Njunjun kanda u dini Jehovah!
1 A di jaa-komakandi di bi hoi a 4 u tinimu-liba u di jaa 2014, dee baaa bi taki fa soni seti u tooka soni a di kanda buku fuu. U bi wai seei u jei di soni aki! Dee haikama bi lei taa dee Könuköndë kanda fuu dë fanöudu seei a di dini di u ta dini Jehovah.—Ps. 96:2.
2 Kandë i ta hakisi iseei, ’Faandi mbei de o tooka soni a di kanda buku fuu?’ Wë, u sömëni soni hedi. Wan u dee soni da, u di u ko ta fusutan so Bëibel tëkisi möön bunu, mbei woo abi u tooka so u dee wöutu u dee kanda fuu (Nong. 4:18). Wan woto soni da, u di a sömëni u dee töngö, dee wöutu dee dë a di kanda buku u nöunöu, tei puu u di fosu Nyun-Grontapuvertaling di bi dë a Ingisitöngö. Ma a di jaa 2013 wan njunjun wan u di Bëibel aki bi ko a döö a Ingisitöngö. Fëën mbei dee wöutu u so kanda musu tooka sö taa de sa kai ku dee soni dee sikifi a di njunjun Bëibel. U di de musu du hia wooko u tooka dee wöutu u dee kanda dee u abi, mbei dee baaa bi taki taa de o buta wan tu njunjun kanda ko a di kanda buku fuu.
3 U musu wakiti te di njunjun kanda buku ko ufö u sa bigi kanda dee njunjun kanda u? Nönö. U wai u piki unu taa baka wan tu liba, wan tu njunjun kanda o dë u feni a di website fuu jw.org. Te wan njunjun kanda ko a döö, nöö a kaba u di skeima u di Diniwooko Komakandi a o sikifi „njunjun kanda”.
4 Unfa u sa lei dee njunjun kanda: A sa dë wan taanga soni u lei wan njunjun kanda. Ma tökuseei leti kuma di psalöm sikifima, u kë kanda a dee komakandi fuu, nöö „wa kë fika pii” (Ps. 30:12). Ee u kë lei wan njunjun kanda, nöö u sa du dee soni dee sikifi a basu aki.
Ta haika di poku di o dë a di website fuu hiniwan juu. Möön i ta haika di poku, möönmöön joo sa hoi ën a hedi.
Pooba u lei di kanda a hedi.
Ta pëë di poku nöö i ta kanda. Ta du ën sö u te i sabi di kanda.
Ta bia dee njunjun kanda a di wosudendu dini fii u te un ko sabi de.
5 Te woo tapa di Diniwooko Komakandi ku wan njunjun kanda, nöö di kemeente o haika di poku wan pasi ufö. Baka di dë nöö de o kandëën makandi, leti kumafa u guwenti kanda dee woto kanda.
6 Te u luku ën bunu, nöö di kanda di u ta kanda a dee komakandi fuu ta da u piizii, u di u ta kanda makandi u gafa Jehovah. Fëën mbei wa musu abi di guwenti u ta hopo disa di sindo kamian fuu te woo kanda a dee komakandi.
7 Wan woto fasi dë fa u sa lei taa u ta tei dee Könuköndë kanda fuu u bigi. A hiniwan mamate ku sapate pisi u dee gaan komakandi fuu, de ta bia poku ufö di komakandi bigi. Tu pasi a wan jaa sömëni baaa ku sisa ta kumutu a hii së u goonliba u go a Patterson, di dë a New York, u go mbei dee suti poku dee u ta kanda a dee komakandi fuu. Fëën mbei te di fesima u di komakandi hakisi u fuu suku wan sindo kamian u sindo haika di poku di o pëë, nöö u musu du ën. Te u du sö, nöö a o heepi u fuu seeka u hati da dee soni dee woo lei.—Ësl. 7:10.
8 A kaba u di komakandi u tide, woo kanda wan u dee njunjun kanda fuu. De tjëën ko a döö a di jaa-komakandi, nöö a dë wan apaiti kanda di de mbei u di di Könuköndë ta tii 100 jaa kaa.
9 U sabi taa dee njunjun kanda aki da „bumbuu soni” di Jehovah da u (Mat. 12:35a). Boo dë kabakaba u lei dee njunjun kanda aki u kanda de ku hii u hati u gafa di Gadu fuu a wan fasi di fiti!—Ps. 147:1.