni di o heepi i fii fusutan dee soni dee joo lesi a di Bëibel möön bunu.
5. Seeka a fesi te de o ko lei i soni u Bëibel
Lesi Psalöm 119:34, nöö piki dee hakisi aki:
Faandi mbei a bunu u begi ufö i lesi di Bëibel nasö ufö i bigi seeka da di lei di wan sëmbë o ko lei i soni u Bëibel?
Andi i sa du fii sa ta fusutan hii dee soni dee joo ta lei a wan woto? Te joo seeka wan woto, nöö pooba u du dee soni aki:
Lesi dee palaklafu dee dë a bigi u di woto.
Suku dee Bëibel tëkisi, nöö lesi de, söseei pooba u fusutan unfa de nama ku di woto.
Maaka dee möön fanöudu wöutu nasö dee möön fanöudu pisi ka di piki dë. Di soni aki o heepi i te i ku di sëmbë di ta lei i soni u Bëibel o luku di woto.
I bi sabi di soni aki ö?
Dee Jehovah Kotoigi bi wooko ku tookatooka Bëibel. Ma u möön lobi di Bijbel—Nyun-Grontapuvertaling u di a puu soifi, nöö a dë gbelingbelin u fusutan, söseei di në u Gadu sikifi nëën.—Luku di woto aki a di website fuu „Yehovah Kotoigi abi den eigi Bijbel?”
SO SËMBË TA TAKI TAA: „Di Bëibel taanga poi u fusutan. Ma abi ten fëën.”
Andi ii pakisei?
ANDI I LEI?
Fii sa fusutan dee soni bunu dee joo ta lesi a di Bëibel, nöö i musu buta wan ten di joo ta lesi ën, i musu ta begi Jehovah faa heepi i, söseei i musu ta seeka a fesi te wan sëmbë o ko lei i soni u Bëibel.
Andi i bi o piki?
Andi o heepi i fii fusutan dee soni dee joo ta lesi a di Bëibel?
Un ten möön bunu da i u lesi di Bëibel, söseei u lei soni nëën?
Faandi mbei a bunu fii seeka iseei a fesi te wan sëmbë o ko lei lei soni u Bëibel?
WOTO SONI DI I SA LUKU
Di Hei Wakitimawosu aki ta taki u wantu soni di o heepi i fii ko lo’ u lesi di Bëibel.
„Fa yu kan kisi moro prisiri te yu e leisi Bijbel?” (A Waktitoren Nö. 1 2017)
Di woto aki ta taki u dii fasi fa i sa lesi di Bëibel.
„Fa Bijbel kan yepi mi?—Pisi 1: Kon sabi den moi sani fu yu Bijbel” (Woto a di website fuu)
Di woto aki o lei i andi i sa du fii ko lo’ u lesi di Bëibel.
„Fa Bijbel kan yepi mi?—Pisi 2: Meki Bijbel leisi tron wan span sani gi yu” (Woto a di website fuu)
A di fëlön aki joo si andi ta heepi wantu sëmbë di ta lesi di Bëibel sömëni jaa longi kaa.