I dë kabakaba u buta i libi a Jehovah maun ö?

1-2. Andi wan sëmbë musu du ufö a dopu?

A DEE feifi jaa dee pasa, möön leki wan milion sëmbë dopu ko toon Jehovah Kotoigi. Sömëni u de ko sabi di tuutuu lei ’sensi di de bi dë piki mii’, leti kuma Timoteo di bi dë wan fesiten Keesitu sëmbë (2 Tim. 3:14, 15). So sëmbë ta dë gaan sëmbë kaa ufö de ko sabi soni u Jehovah, söseei so u de ta dë sëmbë di ko gaandi kaa ufö de ko sabi soni fëën. Wan mujëë di bi abi 97 jaa bi dopu ko toon Jehovah Kotoigi, baka di a bi lei soni u Bëibel ku dee Jehovah Kotoigi.

² Ee i da wan sëmbë di ta lei soni u Bëibel, nasö ee i da wan mii di kiija a di tuutuu lei, nöö i ta pakisei u dopu ö? Wë a bi o dë wan bunu soni seei! Ma joo abi u buta i libi a Jehovah maun ufö i dopu. Di woto aki o heepi i fii ko fusutan andi a kë taki u buta i libi a Jehovah maun. Ee i dë kabakaba u du ën, nöö di woto aki o heepi i fii ko fusutan faandi mbei ja musu fëëë u buta i libi a Jehovah maun, nöö i dopu.

ANDI A KË TAKI U BUTA I LIBI A JEHOVAH MAUN?

3. Konda woto u Bëibel di ta lei taa so sëmbë bi buta de libi a Jehovah maun.

³ Te di Bëibel ta taki u sëmbë di bi buta de libi a Jehovah maun, nöö a ta taki u sëmbë di a bi tei u du wan apaiti wooko dëën. Dee Isaëli sëmbë bi dë wan nasiön di Jehovah bi tei ko fëën. Ma so u de bi dë apaiti da Jehovah. Alon bi dë wan u dee sëmbë dë, a bi ta bisi wan soni nëën hedi di bi dë ku wan goutu soni di bi „santa”. Di goutu soni dë bi ta lei taa a bi ta du wan apaiti wooko da Jehovah. A bi dë di gaan mindima u Isaëli (Leif. 8:9). Dee Nasilei sëmbë seei bi dë sëmbë di bi buta de libi a Jehovah maun u du wan apaiti wooko dëën. Di Hebelejën wöutu nazir, di de puu ko „Nasilei sëmbë” kë taki taa „Sëmbë di de buta apaiti”, nasö „sëmbë di buta hënseei apaiti u du wan apaiti wooko”. Dee Nasilei sëmbë bi musu ta libi kumafa di Wëti u Mosesi bi ta taki.​—Nöb. 6:2-8.

4. (a) Andi ta ko dë di möön fanöudu soni a di libi fii, te i buta i libi a Jehovah maun?(b) Andi a kë taki u ’disa di soni di iseei kë’? (Luku di peentje tu.)

⁴ Te i buta i libi a Jehovah maun, nöö i ta lei taa i kë dë wan bakama u Jesosi Keesitu, söseei taa di dini di i ta dini Jehovah da di möön fanöudu soni a di libi fii. Andi di soni aki kë taki? Jesosi bi taki taa: „Ee wan sëmbë kë waka a mi baka, a musu disa di soni di hënseei kë” (Mat. 16:24). Dee Giiki wöutu di de puu ko „a musu disa di soni di hënseei kë”, sa puu ko „an ta libi da hënseei möön”. Ja o ta du soni möön di an ta kai ku Jehovah te i buta di libi fii nëën maun (2 Kol. 5:14, 15). Di soni aki kë taki tu taa wa o ta du ’dee soni di hati fuu ta manda u fuu du dee na ta kai ku Gadu’. Soni kuma „jajo libi” sö (Gal. 5:19-21; 1 Kol. 6:18). Di libi o taanga da i ee i ta hoi dee wëti aki ö? Wë nönö, an o dë sö ee i lobi Jehovah, söseei ee i dë seiki taa dee wëti fëën o tja wini ko da i (Ps. 119:97; Jes. 48:17, 18). Wan baaa de ta kai Nicholas taki taa: „I sa ta si dee wëti u Jehovah kuma dee peni u wan dunguwosu di ta tapa i fu ja du soni kumafa i kë, nasö i sa ta si de kuma dee peni u wan lëun köi di ta tapa di lëun fu an du hogi ku i”.

5. (a) Unfa i ta buta i libi a Jehovah maun? (b) Unfa di buta di wan sëmbë ta buta hën libi a Jehovah maun tooka ku di dopu di a ta dopu? (Luku di peentje tu.)

⁵ Unfa i ta buta i libi a Jehovah maun? I ta paamusi ën taa joo ta dini hën wanwan, söseei taa di dini di i ta dini ën o dë di möön fanöudu soni a di libi fii. Nöö hën da i ta paamusi Jehovah taa joo ta lobi ën u nöömö ’ku hii i hati ku hii i libi ku hii i pakisei, te dou ku hii di kaakiti di i abi’ (Maik. 12:30). Ju ku Jehovah wanwan nöö ta sabi te i buta i libi nëën maun. Baka di dë nöö joo dopu a lanti fesi u lei taa i buta hii di libi fii a Jehovah maun. Di soni aki da wan gaan soni seei di i ta paamusi ën. Fëën mbei Jehovah kë taa di libi fii musu ta kai ku di soni di i paamusi ën.​—Peleik. 5:4, 5.

FAANDI MBEI A BUNU FII BUTA I LIBI A JEHOVAH MAUN?

6. Faandi mbei wan sëmbë ta buta hën libi a Jehovah maun?

⁶ Di möön fanöudu soni mbei i ta buta i libi a Jehovah maun, hën da u di i lobi ën. Di lobi aki an dë wan fii nöö, ma a nama ku di sabi di ko sabi Jehovah, söseei ku di fusutan di u ta ko fusutan dee soni dee a abi a pakisei u du (Kol. 1:9). Di lei di i lei soni u Bëibel mbei i ko dë seiki taa Jehovah dë tuutuu, taa di Bëibel da di Wöutu fëën, söseei taa a ta wooko ku di ölganisaasi fëën u mbei hii dee soni dee a kë pasa tuutuu.

7. Andi u musu du ufö u buta u libi a Jehovah maun?

⁷ Dee sëmbë dee ta buta de libi a Jehovah maun musu sabi dee soni u Bëibel dee an taanga u fusutan, söseei de musu ta libi a wan fasi di ta kai ku ën. De ta mbei hii möiti u konda dee soni dee de ta lei da woto sëmbë (Mat. 28:19, 20). De ta ko möön lobi Jehovah, söseei di dini di de musu dini hën wanwan, ta ko dë di möön fanöudu soni da de. Sö a dë da i tu ö? Wë ee i lobi Jehovah ku hii i hati, nöö joo buta i libi nëën maun, söseei joo dopu u di i lobi ën tuutuu. Ma ja o du ën u di i kë u di sëmbë di ta lei i soni u Bëibel, ku dee gaan sëmbë fii wai ku i. Söseei ja o du ën u di dee mati fii du ën.

8. Unfa di dë di i ta dë ku tangi a hati o mbei i buta i libi a Jehovah maun? (Psalöm 116:12-14)

⁸ Te i pakisei hii dee soni dee Jehovah du da i, nöö joo dë ku tangi a hati seei, nöö di soni dë o mbei taa joo kë buta di libi fii nëën maun. (Lesi Psalöm 116:12-14.) Ku leti di Bëibel ta kai Jehovah di sëmbë ka „hiniwan bunu soni ku hiniwan kado di bunu te dou ta kumutu” (Jak. 1:17). Di lusupaima di di Womi Mii fëën Jesosi ko paka da u, da di möön gaan kado di a da u. Pakisei luku fa di soni aki bigi tjika! Di lusupaima ta mbei taa i ku Jehovah sa ko toon gaan mati. Söseei Jehovah ta da i di okasi fii sa libi u teego (1 Joh. 4:9, 10, 19). Di buta di i ta buta i libi a Jehovah maun, da wan u dee möön bunu fasi fa i sa lei taa i dë ku tangi a hati da di möön gaan soni di a du u lei taa a lobi i, söseei taa i ta tei dee bunu dee a ta mbei i feni u bigi (Deto. 16:17; 2 Kol. 5:15). Di fasi fa u sa lei taa u ta tei dee soni aki u bigi dë a woto 46 pisi 4 u di buku Yu kan de koloku fu têgo!, ku di fëlön u dii miniti Kado di yu kan gi Gado.

I DË KABAKABA U BUTA I LIBI A JEHOVAH MAUN NÖÖ I DOPU Ö?

9. Faandi mbei wan sëmbë a musu ta fii taa woto sëmbë ta duwengi ën faa buta hën libi a Jehovah maun?

⁹ A kan taa i ta fii kuma ja kaba jeti u buta i libi a Jehovah maun nöö i dopu. Kandë i musu tooka soni a di libi fii sö taa i sa ta libi kumafa Jehovah kë, söseei kandë i musu mbei möiti u di biibi fii ko möön taanga (Kol. 2:6, 7). Na hii dee sëmbë dee ta lei soni u Bëibel nango a fesi a di biibi a di wan fasi, söseei na hii njönkuwan dë kabakaba u buta de libi a Jehovah maun nöö de dopu. Luku andi ku andi dë fanöudu fii tooka a di libi fii sö taa i sa go a fesi a di biibi, söseei na ta tei iseei ta maaka ku wotowan.​—Gal. 6:4, 5.

10. Andi i sa du te i si taa ja kaba jeti u buta i libi a Jehovah maun nöö i dopu? (Luku di pisi „Da dee sëmbë dee kiija a di tuutuu lei.”)

¹⁰ Aluwasi ee i si taa ja kaba jeti u buta i libi a Jehovah maun, tökuseei a bunu fii butëën kuma wan soni di i kë du. Hakisi Jehovah be a heepi i fii sa tooka dee soni dee i musu tooka a i libi (Fil. 2:13; 3:16). I sa dë seiki taa a o haika i te i ta begi ën, nöö a o heepi i tu.​—1 Joh. 5:14.

DI SONI MBEI SO SËMBË TA BIABIA U BUTA DE LIBI A JEHOVAH MAUN NÖÖ DE DOPU

11. Unfa Jehovah o heepi u fu u hoi useei nëën?

¹¹ So sëmbë di sa buta de libi a Jehovah maun, nöö de dopu ta biabia u du di soni dë. Kandë de ta fëëë taa baka te de dopu de u du wan gaan zöndu, nöö de o puu de a di kemeente. Ee sö i ta fii tu, nöö i sa dë seiki taa Jehovah o da i hii soni di i abi fanöudu „fii sa ko libi bunu nëën wojo, leti kumafa a fiti u dee sëmbë fëën musu ta libi” (Kol. 1:10). Söseei a o da i di kaakiti di i abi fanöudu, fii sa ta du dee soni dee ta kai ku ën. A heepi sömëni sëmbë sö kaa (1 Kol. 10:13). Di soni dë da wan u dee soni di ta mbei taa hia sëmbë an nango disa di biibi. Jehovah ta heepi dee sëmbë fëën u de sa hoi deseei nëën.

12. Unfa u sa hoi useei fu wa du gaan zöndu?

¹² Hiniwan zöndu libisëmbë ta abi di fii udu soni di an bunu (Jak. 1:14). Ma tökuseei a dë a hiniwan fuu u luku andi woo du te tesi ta miti u. Fuu taki ën kumafa a dë, nöö ju da di sëmbë di ta buta da iseei unfa joo libi. So sëmbë ta taki taa wa sa basi dee fii fuu, nasö di fasi fa u ta du soni. Ma di soni dë an dë sö. Wan sëmbë sa lei unfa a sa ta hoi hënseei fu an du soni di an bunu. Fëën mbei aluwasi ee i ta fii u du soni di an bunu, tökuseei i sa hoi iseei fu ja du ën. Dee soni dee o heepi i fii hoi iseei, da di begi di joo ta begi Jehovah hiniwan daka, di guwenti di i o abi u ta lei soni a di Wöutu fëën, di go di joo nango a dee komakandi, ku di konda di joo ta konda soni u di biibi fii da wotowan. Di du di joo ta du dee soni aki hiniwan juu, o heepi i fii ko taanga tjika fii sa hoi iseei a Jehovah. Söseei nöiti i musu fëëkëtë taa Jehovah o heepi i fii sa hoi iseei a di soni di i paamusi ën.​—Gal. 5:16.

13. Unfa u sa djeesi Josëfu?

¹³ A o möön kösökösö da i fii hoi iseei a Jehovah, ee i ta seeka iseei a fesi da dee tesi dee sa miti i. Di Bëibel abi woto u sömëni sëmbë di bi du di soni dë, hii fa de bi dë zöndu libisëmbë. Di mujëë u Potifali bi mbei möiti sömëni pasi u mbei Josëfu duumi ku ën. Ma Josëfu bi sabi kaa andi a bi o du te di soni dë bi o pasa. Di Bëibel ta piki u taa an bi kë, söseei a bi taki taa: „Unfa mi sa du sö wan gaan hogi faa ko dë taa mi du zöndu a Gadu wojo?” (Ken. 39:8-10) A dë gbelingbelin u si taa Josëfu bi sabi a fesi kaa andi a bi o du, te di mujëë bi o pooba u duumi ku ën. Di soni aki bi mbei an bi taanga dëën poi u du wan soni wantewante di di tesi bi miti ën.

14. Unfa u sa hoi useei a Gadu te tesi ta miti u?

¹⁴ Unfa i sa djeesi Josëfu, nöö i hoi iseei a Gadu te tesi ta miti i? Nöunöu kaa i sa buta da iseei andi joo du te wan tesi ko a i pasi. I musu lei u taki nönö wantewante da soni di Jehovah ta buuse, söseei ja musu ta kë pakisei dee soni dë seei (Ps. 97:10; 119:165). A sö wan fasi, ja o du wan gaan zöndu te tesi ta miti i. U di joo sabi a fesi kaa andi i musu du.

15. Unfa wan sëmbë sa lei taa a ’ta suku Jehovah ku wan hati’? (Hebelejën 11:6)

¹⁵ A kan taa i sabi taa i feni di tuutuu lei, söseei taa i kë dini Jehovah ku hii i hati. Ma kandë i ta fii kuma ja kaba jeti u buta i libi a Jehovah maun nöö i dopu. I sa du di seei soni di Könu Dafiti bi du. I sa hakisi Jehovah taa: „Mi Gadu, öndösuku mi, nöö ko sabi andi dë a mi hati. Öndösuku mi finifini, nöö ko sabi dee soni dee ta möön mi. Luku ee wan soni dë di o mbei mi tjali bakaten. Lei mi di pasi di o tja mi go a di libi u teego” (Ps. 139:23, 24). Jehovah ta mbei dee sëmbë „dee ta suku ën ku wan hati” feni gaan bunu. Di mbei di i ta mbei möiti u buta i libi nëën maun, nöö i dopu, ta lei taa i da wan u dee sëmbë dee ta suku Jehovah ku wan hati.​—Lesi Hebelejën 11:6.

I MUSU TA MBEI MÖITI NÖÖMÖ FII KO MÖÖN ZUNTU U JEHOVAH

16-17. Unfa dee sëmbë dee kiija a di tuutuu lei sa ko zuntu u Jehovah? (Johanisi 6:44)

¹⁶ Jesosi bi taki taa Jehovah hën ta hai dee bakama fëën ko nëën. (Lesi Johanisi 6:44.) Pakisei luku fa di soni aki bigi tjika, söseei andi a kë taki dai. Jehovah ta si wan bunu soni a hiniwan fuu di a hai ko nëën. A ta si hiniwan fuu „kuma wan apaiti gudu” fëën (Deto. 7:6). Sö wë a ta si i tu e.

¹⁷ Kandë i da wan njönkuwan di de ta kiija a di tuutuu lei. Nöö kandë i sa ta fii kuma i ta dini Jehovah u di dee gaansëmbë fii dë Jehovah Kotoigi, ma na u di Jehovah hai ko nëën. Ma tökuseei di Bëibel ta taki taa: „Ko zuntu u Gadu, nöö a o ko zuntu fii tu” (Jak. 4:8; 1 Klon. 28:9). Te iseei ta mbei möiti u ko zuntu u Jehovah, nöö hënseei o ko zuntu fii tu. Jehovah an ta si i kuma wan sëmbë di dë a wan kulupu dendu nöö a kaba. A ta hai hiniwan fuu ko nëën, te kisi dee sëmbë dee kiija a di tuutuu lei. Te wan sëmbë seei ta mbei möiti u ko zuntu u Jehovah, nöö Jehovah o du di soni di sikifi a di tëkisi u Jakobosi 4:8.​—Luku 2 Tesalonika 2:13.

18. Andi woo luku a di woto di ta ko? (Psalöm 40:8)

¹⁸ I ta lei taa i ta djeesi Jesosi te i buta i libi a Jehovah maun, nöö i dopu. Ku hii hën hati a bi buta hën libi nëën Tata maun fa bi sa du soni di ta kai ku ën (Lesi Psalöm 40:8; Heb. 10:7). A di woto di ta ko, woo luku andi sa heepi u fuu ta dini Jehovah go dou baka te u dopu.