WOTO 30
Dee sëmbë fuu dee dëdë o ko a libi baka!
Te wan sëmbë fuu dëdë, nöö u ta tjali gaanfa seei. Fëën mbei di Bëibel ta kai dëdë wan felantima (1 Kolenti 15:26). A woto 27, i bi lei taa Jehovah o puu di felantima aki a pasi. Ma andi o pasa ku dee sëmbë dee dëdë kaa? A di woto aki, joo lei wan woto gaan bunu soni di Jehovah paamusi u taa a o du. A paamusi u taa a o weki milionmilion sëmbë ko a libi baka, nöö de o libi u teego. Di soni dë sa pasa tuutuu ö? A o weki de ko a libi baka u libi a Gadu Köndë u, naa a goonliba aki?
1. Andi Jehovah kë du da dee sëmbë fuu dee dëdë?
Jehovah ta hangi seei u weki dee sëmbë dee dëdë ko a libi baka. Wan womi di de ta kai Jöpu, di bi abi biibi a Gadu, bi dë seiki taa Gadu an bi o fëëkëtë u weki ën ko a libi baka te a bi o dëdë. A bi piki Gadu taa: „Joo kai mi, nöö mi o piki i [kumutu a Geebi].”—Lesi Jöpu 14:13-15.
2. Unfa u du sabi taa dee sëmbë dee dëdë o weki ko a libi baka?
Di Jesosi bi dë a goonliba, nöö Gadu bi dëën di makiti faa bi ta weki dee sëmbë dee bi dëdë ko a libi baka. Jesosi bi weki wan mujëë mii u 12 jaa di bi dëdë ko a libi baka, söseei a bi weki di womi mii u wan mujëë di manu fëën bi dëdë kaa ko a libi baka (Maikusi 5:41, 42; Lukasi 7:12-15). Bakaten, hën wan mati u Jesosi de kai Lazalosi bi ko dëdë. Hii fa Lazalosi bi dëdë fö daka kaa te de bei, tökuseei Jesosi bi weki ën ko a libi baka. Baka di Jesosi bi begi Gadu, hën a bai kai Lazalosi taa: „Lazalosi, ko a döö!” Hën „di womi di bi dëdë ko a döö” libilibi! (Johanisi 11:43, 44) Dee famii u Lazalosi ku dee mati fëën bi musu u ta wai seei!
3. Andi o pasa ku dee sëmbë fii dee dëdë?
Di Bëibel ta paamusi u taa: „Te sëmbë dëdë de o toona weki baka” (Tjabukama 24:15). Dee sëmbë dee bi dëdë, dee Jesosi bi weki ko a libi baka, an bi go libi a Gadu Köndë (Johanisi 3:13). De bi wai taa de bi weki ko a libi baka a goonliba aki. Sö nöö Jesosi o weki milionmilion sëmbë ko a libi baka u de libi waiwai a di Paladëisi a goonliba aki u teego. A bi taki taa „dee sëmbë dee dë a geebi”, te kisi dee sëmbë dee uu fëëkëtë, ma di dë a Gadu pakisei, o weki ko a libi baka.—Johanisi 5:28, 29.
WOTO SONI DI I SA LEI
Woo si a di Bëibel faandi mbei u sa dë seiki taa Jesosi abi di makiti u weki sëmbë di dëdë ko a libi baka, söseei taa a o du ën. Böiti di dë, woo luku unfa di weki di sëmbë o weki ko a libi baka sa da i taanga ku kötöhati.
4. Jesosi bi lei taa a sa weki sëmbë di dëdë ko a libi baka
Boo luku andi Jesosi bi du di hën mati Lazalosi bi dëdë. Lesi Johanisi 11:14, 38-44, nöö piki dee hakisi aki:
Unfa u du sabi taa Lazalosi bi dëdë tuutuu?—Luku vers 39.
Ee Lazalosi bi go a Gadu Köndë, nöö i si kuma Jesosi bi o weki ën ko a libi baka faa ko libi a goonliba aki ö?
5. Gaan hia sëmbë o ko a libi baka!
Lesi Psalöm 37:29, nöö piki di hakisi aki:
Naasë dee milionmilion sëmbë dee o ko a libi baka o libi?
Jesosi o weki gaan hia sëmbë ko a libi baka. Na dee sëmbë dee bi ta dini Jehovah wanwan nöö. Lesi Tjabukama 24:15, nöö piki di hakisi aki:
Ambë i bi o kë si ko a libi baka?
Pakisei di soni aki: Leti kumafa an taanga da wan tata faa weki wan mii fëën di ta duumi fundu, sö nöö an o taanga da Jesosi faa weki dee sëmbë dee dëdë ko a libi baka.
6. Di weki di Jesosi o weki sëmbë ko a libi baka sa da i taanga ku kötöhati
Di woto u di mujëë mii u Jailusi di sikifi a Bëibel, bi da sömëni sëmbë di bi ta tjali u di wan sëmbë u de lasi libi, taanga ku kötöhati. Lesi di woto aki di pasa tuutuu a Lukasi 8:40-42, 49-56.
Ufö Jesosi bi weki di mujëë mii u Jailusi ko a libi, hën a bi piki Jailusi taa: „Na fëëë, biibi nöö i musu abi.” (Luku vers 50.) Unfa di weki di sëmbë o weki ko a libi baka ta heepi i . . .
te wan sëmbë fii lasi libi?
te wan soni miti i di sa mbei i lasi i libi?
Pëë di FËLÖN, nöö piki di hakisi aki.
Unfa di weki di sëmbë o weki ko a libi baka bi da Phelicity mama ku hën tata taanga ku kötöhati?
SO SËMBË TA TAKI TAA: „A taanga da mi u biibi taa sëmbë di dëdë o weki ko a libi baka.”
Unfa ii pakisei?
Un Bëibel tëkisi i sa lesi da wan sëmbë u lei ën taa dee sëmbë dee dëdë o weki ko a libi baka tuutuu?
ANDI I LEI?
Di Bëibel ta paamusi u taa milionmilion sëmbë di dëdë o weki ko a libi baka. Jehovah kë u de ko a libi baka, nöö a da Jesosi di makiti faa weki de ko a libi baka.
Andi i bi o piki?
Unfa u du sabi taa Jehovah ku Jesosi kë weki dee sëmbë dee dëde ko a libi baka?
Naasë milionmilion u dee sëmbë dee o weki ko a libi baka o libi? A Gadu Köndë, naa a goonliba aki? Faandi mbei i taki sö?
Andi ta mbei i dë seiki taa dee sëmbë fii dee dëdë o ko a libi baka?
WOTO SONI DI I SA LUKU
Lesi di woto aki fii si andi da wantu soni di i sa du te i ta tjali u di wan sëmbë fii lasi libi.
„Yepi gi den sma di lasi wan lobiwan” (Ontwaakt! Nö. 3 2018)
Dee mama wëti u Bëibel sa heepi wan sëmbë tuutuu te a ta tjali u di wan sëmbë fëën dëdë u?
Andi sa heepi wan mii te wan sëmbë fëën lasi libi?
Hii sëmbë o weki ko a libi baka u go libi a Gadu Köndë u? Ambë ku ambë an o weki ko a libi baka?