Unfa Keesitu sëmbë musu si daan?

Sëmbë a hii së u goonliba abi tookatooka pakisei te a nama ku daan. So sëmbë ta bebe daan te de dë makandi ku dee mati u de. Woto sëmbë ta taki taa de an o bebe daan seepiseepi. Woto sëmbë ta bebe u te de dööngö. Andi di Bëibel ta taki u daan?

1. A dë wan föutu soni u bebe soni di dë ku daan a dendu ö?

Di Bëibel an ta taki taa wa musu bebe daan. Te di Bëibel ta taki u dee sömëni bunu soni dee Gadu da u, nöö a ta taki tu taa „win ta mbei di hati ta piizii” (Psalöm 104:14, 15). So u dee womi ku mujëë di bi ta dini Gadu, di në u de sikifi a di Bëibel, bi ta bebe soni di dë ku daan a dendu.​—1 Timoteo 5:23.

2. Andi di Bëibel ta piki dee sëmbë dee ta bebe daan?

Jehovah ta kuutu di bebe di sëmbë ta bebe hia pasa maaka, ku di bebe di sëmbë ta bebe dööngö (Galasia 5:21). Di Wöutu fëën ta taki taa: „Na ko dë wan u dee sëmbë dee ta bebe win pasa maaka” (Nöngö 23:20). Fëën mbei ee u taki taa woo bebe daan, aluwasi u dë u wanwan, tökuseei wa musu bebe hia poi te nöö wa ta fusutan useei möön. Ee u bi o bebe hia poi, nöö di soni dë sa mbei u taki soni nasö du soni di an bunu. Söseei a sa mbei u ko siki tu. Ee wa sa duwengi useei fu wa bebe pasa maaka, nöö wa musu bebe seepiseepi.

3. Unfa u sa lei taa u ta lesipeki wotowan di taki taa de o bebe daan nasö di taki taa de an o bebe daan?

Hii sëmbë musu taki dëën seei ee a o bebe daan nasö ee an o bebe daan. Wa musu kuutu wan sëmbë di taki taa a o bebe daan nasö soni di abi daan a dendu. Söseei wa musu duwengi wan sëmbë di taki taa an o bebe daan (Loomë 14:10). Ma ee u si taa di bebe di woo bebe o toobi wotowan, nöö wa o bebe. (Lesi Loomë 14:21.) Wa ta du soni di „bunu da useei nöö a kaba, ma u ta mëni andi bunu da wotowan tu”.​—Lesi 1 Kolenti 10:23, 24.

WOTO SONI DI I SA LEI

4. U musu taki da useei ee woo bebe daan nasö ee wa o bebe daan

Unfa Jesosi bi ta si di bebe di sëmbë ta bebe daan? Fii sa feni di piki, nöö boo luku di fosu foombo wooko di Jesosi bi du. Lesi Johanisi 2:1-11, nöö piki dee hakisi aki:

• Te i luku di foombo wooko di Jesosi bi du aki, nöö unfa Jesosi ta si daan, söseei unfa a ta si dee sëmbë dee ta bebe daan?

• Wë ee Jesosi an bi ta kuutu di bebe di sëmbë ta bebe daan, nöö unfa Keesitu sëmbë musu ta si wan woto sëmbë di ta bebe daan?

Ma hii fa wan Keesitu sëmbë sa bebe daan, tökuseei an bi o dë wan köni soni faa ta du ën hii juu. Lesi Nöngö 22:3, nöö pakisei luku ee a bi o dë wan köni soni u bebe daan a dee lö okasi aki:

• Te joo lëi wagi, nasö te joo wooko ku wan masini.

• Te i dë ku bëë.

• Te wan data piki i taa ja musu bebe daan.

• Te ja sa duwengi iseei u na bebe daan pasa maaka.

• Te di wëti u di köndë ta taki taa ja musu bebe daan.

• Te i dë makandi ku wan sëmbë di puu taa an o bebe daan u di a bi dë wan taanga soni dëën u disa daan.

I sa paati daan da sëmbë a wan tööu piizii nasö a wan woto piizii ö? Ee i kë sabi andi i musu du, nöö pëë di FËLÖN.

FËLÖN: Mi musu paati daan da sëmbë u? (2:41)

Lesi Loomë 13:13 ku 1 Kolenti 10:31, 32. Baka te i lesi hiniwan u dee tëkisi, nöö piki di hakisi aki:

• Unfa di mama wëti aki sa heepi i fii du soni di Jehovah ta feni bunu?

5. I musu luku un hia joo bebe

Ee joo bebe soni di dë ku daan a dendu, nöö hoi di soni aki a pakisei: Hii fa Jehovah an ta kuutu di bebe di wan sëmbë ta bebe daan, ma a ta kuutu di bebe di wan sëmbë ta bebe daan pasa maaka. Faandi mbei? Lesi Hosea 4:11, 18, nöö piki di hakisi aki:

• Andi sa pasa te wan sëmbë ta bebe daan pasa maaka?

Andi sa heepi u fu wa bebe daan pasa maaka? Wë u musu sabi un hia daan u sa bebe. Lesi Nöngö 11:2, nöö piki di hakisi aki:

• Faandi mbei a dë wan bunu soni fii taki a fesi un hia daan joo bebe?

6. Andi sa heepi wan sëmbë faa tapa ku di bebe di a ta bebe daan pasa maaka?

FËLÖN: ’Mi bi ko wei u di fasi fa mi bi ta libi’ (6:32)

• Unfa Dmitry bi ta du soni te a bi bebe daan pasa maaka?

• A bi sa tapa wantewante ku di bebe di a bi ta bebe daan pasa maaka u?

• Andi bi heepi ën faa bi sa tapa ku di bebe di a bi ta bebe daan pasa maaka?

Lesi 1 Kolenti 6:10, 11, nöö piki dee hakisi aki:

• Faandi mbei a dë wan gaan hogi soni te wan sëmbë bebe dööngö?

• Andi ta lei taa wan sëmbë di bi ta bebe daan pasa maaka sa tooka?

Lesi Mateosi 5:30, nöö piki di hakisi aki:

• Di Jesosi bi taki taa u musu koti u maun tuwë, nöö a bi kë taki taa u musu mbei möiti fuu disa soni di an bunu, nöö u du soni di ta kai ku Jehovah. Andi i sa du ee a ta taanga da i fii disa di bebe di i ta bebe daan pasa maaka?a

Lesi 1 Kolenti 15:33, nöö piki di hakisi aki:

• Andi sa pasa ee i abi mati di ta bebe daan pasa maaka?

ANDI I LEI?

Jehovah da u daan fuu sa ta piizii, ma a ta kuutu di bebe di sëmbë ta bebe daan pasa maaka, söseei di bebe di sëmbë ta bebe dööngö.

Andi i bi o piki?

• Andi di Bëibel ta taki u daan?

• Andi da dee hogi dee sa miti wan sëmbë di ta bebe daan pasa maaka?

• Unfa u sa lei taa u ta lesipeki wan sëmbë di taki taa a o bebe daan nasö an o bebe daan?

WOTO SONI DI I SA LUKU

Luku di fëlön aki fii si andi sa heepi dee njönkuwan u de taki ee de o bebe daan nasö ee de an o bebe daan

Pakisei bunu ufö i bebe (2:31)

Lesi di woto aki fii si andi sa heepi i fu ja bëbë daan pasa maaka möön.

„No meki sopi tron yu basi” (A Waktitoren, 1 u jailiba 2010)

Lesi di woto aki fii si ee Keesitu sëmbë sa naki gaasi te de ta bebe wan soni

„Aksi fu leisiman” (A Waktitoren, 15 u bakajailiba 2007)

A di woto „Mi ben de wan sopi bari di noiti no e furu”, joo si unfa wan womi di bi ta bebe daan pasa maaka bi tapa ku di guwenti dë.

„Bijbel e kenki sma libi” (A Waktitoren, 1 u sebitaa-liba 2012)