WOTO 46
Faandi mbei i musu buta i libi a Gadu maun, nöö i dopu?
I ta buta i libi a Jehovah maun te i paamusi ën a begi taa hën wanwan nöö joo ta dini, söseei taa joo buta di kë fëën a di fosu kamian a i libi (Psalöm 40:8). Baka di dë, nöö i sa dopu. Te i dopu, nöö i ta lei woto sëmbë taa i buta i libi a Jehovah maun. Di buta di u ta buta u libi a Jehovah maun, da di möön fanöudu soni di wan sëmbë ta du nëën libi. Andi da di soni di mbei taa i kë buta i libi a Jehovah maun, hii fa di soni aki o tooka hii i libi?
1. Faandi mbei wan sëmbë ta buta hën libi a Jehovah maun?
U ta buta u libi a Jehovah maun u di u lobi ën (1 Johanisi 4:10, 19). Di Bëibel ta piki u taa: „Un musu lobi Jehovah Gadu ku hii unu hati, ku hii unu libi, ku hii unu pakisei, ku hii unu kaakiti” (Maikusi 12:30). Wa ta lei nöö taa u lobi Gadu ku dee soni dee u ta taki, ma u ta lei ën taa u lobi ën tu ku dee soni dee u ta du. Leti kumafa wan womi ku wan mujëë di lobi deseei tuutuu ta tööu, sö nöö di lobi di u lobi Jehovah ta mbei u buta u libi nëën maun, nöö u dopu.
2. Andi da dee bunu dee joo feni te i dopu ko dë wan Kotoigi?
Te i dopu, nöö i ta ko dë wan sëmbë u di wosudendu u Jehovah. Joo si taa na piki lobi Jehovah lobi i, söseei i ku ën o ko dë möön gaan mati. (Lesi Maleaki 3:16-18.) Boiti di dë, Jehovah o ko dë kuma wan tuutuu Tata da i, nöö joo ko abi baaa ku sisa a hii së u goonliba di lobi Jehovah, söseei di lobi i tu. (Lesi Maikusi 10:29, 30.) Ma, i musu du wantu soni ufö i sa dopu. I musu lei sabi Jehovah, i musu lobi ën, söseei i musu biibi di Womi Mii fëën. Te u kaba fëën, nöö i musu buta i libi a Jehovah maun. Te i du dee soni aki, hën i dopu, hën da i dë a di pasi u teego libi. Di Wöutu u Gadu ta taki taa: „Di dopu . . . ta tjubi u libi.”—1 Petuisi 3:21.
WOTO SONI DI I SA LEI
Woo luku faandi mbei a dë fanöudu fii buta i libi a Jehovah maun, nöö i dopu.
3. Hii u tuu musu taki ambë woo dini
Na awooten Isaëli, so sëmbë bi ta pakisei taa de bi sa dini Jehovah ku di poipoi gadu de kai Baali makandi. Ma Jehovah bi manda di tjabukama fëën de kai Elia, u go lei de taa an kë u de dini ën sö. Lesi 1 Könu 18:21, nöö piki di hakisi aki:
Andi dee Isaëli sëmbë bi musu du?
Leti kumafa dee Isaëli sëmbë bi musu taki ambë de o dini, sö nöö useei musu taki ambë woo dini. Lesi Lukasi 16:13, nöö piki dee hakisi aki:
Faandi mbei wa sa dini Jehovah, pindi, nasö ku woto soni makandi?
Unfa u ta lei Jehovah taa hën wanwan nöö woo dini?
4. Pakisei unfa Jehovah lobi i tjika
Jehovah ta da u sömëni bunu soni. Andi useei sa dëën tu? Pëë di FËLON.
Andi da wantu fasi fa Jehovah lei taa a lobi i? Lesi Psalöm 104:14, 15 ku 1 Johanisi 4:9, 10, nöö piki dee hakisi aki:
Undi u dee kado dee Jehovah da i i ta tei u bigi seei?
Unfa i ta si Jehovah u di a da i hii dee soni aki?
Te wan sëmbë da u wan kado di u lobi gaanfa, nöö u ta kë lei di sëmbë di da u di kado taa u ta tei ën u bigi seei. Lesi Detolonomi 16:17, nöö piki di hakisi aki:
Te i pakisei hii dee soni dee Jehovah du da i, nöö andi i ta kë dëën?
5. Joo feni sömëni gaan bunu te i buta i libi a Jehovah maun
Sömëni sëmbë ta biibi taa te de dë wan nëbai sëmbë, nasö te de abi wan bunu wooko, nasö te de abi möni, nöö de o dë waiwai. Ma sö a dë tuu ö? Pëë di FËLÖN, nöö piki dee hakisi aki.
Faandi mbei di womi a di fëlön bi disa u pëë bali, hii fa a bi lobi ën?
A bi taa a o dini Jehovah ka faa bi tei di ten fëën u ta pëë bali. I si kuma a bi du wan bunu soni ö? Faandi mbei i taki sö?
Ufö apösutu Paulosu bi ko toon wan Keesitu sëmbë, a bi ta du soni di bi o mbei a ko dë wan nëbai sëmbë. A bi kisi lei u wan nëbai leima u di ten dë, di bi lei ën dee wëti u dee Dju. Ma a bi disa hii dee soni dë a baka u ko toon wan Keesitu sëmbë. Paulosu bi ta tjali taa a bi disa dee soni dë a baka u? Lesi Filipi 3:8, nöö piki dee hakisi aki:
Faandi mbei Paulosu bi taki taa a bi ta si dee soni dee a bi ta du ufö a ko toon wan Keesitu sëmbë, kuma „sösö soni” nasö kuma sundju liba?
Andi a bi feni di a ko toon wan Keesitu sëmbë?
Faandi mbei a möön bunu u dini Jehovah ka fii go du wan woto soni ku i libi?
Di Paulosu ko toon wan Keesitu sëmbë, hën a bi ko abi möön hia soni möön dee soni dee a bi disa a baka
SO SËMBË TA TAKI TAA: „Mi sabi taa disi da di tuutuu lei, ma ma kaba jeti u dopu.”
Faandi mbei i si kuma a dë wan bunu soni u buta i libi a Jehovah maun, nöö i dopu?
ANDI I LEI?
Di lobi di u lobi Jehovah hën ta mbei u buta u libi nëën maun, nöö u dopu.
Andi i bi o piki?
Faandi mbei u musu lobi Jehovah ku hii u hati, söseei faandi mbei u musu dini ën ku hii u hati?
Un bunu Jehovah ta mbei dee sëmbë dee dopu ta feni?
I bi o kë buta i libi a Jehovah maun ö?
WOTO SONI DI I SA LUKU
Luku di fëlön aki fii si andi wan mujëë di bi lo’ u kanda, ku wan womi di bi lo’ u du sport bi du, u de bi sa buta de libi a Jehovah maun.
Soni di njönku sëmbë ta hakisi deseei—Andi mi kë du ku mi libi?—Fa di libi fuu bi dë (6:54)
Lesi di woto aki fii si andi da wantu woto soni di mbei a dë fanöudu fuu buta u libi a Jehovah maun.
„Fu san ede yu musu gi yusrefi abra na Yehovah?” (A Waktitoren, 15 u jailiba 2010)
Luku di poku-fëlön aki fii si unfa dee sëmbë dee buta de libi a Jehovah maun ta dë waiwai.
Lesi di woto „Na omeni yari kaba mi aksi misrefi: ’Fu san ede wi de na grontapu?’” fii si andi bi da wan mujëë taanga faa go sindo pakisei andi da dee möön fanöudu soni a di libi.
„Bijbel e kenki sma libi” (A Waktitoren, 1 u ëlufumu-liba 2012)