„Un musu ta du andi di Wöutu ta taki”

1-2. Andi ta mbei dee dinima u Gadu ta dë waiwai? (Jakobosi 1:22-25)

JEHOVAH ku di lobi Womi Mii fëën kë fuu ta dë waiwai. Di sëmbë di sikifi Psalöm 119:2 bi taki taa: „Dee sëmbë dee ta du dee soni dee a bi mëni de u de du, o dë waiwai. Awa, dee ta suku ën ku hii de hati.” Jesosi seei bi taki taa: „Dee sëmbë dee ta jei di Wöutu u Masa Gadu ta piki hën buka, de ta dë waiwai!”​—Luk. 11:28.

² U dee dinima u Jehovah da sëmbë di ta dë waiwai. Faandi mbei u ta dë waiwai? Wë sömëni soni dë di ta mbei. Ma wan u dee möön gaan soni di ta mbei u ta dë waiwai, hën da u di u ta lesi di Wöutu u Gadu, ta mbei möiti u libi ku dee soni dee a ta taki.​—Lesi Jakobosi 1:22-25.

3. Un wini u ta feni te u ta du andi di Wöutu u Gadu ta taki?

³ U ta feni wini a sömëni fasi, te u ko dë sëmbë di ta „du andi di Wöutu ta taki”. Te u ta du andi di Wöutu u Gadu ta taki, nöö u ta dë waiwai, u di u sabi taa di soni dë ta kai ku Jehovah (Peleik. 12:13). Boiti di dë, te u ta du andi di Wöutu u Gadu ta taki, nöö u ku dee sëmbë fuu wosudendu, ku dee sëmbë u di kemeente ta ko dë möön gaan mati. A kan taa iseei si taa sö di soni aki dë tuu. Wan woto soni, hën da wa ta abi sömëni u dee bookohedi di dee sëmbë dee an ta haika Jehovah ta abi. U piki ku di soni di Könu Dafiti bi taki. Di a bi ta kanda, hën a bi taki soni u dee wëti Jehovah, ku di fasi fa a ta kuutu soni. Baka di dë, hën a bi taki taa: „Te wan sëmbë hoi hënseei a de, nöö a o feni gaan bunu seei.”​—Ps. 19:7-11.

4. Faandi mbei a sa ta taanga so juu fuu du andi di Wöutu u Gadu ta taki?

⁴ Na hii juu a ta dë wan kösökösö soni u du andi di Wöutu u Gadu ta taki. Hii fa u ta abi sömëni soni u du, tökuseei u musu ta mbei möiti fuu ta lesi di Bëibel, ta öndösuku soni nëën, sö taa u sa ko fusutan andi Jehovah kë fuu du. Boo taki u wantu soni di sa heepi u fuu sa ta lesi di Bëibel hiniwan daka. Woo luku tu andi sa heepi u fuu ta kai pakisei a dee soni dee u ta lesi, söseei fuu ta libi ku de.

BUTA WAN TEN FII SA TA LESI DI WÖUTU U GADU

5. Andi da so u dee soni dee u musu ta du, dee ta tei gaansë u di ten fuu?

⁵ Gaansë u dee sëmbë u Jehovah ta abi sömëni soni u du. U ta tei sömëni ten ta du dee soni di di Bëibel ta taki taa dë fanöudu. Sömëni fuu ta wooko fuu sa sölugu useei, ku dee sëmbë fuu wosudendu (1 Tim. 5:8). Sömëni Keesitu sëmbë ta luku dee sëmbë u de dee ko gaandi, nasö dee dë ku suwaki. Boiti di dë, hiniwan fuu musu ta buta mëni a di gözöntu fuu, nöö di soni dë ta tei ten. Ma na di dë nöö. U ta abi soni di u musu ta du a di kemeente tu. Wan u dee fanöudu soni di u musu ta du, hën da u musu ta peleiki fajafaja. Wë te i luku hii dee soni dee i musu ta du, nöö a sa taanga da i tuutuu fii feni ten, fii ta lesi di Bëibel hii daka, fii ta kai pakisei nëën, söseei fii ta du dee soni dee a ta taki.

6. Unfa i sa seti soni fii sa ta lesi di Bëibel? (Luku di peentje tu.)

⁶ Di lesi di u musu ta lesi di Bëibel, da wan u „dee möön fanöudu soni” di u dee Keesitu sëmbë musu ta du. Fëën mbei u musu seti soni fuu sa ta du ën (Fil. 1:10). Di fosu kapitë u di buku Psalöm ta taki soni u wan womi di ta dë waiwai. A ta taki taa: „A lobi di wëti u Jehovah, nöö ndeti ku didia a ta lesi di wëti fëën sapisapi” (Ps. 1:1, 2). Di soni dë ta lei gbelingbelin taa u musu buta wan ten fuu sa ta lesi di Bëibel. Ma un ten da di möön bunu ten u lesi di Bëibel? Wë di soni dë ta tooka a sëmbë ku sëmbë. Di möön fanöudu soni, hën da i musu buta taa joo ta lesi ën a wan ten, ka joo sa ta feni pasi ta lesi ën hiniwan daka. Wan baaa de kai Victor, bi taki taa: „Mi lo’ u lesi di Bëibel a mamate. Ma lo’ u hopo fuuku, ma tökuseei mi ta mbei möiti ta lesi ën a mamate, u di soni an ta dë hia sö u puu mi pakisei. Mi ta fusutan soni bumbuu a di ten dë, söseei mi sa ta buta hii mi pakisei a soni.” Sö soni dë da i tu ö? Hakisi iseei taa: ’Un ten möön bunu da mi u mi ta lesi di Bëibel?’

BUTA PAKISEI A DEE SONI DEE I TA LESI

7-8. Andi sa mbei taa wa feni wini te dou, u dee soni dee u ta lesi? Konda wan woto.

⁷ A sa kan taa u ta lesi te a hia soni söndö fuu da de pasi u de saka go sindo a u hati. A pasa kaa taa i bi lesi wan soni, hën kölö sö baka di dë, ja bi sa mëni andi i bi lesi möön u? Wë di soni dë pasa ku hiniwan fuu kaa. A tjali taa sö wan soni sa pasa ku u tu te u ta lesi di Bëibel. Kandë u buta taa woo ta lesi sömëni kapitë u di Bëibel hiniwan daka. Di soni dë da wan bunu soni seei. U musu buta andi ku andi u kë du, nöö u mbei möiti fuu du de (1 Kol. 9:26). Ma te u ta lesi di Bëibel kaa, nöö a bunu fuu sabi taa di soni dë wanwan an tjika. U musu du möön soni, fuu sa feni wini te u ta lesi di Wöutu u Gadu.

⁸ Pakisei di soni aki: Dee soni dee ta nasi abi wata fanöudu u de sa dë a libi. Ma ee tjuba kai hia wan pasi poi, nöö di goon o hoi wata. Te di soni dë pasa, nöö an bi o bunu ee di goon toona feni möön hia wata. Te tjuba kai, nöö di goon ta abi ten fanöudu faa sa hai di wata tei, u dee soni dee ta nasi sa feni wini fëën. Wë sö nöö useei musu ta köni fu wa ta biinga lesi di Bëibel hesihesi. Ee nasö dee soni an o sa feni pasi saka go a u hati fuu sa mëni de bakaten, söseei fuu sa libi ku de.​—Jak. 1:24.

9. Andi u musu du ee u ko si taa u abi di guwenti u biinga lesi di Bëibel?

⁹ I ko si taa so juu i ta biinga ta lesi di Bëibel ö? Andi i musu du? Na lesi hesihesi. Mbei möiti fii ta kai pakisei a dee soni dee i ta lesi nasö a dee soni dee i bi lesi. Di soni aki aan fu dë wan taanga soni. I sa mbei möiti fii ta lei soni u Bëibel pikisö möön longi, sö taa i sa feni pasi fii ta kai pakisei a dee soni dee i ta lesi. Boiti di dë, i sa buta taa ja o ta lesi hia vers, sö taa i sa feni ten fii ta kai pakisei a dee soni dee i lesi. Baaa Victor, di u bi taki soni fëën a fesi, bi taki taa: „Ma ta lesi hia kapitë te mi ta lesi di Bëibel. Wan kapitë nöö mi ta lesi. U di mi ta lesi di Bëibel a mamate, mbei mi sa ta kai pakisei a dee soni dee mi bi lesi, a di daka dendu.” Iseei sa luku un hia joo lesi, ma a dë fanöudu fu ja ta lesi hesi poi, sö taa i sa kai pakisei a dee soni dee i lesi.​—Ps. 119:97; luku di pisi „Soni di i sa hakisi iseei”.

10. Konda unfa i sa du dee soni dee i ta lei (1 Tesalonika 5:17, 18).

¹⁰ Aluwasi na un ten i ta lesi di Bëibel, nasö aluwasi un hia i ta lesi, tökuseei i musu ta suku fasi fii du dee soni dee i ta lesi. Te i ta lesi wan pisi u di Wöutu u Gadu, nöö i musu ta hakisi iseei taa: ’Unfa mi sa du di soni di mi lesi aki nöunöu aki, nasö wan woto daka?’ Boo taa i lesi 1 Tesalonika 5:17, 18. (Lesi ën.) Baka te i lesi dee tu vers dë, nöö i sa tapa dë ufö, nöö i kai pakisei a di fasi fa i ta begi, söseei a di un mëni pasi di i ta begi. Söseei i sa kai pakisei a dee soni dee i ta tei u bigi. Kandë i buta taa joo da Jehovah tangi u dii soni di a du da i. Aluwasi ee wantu miniti nöö i ta tei u buta pakisei a dee soni dee i ta lei, tökuseei a o heepi i fii sa ko dë wan sëmbë di ta haika di Wöutu u Gadu, söseei di ta du andi a ta taki. Pakisei fa joo feni wini tjika ee i ta du di soni aki hiniwan daka, te i ta lesi wan pisi u Bëibel. Awa, joo ko dë wan sëmbë di ta möön du andi di Wöutu u Gadu ta taki. Ma nöö andi i musu du ee i ko si taa sömëni soni dë jeti di i musu mbei möiti fii ta du?

BUTA SONI DA ISEEI DI JOO SA DU

11. Faandi mbei i sa fii bookosaka so juu? Konda wan woto.

¹¹ Te i ta lesi di Bëibel, nöö i sa fii bookosaka so juu te i ko si taa sömëni soni dë di i musu ko ta du möön bunu. Pakisei di soni aki: Boo taa i lesi wan pisi u Bëibel di ta taki taa wa musu lobi wan sëmbë möön di wotowan (Jak. 2:1-8). I ko si taa i sa du soni a wan möön bunu fasi, hën i buta taa joo mbei di möiti dë. Di soni dë bunu tee! Di debooko fëën, hën i lesi wan woto pisi di ta lei taa a dë fanöudu fii ta köni ku dee soni dee i ta taki (Jak. 3:1-12). I ko si taa so juu i ta taki soni di an ta wotowan taanga, hën i buta taa joo mbei möiti fii ko ta möön taki soni di o ta da wotowan taanga. Di woto amanjan fëën, hën i toona lesi wan pisi di ta taki taa wa musu ko dë sëmbë di lobi di goonliba aki (Jak. 4:4-12). I ko si taa i musu ko ta möön köni ku dee soni dee i ta du u mbei piizii. Ma a sa pasa taa a di debooko fëën, i ko ta fii taa a taanga poi fii du hii dee soni dee i lei dë.

12. Faandi mbei ja musu lasi hati ee di lesi di i ta lesi di Bëibel, ta heepi i fii ko si taa i musu tooka so soni a i libi? (Luku di pisi di ta taki u woto fanöudu soni tu.)

¹² Ee sömëni soni dë di i musu tooka, nasö di i musu ko ta du möön bunu, nöö na lasi hati. Di si di i ta si taa i musu du di soni dë, ta lei taa i abi sakafasi, söseei taa i ta si soni a wan bunu fasi. Wan sëmbë di abi sakafasi, söseei di an ta ganjan hënseei a soni, ta lesi di Wöutu u Gadu faa sa si andi a sa ko ta du möön bunu.a Hoi a pakisei tu taa u musu ta mbei möiti go dou fuu sa „ko dë njunjun sëmbë di abi njunjun fasi” (Kol. 3:10). Andi o heepi i fu ja ko wei u dë wan sëmbë di ta du andi di Wöutu u Gadu ta taki?

13. Andi da wan bunu fasi fa i sa du dee soni dee i lei? (Luku di peentje tu.)

¹³ Ka fii ta suku u du hii dee soni dee i ta lesi tuu wan pasi, nöö i sa buta taa joo du wan, nasö tu u de (Nöng. 11:2). I sa pooba u du di soni aki: Sikifi dee soni dee i musu tooka buta a wan pampia. Baka di dë, nöö tei wan nasö tu di i sa bigi wooko a de, nöö i disa dee wotowan da bakaten. Ma ku undi i musu bigi?

14. Un maaka i sa buta taa joo mbei möiti u dou fosu?

¹⁴ I sa buta taa joo bigi mbei möiti fii dou di maaka di an o taanga da i sö fii dou. Nasö i sa wooko a wan soni di i sabi taa dë fanöudu seei fii go a fesi nëën. Te i sabi kaa un maaka joo mbei möiti fii dou, nöö i sa öndösuku soni a dee buku fuu. Kandë i sa wooko ku di Index van Wachttoren-publicaties, nasö di Ondrosuku Bijbel moro fini​—Gi Yehovah Kotoigi. Begi Jehovah faa heepi i fii dou di maaka fii. Begi ën be a da i di fii ku di kaakiti fii du soni di ta kai ku ën (Fil. 2:13). Baka di dë, nöö i mbei möiti u du di soni di i lei. Te i dou di fosu maaka di i buta taa i bi kë dou, nöö di soni dë o sa da i taanga fii mbei möiti u dou dee woto maaka fii tu. Fuu taki ën, nöö te i mbei möiti u te i ko abi wan fasi di Keesitu sëmbë musu abi, nöö a kan taa an o taanga da i sö möön fii ta mbei möiti go dou.

BE DI WÖUTU U GADU ’WOOKO A I HATI’

15. Faandi mbei dee sëmbë u Jehovah tooka ku sömëni u dee sëmbë dee ta lesi di Bëibel? (1 Tesalonika 2:13)

¹⁵ So sëmbë ta taki taa de lesi di Bëibel sömëni pasi kaa. Ma a dë sö taa de ta biibi dee soni dee dë a di Bëibel tuutuu ö? De ta mbei möiti u libi ku dee soni di di Bëibel ta taki ö? Wë a tjali taa gaansë pasi soni an ta dë sö. Ma dee sëmbë u Jehovah ta si di Bëibel woto fasi. U ta tei di Bëibel „leti kuma a Gadu a kumutu, na a libisëmbë. Nöö Gadu Buka a dë tuu”. Boiti di dë, u ta mbei möiti u libi ku dee soni dee a ta taki.​—Lesi 1 Tesalonika 2:13.

16. Andi sa heepi u fuu ko dë sëmbë di ta du andi di Wöutu u Gadu ta taki?

¹⁶ Na hii juu a ta dë wan kösökösö soni da u fuu ta lesi di Wöutu u Gadu, söseei fuu ta du andi a ta taki. A sa ta taanga da u fuu ta feni ten fuu lesi ën. Nasö kandë u ta kë biinga lesi ën hesihesi söndö fuu kai pakisei a dee soni dee u ta lesi. Nasö u sa ta fii bookosaka te u pakisei hii dee soni dee u musu tooka a u libi. Wë aluwasi un pei soni ta taanga da i fii du, tökuseei i sa dë seiki taa joo sa du ën, u di Jehovah sa heepi i fii du ën. Boo mbei hii möiti fuu tei di heepi di Jehovah ta da u, sö taa wa ko dë sëmbë di ta haika di Wöutu fëën nöö a kaba, ma fuu sa ko dë sëmbë di ta du andi di Wöutu fëën ta taki tu. U sa dë seiki taa möön u ta lesi di Wöutu u Gadu ta du andi a ta taki, möön woo ta dë waiwai.​—Jak. 1:25.