HEEPI SËMBË U DE KO DË BAKAMA U JESOSI
Joh. 3:1, 2
WOTO 10
Mbei hii möiti u heepi sëmbë u de ko dë bakama u Jesosi
Mama wëti: „U bi ta wai seei taa u sa paati di Buka u Masa Gaangadu da unu. Nöö na di buka wanwan u bi paati da unu e, dee sëmbë, ma di libi fuu seei tu. Sö un ko dë wan hati soni da u tjika.”—1 Tes. 2:8.
Andi Jesosi bi du?
1. Luku di FËLÖN, nasö lesi Johanisi 3:1, 2. Baka di dë, nöö i buta pakisei a dee soni aki:
Faandi mbei i si kuma Nikodemusi bi go luku Jesosi a ndeti?—Luku Johanisi 12:42, 43.
Unfa Jesosi bi lei taa a bi dë kabakaba u heepi Nikodemusi faa ko dë bakama fëën?
Andi u ta lei a Jesosi?
2. U di u lobi sëmbë, mbei u ta heepi de u de ko dë bakama u Jesosi.
Djeesi Jesosi
3. Lei di sëmbë di i ta lei soni a di juu ku di kamian di bunu dëën. Kandë wan daka a di wiki nasö wan pisiten u di daka sa möön bunu dëën. A bi o möön lobi ën ee i ta lei ën soni nëën wookope u, nëën pisi ö, nasö a wan lanti kamian u? Ee i sa, nöö mbei hii möiti fii sa lei ën soni a di juu ku di kamian di möön bunu dëën.
4. Lei ën soni u Bëibel hiniwan wiki. Ee joo go a wan kamian, nöö na be a dë sö taa di sëmbë an lei soni di wiki dë. Ma buta pakisei a dee soni aki:
I sa lei di sëmbë soni a wan woto daka a di wiki ö?
I sa lei ën soni a tëlëfön nasö a wan fasi ku Internet ö?
Mi sa hakisi wan woto peleikima faa lei ën soni ö?
5. Begi fii sa ko ta si soni a wan bunu fasi. Begi Jehovah faa heepi i fu ja disa di sëmbë, aluwasi ee an ta lei soni u Bëibel hiniwan wiki nasö ee a ta tei ten u du dee soni dee a ta lei (Fil. 2:13). A musu u dë taa di sëmbë di i ta lei soni abi bunu fasi seei. Begi Jehovah faa heepi i fii buta pakisei a dee fasi dë.
SÖSEEI LUKU
Nöng. 3:27; Tjab. 20:35; 2 Kol. 12:15