„A bi dë di möön bunu kado di de bi da mi”

Sö wan mujëë mii di bi abi 13 jaa bi taki di de bi dëën wan dagu mii. Wan mujëë di ko abi wan bumbuu wooko nöunöu, bi taki taa di computer di hën tata bi dëën di a bi nango a siköö jeti, bi tooka hën libi seei. Wan womi bi taki taa di kaita di hën mujëë bi dëën di de bi tööu wan jaa, bi dë di möön bunu kado di sëmbë bi dëën.

Hiniwan jaa, sömëni sëmbë ta tei de ten ku de kaakiti u suku di möön bunu kado da wan mati nasö wan famii u de. Nöö gaansë u de bi o kë jei di soni di so sëmbë taki a bigi u di woto aki. Unfa a dë ku i? I bi o kë da wan sëmbë wan kado di a o lobi ö? Nasö i bi o kë de da i wan kado di i lobi ö?

Kandë i bi o kë da wan sëmbë wan kado, u di i sabi taa di sëmbë o wai ku ën, ma söseei u di i sabi taa a o mbei i fii bunu. Di Bëibel ta taki taa: „Dee sëmbë ta da sëmbë soni, de dë waiwai möön leki dee sëmbë ta feni” (Tjabukama 20:35). Wë di soni di di Bëibel taki aki dë sö tuutuu. Sëmbë ta möön wai te de sabi taa di sëmbë di de da di kado tei ën u bigi seei.

Ma andi i sa du sö taa dee kado dee i ta da wotowan sa mbei de ta dë waiwai, nasö taa iseei ta dë waiwai? Ee ja sa da wan sëmbë di möön bunu kado, nöö andi i sa du u mbei taa di sëmbë sa lobi di kado di joo dëën?