Dee dëdë sëmbë sa toona libi baka u?

Wan sëmbë di dëdë sa toona libi baka u?

ANDI DI BËIBEL TA TAKI: „Wan juu o dou, nöö hii dëdë sëmbë tuu o jei mi [Jesosi] di Mii u Gadu aki ta kai de.  . . nöö de tuu o weki kumutu a geebi toona ko ku libi baka.”​—Johanisi 5:28, 29.

Jesosi bi taki taa te di Könuköndë o tii a di ten di ta ko, nöö na wan sëmbë o dë a Geebi möön. Fernando, di u bi taki soni fëën a di woto ufö disi, bi taki taa: „Mi bi foondo seei di fosu pasi di mi lesi Johanisi 5:28, 29. Di tëkisi aki da m’ kötöhati seei, nöö a heepi mi u na fëëë möön da di ten di ta ko.”

Na awooten di limbohati womi de kai Jöpu bi ta biibi taa Gadu bi o toona weki ën baka, te a dëdë. Jöpu bi taki taa: „Ee wan sëmbë dëdë, a sa toona libi baka u?” Hën a piki gbelin taa: „Mi o ta wakiti ta koti hii dee sitaafu daka u mi u te mi feni heepi. Joo kai mi, nöö mi o piki i.”​—Jöpu 14:14, 15.

Di sisa u Lazalosi de kai Maita bi sabi taa Gadu bi o weki dëdë sëmbë ko a libi baka. Baka di Lazalosi dëdë, hën Jesosi bi piki ën taa: „Di baaa fii o toona weki baka.” Hën Maita piki ën taa: „Mi sabi taa a di kaba lasiti daka teee hii sëmbë o toona weki nöö hënseei o weki tu.” Hën Jesosi toona piki ën taa: „Mujëë o, miseei wë disi kaa e, di ta weki sëmbë a dëdë ta da de libi. Nöö di sëmbë di ta biibi a mi, ee . . . [a] dëdë seei ma nëën da kaba u di libi fëën eti e [a sa toona ko a libi baka, NW]” (Johanisi 11:23-25). Baka di dë, hën Jesosi weki Lazalosi wantewante tja ko a libi baka! Di woto aki ta lei u dee möön gaan soni dee o pasa a di ten di ta ko. Pakisei fa a o dë te Gadu o weki sëmbë a hii së u goonliba, ko a libi baka!

Gadu o weki so sëmbë puu a dëdë u go libi a Gadu Köndë u?

ANDI DI BËIBEL TA TAKI: Di Wöutu u Gadu ta lei u taa di weki di Gadu weki Jesosi ko a libi baka tooka u dee aiti woto sëmbë di a bi weki. Dee aiti sëmbë dë bi ko libi a goonliba baka. Ma u ta lesi u di weki di Gadu bi weki Jesosi taa: „Jesosi Keesitu . . . subi go tee a liba ala e, nöö awa a dë a di kaba heima kamian a letimaun së u Gadu” (1 Petuisi 3:21, 22). Jesosi wanwan nöö Gadu bi o weki puu a dëdë u go libi a liba ala u? Jesosi bi piki dee apösutu fëën a fesi taa: „Mi o go ala go seeka kamian da unu te mi kaba, nöö mi o toona ko tei unu, be mi ku unu dë makandi ala.”​—Johanisi 14:3.

Keesitu go a Gadu Köndë, nöö a seeka kamian da so u dee bakama fëën u te de o ko. Dee sëmbë dee Gadu o weki u go libi nëën köndë ala o dë 144.000 sëmbë (Akoalimbo 14:1, 3). Ma andi dee bakama u Jesosi aki o go du a Gadu Köndë ala?

De o abi hia soni u du seei! Gadu Buku ta piki u taa: „Fa dee fosu sëmbë weki dë, nöö de dë apaiti sëmbë u Gadu, nöö de dë bunu. Biga di u tu dëdë an o kisi de möönsö. Nöö fa de sai naandë, de o abi di mindima wooko ta tja sëmbë go a Gadu ku Masa Jesosi di Keesitu, nöö de ku ën o ta tii di tii makandi di wan dusu jaa longi dë” (Akoalimbo 20:6). Dee sëmbë dee Gadu o weki u go libi nëën köndë ala, o dë mindima ku könu di o tii di goonliba makandi ku Keesitu.

Ambë Gadu o weki möön?

ANDI DI BËIBEL TA TAKI: Di Bëibel ta taki u wan soni di apösutu Paulosu bi taki a wan taki di a bi hoi. A bi taa: „Mi ta biibi tu taa tee sëmbë dëdë de o toona weki baka, dee bi libi bunu a Masa Gadu wojo ku dee an bi libi bunu tuu.”​—Tjabukama 24:15.

Ambë da dee sëmbë „dee bi libi bunu a Masa Gadu wojo” kumafa Paulosu bi taki? Luku wan woto aki. Ufö di limbohati womi de kai Daniëli dëdë, wan ëngëli bi piki ën taa: „Joo go böö, ma joo hopo baka fii feni di paka fii a di kaba u dee lasiti daka” (Daniëli 12:13). Wë naasë Gadu o weki Daniëli faa go libi? „Dee sëmbë dee ta libi a wan leti fasi, de o feni di goonliba, nöö naandë de o ta libi u teego” (Psalöm 37:29). Nöö Jesosi bi taki a fesi tu taa: „Un dë bunu e, dee sëmbë, ee un abi saka fasi. Biga a bakaten di goonliba aki o ko fuunu nöömö” (Mateosi 5:5). Gadu o weki Daniëli ku sömëni woto womi ku mujëë tuu, di bi hoi deseei nëën. A o weki de u de sa ko libi a goonliba baka, nöö de o sa libi u teego.

Ambë da dee sëmbë „dee an bi libi bunu” a Gadu wojo, kumafa Paulosu bi taki? De da dee milionmilion sëmbë dee dëdë, dee an bi feni pasi u ko fusutan di tuutuu lei u Bëibel, söseei u du dee soni dee a ta lei sëmbë. Te dee sëmbë dë o ko a libi baka, de o sa ko sabi Jehovaha ku Jesosi, nöö de o sa lobi de tu (Johanisi 17:3). Hii dee sëmbë dee o buta taa de o dini Gadu o libi longi kumafa Jehovah seei ta libi, hën da u teego.

Unfa di libi o dë a goonliba?

ANDI DI BËIBEL TA TAKI: Gadu „o feki hiniwan u de wojowata puu. Këë an o ta kisi de möön. Dëdë ku tjali ku kusumi an o dë a de dendu möön tu. Söseei sinkii hati an o dë möön seei, kwetikweti” (Akoalimbo 21:4). „De o mbei wosu, nöö deseei o ta libi a de. De o paandi doloifi djai, nöö de o ta njan dee fuuta u de.”​—Jesaaja 65:21.

Pakisei fa di libi o dë te joo dë makandi ku dee lobiwan fii dee bi dëdë! Ma kandë i ta hakisi iseei jeti ee unfa i sa dë seiki taa dee dëdë sëmbë o toona weki baka?