Ko ta si daan kumafa Gadu ta si ën

AN DË u taki taa i ta wai ku hii dee peipei kado dee Jehovah da i, möönmöön di mbei di a mbei i fii sa ta taki da iseei andi i kë du ku dee kado dë. Di Bëibel seei ta taki taa win da wan kado di Jehovah da u. A ta taki tu taa: „Bëëë ta mbei wookoma lafu, nöö win ta mbei sëmbë piizii ku di libi” (Peleik. 10:19; Ps. 104:15). Ma a musu u dë sö taa i ko si taa so sëmbë ta dë ku sömëni fuka, u di de ta bebe daan. Boiti di dë, sëmbë u hii së u goonliba abi tookatooka fasi fa de ta si di bebe di sëmbë ta bebe daan. Wë nöö andi sa heepi wan Keesitu sëmbë faa ko ta si daan a wan fasi di fiti?

Aluwasi naasë u ta libi, nasö aluwasi unfa u kiija, u musu mbei möiti fuu ko ta si daan kumafa Jehovah ta si ën, söseei dee soni dee u ta buta taa woo du musu ta kai ku ën. Dee soni dë o mbei u ta dë waiwai.

Kumafa iseei ta si, nöö sömëni sëmbë ta lo’ u bebe daan, söseei de ta lo’ u bebe ën pasa maaka. A kan taa so sëmbë ta bebe ën, u di a ta mbei de ta fii bunu. Wotowan ta bebe ën, u di de an kë pakisei dee bookohedi u de möön. A so kamian, so sëmbë ta si dee sëmbë dee ta bebe hia kuma tuutuu womi nëngë, nasö kuma sëmbë di taanga.

Ma dee Keesitu sëmbë ta feni köni lai a di lobihati Gadu u de. A ta mbei u ko sabi dee hogi dee sa miti u te u ta bebe daan pasa maaka. Kandë i bi lesi Nöngö 23:29-35, di ta taki u dee peipei soni di wan dööngöma ta du, söseei dee peipei fuka dee sa miti ën.a Wan baaa de kai Daniel, di dë gaanwomi a Europa, ta mëni jeti unfa libi fëën bi dë ufö a ko sabi Jehovah, söseei ufö a bigi du dee soni dee a bi ta lei. Daniel bi taki taa: „Mi bi ta bebe daan pasa maaka, nöö di soni dë mbei ma bi ta du soni ku köni. Sömëni hogi soni bi miti mi, nöö hati u mi ta boonu jeti te mi ta pakisei dee soni dë.”

Unfa u sa du soni a wan köni fasi te a nama ku daan, söseei unfa u sa koti pasi da dee fuka dee wan sëmbë ta ko abi te a ta bebe pasa maaka? Di soni di o heepi u, da te u ta mbei möiti fuu ko ta si daan kumafa Gadu ta si ën, söseei te u ta wooko ku ën kumafa Gadu kë.

Boo luku andi di Bëibel ta taki u daan, söseei faandi mbei so sëmbë ta bebe ën.

ANDI BËIBEL TA TAKI U DI BEBE DI SËMBË TA BEBE DAAN?

Di Wöutu u Gadu an ta puu u fu wa bebe daan. Fuu taki ën, nöö a ta piki u taa a dë wan piizii soni u bebe win. A ta taki taa: „Njan di njanjan fii ku wai, nöö bebe di win fii ku wan waiwai hati” (Peleik. 9:7). A bi pasa taa Jesosi seei bi bebe win, söseei sömëni woto dinima u Jehovah di bi abi wan taanga biibi seei bi ta bebe win tu.​—Mat. 26:27-29; Luk. 7:34; 1 Tim. 5:23.

Hii fa di Wöutu u Gadu an ta puu sëmbë u de bebe daan, tökuseei a ta lei u taa a dë wan hogi soni te sëmbë ta bebe dööngö. A ta konda da u gbelingbelin taa: „Wa musu bebe win dööngö e” (Ef. 5:18). Boiti di dë, a ta taki taa „dee dööngöma, . . . an o feni di Könuköndë u Gadu” (1 Kol. 6:10). Awa, Jehovah ta si di bebe di sëmbë ta bebe pasa maaka, ku di bebe di de ta bebe dööngö kuma wan gaan hogi soni. Ka fuu ta du soni kuma dee sëmbë u di pisiwata ka u ta libi, nöö a bi o bunu seei fuu ko ta si daan kumafa Jehovah ta si ën.

So sëmbë ta si kuma de sa bebe daan gaanfa seei söndö u de dööngö. Ma di soni dë an bunu seepiseepi. Di Wöutu u Gadu ta piki u gbelingbelin taa „wa musu ta lo’ u bebe win hia poi”, u di a sa mbei wan womi (nasö wan mujëë) mbei gaan föutu, nasö du gaan zöndu di sa mbei hën ku Jehovah poi (Tit. 2:3; Nöng. 20:1). Boiti di dë, Jesosi seei bi taki taa ee wan sëmbë ta „bebe poi”, nöö di soni dë sa tapëën faa go a di njunjun goonliba (Luk. 21:34-36). Andi sa heepi wan Keesitu sëmbë faa koti pasi da dee fuka dee sëmbë ta ko abi te de ta bebe poi?

PAKISEI LUKU UN TEN, KU UN HIA DAAN I MUSU TA BEBE, SÖSEEI FAANDI MBEI I TA BEBËËN

Te joo luku ee joo bebe daan, nöö ja musu ta luku fa dee sëmbë u di pisiwata fii ta du soni nöö a kaba. Wan Keesitu sëmbë ta du soni ku köni te a nama ku soni u njan nasö ku soni u bebe, u di a kë u Jehovah wai ku ën. Di Bëibel ta piki u taa: „Ee woon njan wan soni, ee woon bebe wan soni, nasö hiniwan soni woon du kaa, nöö i musu du ën fu Masa Gadu musu feni gafa a i” (1 Kol. 10:31). Luku wantu mama wëti, ku wantu soni di i sa hakisi iseei.

Mi ta bebe daan u di mi kë u wotowan ko lobi mi ö? Ëkisodesi 23:2 ta taki taa: „Na waka a dee gaan hia sëmbë baka.” A di tëkisi aki Jehovah bi ta bai dee Isaëli sëmbë u de an waka a wanlö sëmbë baka, u di de an ta du dee soni dee a lobi. Sö soni dë da u a di ten aki tu. Ee u ta disa wotowan u de poi di fasi fa u ta si soni te a nama ku daan, nasö di fasi fa u musu ta wooko ku ën, nöö a sa pasa taa pikipiki woo ko ta buta dee wëti u Jehovah a wan së, söseei a sa pasa taa u ku Jehovah ko poi.​—Lom. 12:2.

Mi ta bebe u sëmbë si fa mi taanga tjika u? Sëmbë lo’ u bebe a so köndë, söseei de lo’ u bebe hia tu, ma de an ta si dee fasi u bebe dë kuma soni di an bunu (1 Pet. 4:3). Luku andi 1 Kolenti 16:13 ta da u taanga fuu du. A ta taki taa: „Un ta dë setiseti hiniwan juu fu soni an puu unu a pasi. Un musu dë gingin a di biibi un ta biibi Masa dë. Söseei un musu abi degihati ku taihati.” Wë i si kuma daan sa heepi wan sëmbë faa ko taanga u? Na seei! Daan sa mbei wan sëmbë an du soni ku limbolimbo fusutan, söseei a sa mbei wan sëmbë an du soni a wan köni fasi. Wë, u ta fusutan taa di fia di sëmbë ta fia bebe daan an ta lei taa wan sëmbë taanga. Ma a ta lei taa a ta du wan don soni. Di buku Jesaaja 28:7 ta lei taa dee sëmbë dee ta lasi pasi u daan hedi, dë kuma sëmbë di ta waka vandavanda ta lontu, söseei di an ta saandi u du möönsö te de musu hopo du wan soni.

Jehovah nöö da di sëmbë di sa da u di taanga di u abi fanöudu fuu sa du soni a wan leti fasi. Fuu sa feni di taanga dë, nöö u musu ’ta dë setiseti hiniwan juu fu soni an puu u a pasi. Söseei u musu dë gingin a di biibi u ta biibi Masa aki’ (Ps. 18:32). U sa du sö te u ta du soni ku köni u hogi an miti u, söseei te u ta köni fu wa du soni di sa mbei u ku Jehovah poi. Jesosi bi lei taa a bi taanga di a bi dë a goonliba aki, nöö sömëni sëmbë bi ta lei taa de ta lesipeki ën, u di a bi abi degihati, söseei a bi ta dë kabakaba u du soni di ta kai ku Gadu.

Mi ta bebe daan u ma booko mi hedi ku dee fuka u mi möön u? Jehovah bi mbei wan psalöm sikifima sikifi taa: „Di dee soni mi bi ta pakisei, bi ko möön hebi da mi, nöö ju [Jehovah] hën bi da mi kötöhati, sö taa mi bi sa ta dë waiwai baka” (Ps. 94:19). Ee i abi bookohedi, nöö go suku heepi a Jehovah, na go suku heepi a daan. Wan fasi fa i sa du di soni aki, da te i ta begi Jehovah möön gaanfa. Sömëni sëmbë ta taki tu taa a ta heepi, te i suku lai a wan mati fii u di kemeente di taanga a di biibi. Di bebe di sëmbë ta bebe daan u fëëkëtë dee fuka u de, da wan soni di ta mbei de an ta dë kabakaba möön u du soni a wan leti fasi (Ho 4:11). Di baaa de kai Daniel di u bi taki soni fëën a fesi, bi taki taa: „Mi bi ta booko mi hedi gaanfa seei ku soni, söseei mi bi ta fii kuma mi na bumbuu sëmbë. Mi bi ta bebe dööngö u ma ta booko mi hedi gaanfa sö möön, ma di soni dë bi ta mbei taa soni ta möön taanga da mi, söseei mi bi ko lasi sömëni u dee mati u mi. Boiti di dë, mi bi ko ta si kuma ma dë wan hojo soni.” Andi bi heepi Daniel te u kaba fëën? Wë a taki taa: „Mi bi ko fusutan taa mi bi abi Jehovah fanöudu, na daan fanöudu mi bi abi. Di mi suku heepi a Jehovah, hën mi ko sabi unfa mi sa finga futu da dee fuka u mi, söseei mi bi ko seeka de.” Hii juu Jehovah ta dë kabakaba u heepi u, aluwasi ee u ta si kuma saanfa-u-du fuu kaba.​—Fp 4:6, 7; 1 Pe 5:7.

Ee a ta pasa taa i ta bebe so juu, nöö a bi o bunu fii öndösuku iseei ku dee hakisi aki: ’Wan mati u mi, nasö wan sëmbë u mi wosudendu ta booko hën hedi ku di fasi fa mi ta bebe daan u?’ Ee sö a dë, nöö a sa kan taa i ta ko abi wan guwenti di an bunu, söseei di ja bi mëni. ’Mi ko ta bebe pasa maaka u?’ Dee sëmbë dee ta bebe pasa maaka sa ta pakisei taa de na daanma, ma sö a ta bigi kaa, te u de mëni nöö de an sa libi söndö daan möön. ’A ta taanga da mi u mi dë wantu daka, nasö möön longi söndö bebe daan u?’ Ee sö a dë, nöö hën da i ko dë wan daanma, nasö wan sëmbë di ko dë saafu u daan. A sa kan taa i abi data fanöudu u heepi i.

U di daan sa mbei sëmbë ko abi sömëni fuka, mbei so Keesitu sëmbë buta taa de an o ta bebe daan. So u de taki taa de an lobi fa a ta tesi. Ee wan mati fii buta taa an o bebe daan, nöö i sa lei taa i abi bunu fasi u di joo ta lesipeki ën, söseei u di ja o ta kuutu ën.

Kandë i ko si taa a bi o bunu fii buta wantu wëti da iseei. A bunu u wan Keesitu sëmbë buta un hia daan a o ta bebe, nasö na un ten a o ta bebe ën, ee wan pasi a wan wiki, nasö pikisö hiniwan daka te a ta njan. Boiti di dë, i abi so sëmbë di buta un pei daan de o ta bebe. De buta taa de o ta bebe pikisö win nasö bii, ma de buta taa de an o bebe gaan hati daan, nasö woto soni u bebe di de mökisi ku dee lö daan dë. Te wan sëmbë buta kaa unfa a o ta bebe daan, nöö an o taanga dëën sö möön faa hoi hënseei te a ta bebe. Boiti di dë, wan Keesitu sëmbë di taanga a di biibi an abi u ta fii sen, ee a buta dee lö wëti aki da hënseei.

A dë fanöudu tu fuu buta pakisei a wotowan te woo luku ee woo bebe daan. Loomë 14:21 ta taki taa: „Ee a nama a wan soni u njan, nöö i disëën. Ee soni u bebe, nöö na bebëën möön. Biga ja musu du na wan soni di sa kaba di otowan fii a sösö.” Unfa u sa du di soni aki? U musu lei taa u lobi dee baaa ku dee sisa fuu. Ee i ta si kuma di bebe di joo bebe daan sa mbei wotowan fii wan fasi, nöö ja o bebëën, u di i lobi di wotowan fii. Te i ta du sö, nöö i ta lei taa i ta lesipeki di wotowan fii, söseei ta i lobi ën. Boiti di dë, i ta lei tu taa ja ta du soni di bunu da i wanwan nöö a kaba, ma i ta booko i hedi ku andi bunu da wotowan.​—1 Kol. 10:24.

Ee gaan lanti buta wëti u lei fa sëmbë musu bebe daan a di köndë u de, nöö an dë u taki taa wan Keesitu sëmbë musu lesipeki dee wëti dë. Kandë de ta lei un mëni jaa wan sëmbë musu abi ufö a sa bebe daan, taa an musu bebe ee a o lei wagi, nasö ee a o wooko ku so masini.​—Lom. 13:1-5.

Jehovah da u sömëni kado, nöö wan u de da di mbei di a mbei u fuu sa ta taki da useei unfa woo wooko ku hii dee kado dee a da u. Wan u dee kado dë da di taki di u sa taki da useei andi woo njan, nasö andi woo bebe. Be dee soni dee u buta taa woo du, lei taa u ta tei di kado aki u bigi, söseei boo wooko ku ën u gafa di lobihati Tata fuu di dë a liba ala.