Hii dee piizii daka di sëmbë ta hoi ta kai ku Gadu ö?

Jehovah kë fuu piizii u di libi, söseei a kë fuu ta hoi fesa so juu tu. Ma hii dee piizii ku dee fesa dee sëmbë ta hoi ta kai ku ën u? Unfa u sa lei taa u lobi Jehovah te a nama ku di soni aki?

1. Faandi mbei sömëni u dee piizii di sëmbë ta hoi an ta kai ku Jehovah?

A o foondo i te i ko sabi taa gaansë u dee piizii di sëmbë ta hoi, nama ku guwenti nasö woto soni di an ta kai ku di Bëibel. A kan taa so u dee piizii dë nama ku poipoi biibi. A sa dë sö taa de nama ku taku jeje soni tu nasö ku di biibi di sëmbë ta biibi taa te wan sëmbë dëdë, nöö wan soni fëën ta libi go dou. So u dee piizii aki nama ku soni di sëmbë ta biibi di an ta kai ku Gadu nasö ku di biibi di sëmbë ta biibi taa de o feni kölöku (Jesaaja 65:11). Jehovah ta bai dee dinima fëën taa: „Wan musu nama ku na wan soni di an dë limbolimbo.”​—2 Kolenti 6:17.a

2. Unfa Jehovah ta si dee piizii di sëmbë ta hoi u gafa woto libisëmbë?

Jehovah ta bai u fuu köni fu wa buta „futoou a libisëmbë.” (Lesi Jelemia 17:5.) A so fesa daka de ta gafa dee tiima nasö dee sodati u wan köndë. A wotowan, de ta gafa di faaka u di köndë nasö di daka di di köndë bigi taki da hënseei (1 Johanisi 5:21). I abi woto fesa daka di sëmbë ta hoi di nama ku politiki soni nasö di nama ku woto ölganisaasi di sëmbë hopo u heepi wotowan. Unfa Jehovah bi o fii ee u bi o ta gafa wan sëmbë nasö wan ölganisaasi, möönmöön ee di sëmbë dë nasö di ölganisaasi dë ta da sëmbë taanga u du soni di an ta kai ku di kë fëën?

3. Unfa sëmbë ta tja deseei a so u dee piizii di de ta hoi?

Di Bëibel ta kuutu di bebe di sëmbë ta bebe pasa maaka, piizii ka sëmbë ta tja deseei fanjafanja, ku di fia di sëmbë ta fia bebe daan (1 Petuisi 4:3). A so u dee piizii di sëmbë ta hoi, de ta du soni pasa maaka, de ta du kumafa de hati fii, söseei de ta libi fanafiti a di së u manu ku mujëë soni. Ee u kë dë wan mati u Jehovah jeti, nöö wa musu nama ku dee lö fasi u libi aki dee an dë limbolimbo nëën wojo.

WOTO SONI DI I SA LEI

4. Na hoi piizii di an ta tja gafa ko da Jehovah

Lesi Efeise 5:10, nöö piki dee hakisi aki:

• Andi da wan soni di u musu sabi ufö u buta taa woo hoi wan fesa daka?

• Un fesa daka sëmbë lo’ u hoi a di pisiwata ka i ta libi?

• I si kuma dee fesa daka dë ta kai ku Jehovah u?

I bi pakisei wan daka kaa unfa Jehovah ta si di hoi di sëmbë ta hoi fuujai ö? Nöiti di Bëibel taki soni u wan dinima u Jehovah di bi hoi wan fuujai daka, ma a ta taki u tu sëmbë dee bi hoi fuujai daka, nöö dee sëmbë dë an bi ta dini Jehovah. Lesi Kenesesi 40:20-22 ku Mateosi 14:6-10. Baka di dë, nöö piki dee hakisi aki:

• Andi bi pasa a hii dee tu fuujai wosu aki?

• Te i luku dee tu Bëibel woto aki, nöö unfa i si kuma Jehovah ta pakisei u fuujai daka?

Kandë i ta hakisi iseei taa: ’A ta toobi Jehovah ee mi go a wan fuujai nasö wan woto piizii di an ta kai ku di Bëibel ö?’ Lesi Ëkisodesi 32:1-8. Baka di dë, pëë di FËLÖN, nöö piki dee hakisi aki.

FËLÖN: Fesa daka ku piizii di an ta kai ku Jehovah (5:07)

• Faandi mbei a dë fanöudu fuu ko sabi andi Jehovah lobi?

• Unfa u sa ko sabi andi Jehovah lobi?

Unfa u sa ko sabi te wan fesa daka an ta kai ku Gadu?

• A nama ku lei di an ta kai ku di Bëibel ö? Ee i kë sabi, nöö i musu suku naasë di fesa daka kumutu.

• A ta tja gafa ko da libisëmbë, wan ölganisaasi, nasö wan soni u di köndë u? U ta du hii soni u tja gafa ko da Jehovah, nöö u ta biibi taa hën o puu hii dee bookohedi u di goonliba aki.

• Dee soni di de ta du ta kai ku dee wëti u Bëibel ö? U musu ta tja useei a wan fasi di Gadu feni bunu.

5. Heepi woto sëmbë u de lesipeki dee soni dee i ta biibi

FËLÖN: Konda da sëmbë a wan lesipeki fasi andi i ta biibi (2:01)

Lesi Mateosi 7:12, nöö piki dee hakisi aki:

• Te i luku di tëkisi di u lesi djunsu dë, nöö i si kuma i sa piki dee famii fii dee an ta dini Jehovah taa de an musu hoi wan fesa daka u?

• Andi i sa du u lei dee famii fii taa i lobi de, aluwasi ja o hoi wan fesa daka makandi ku de?

6. Jehovah kë fuu ta dë waiwai

Jehovah kë fuu ta piizii makandi ku dee famii fuu ku dee mati fuu. Lesi Peleikima 8:15, nöö piki di hakisi aki:

• Unfa di tëkisi aki ta lei u taa Jehovah kë fuu ta dë waiwai?

Jehovah kë u dee sëmbë fëën ta piizii makandi. Pëë di FËLÖN fii si unfa di soni aki ta pasa a dee gaan komakandi fuu ka baaa ku sisa u peipei köndë ta ko makandi.

FËLÖN: U ta lei taa u lobi u na u a dee gaan könklësi fuu (5:40)

Lesi Galasia 6:10, nöö piki dee hakisi aki:

• U musu hoi dee nëbai fesa daka di sëmbë ta hoi ufö u sa du „bunu” da wotowan u?

• Undi u dee soni aki o mbei i ta möön dë waiwai? Te i ta da sëmbë kado a wan fesa daka u di i musu u du ën, naa te i ta da sëmbë soni u di iseei kë da de?

• So juu sömëni Kotoigi ta hoi piizii makandi ku dee mii u de, nöö de ta da de kado tu. Ee i abi mii, nöö andi da wantu soni di i sa du da de?

ANDI I LEI?

Jehovah kë fuu ta piizii makandi ku dee famii fuu ku dee mati fuu. Ma an kë fuu ta hoi piizii ku fesa daka di an ta kai ku ën.

Andi i bi o piki?

• Andi u sa hakisi useei fuu sa sabi ee wan piizii ta kai ku Jehovah nasö ee an ta kai ku ën?

• Unfa u sa heepi dee famii fuu ku dee mati fuu u de fusutan faandi mbei wa ta hoi wan fesa daka?

• Unfa i du sabi taa Jehovah kë fuu ta dë waiwai?

WOTO SONI DI I SA LUKU

Lesi di woto aki fii si dee fesa daka dee Keesitu sëmbë an ta hoi.

„Waarom vieren Jehovah’s Getuigen bepaalde feestdagen niet?” (Woto a di website fuu)

Lesi di woto aki fii si fö soni di mbei u ta biibi taa Gadu an lobi te sëmbë ta hoi fuujai daka.

„Fu san ede Yehovah Kotoigi no e hori friyaridei?” (Woto a di website fuu)

Luku andi dee mii dee lobi Jehovah sa du u mbei hati fëën piizii te sëmbë ta hoi fesa daka.

Jehovah lobi i (11:35)

Milionmilion Keesitu sëmbë an ta hoi Bëdaki. Unfa de ta fii u di hoi di de an ta hoi Bëdaki? De ta fii kuma de ta lasi wan soni ö?

„Den feni wan moro bun sani” (A Waktitoren, 1 u tuwalufumu-liba 2012)