Wooko ku di website fuu jw.org a di peleikiwooko—„Ko toon Jehovah mati”

Di pisi „Buku ku woto soni” a di Saamakatöngö website fuu jw.org, abi wan woto pisi de ta kai „Fëlön”, nöö a di pisi aki i abi wan poku, ku fëlön da pikimii. Wa abi hia u dee soni aki a di töngö fuu, ma i sa go a di Bakaatöngö website u feni möön soni. I wooko ku di pisi u di website aki a di peleikiwooko kaa u? Ee i ta lei wan mama nasö wan tata di a’ miii soni u Bëibel, an bi o dë wan bunu soni u lei ën di pisi u di website fuu aki ö? Di soni aki sa mbei a ko sabi woto pisi u di website fuu tu.

Di de bi ta paati di talakitaati Könuköndë Njunsu nö. 38, hën wan baaa bi da wan mujëë di talakitaati aki. Wantewante dë di mujëë bi bigi lesi ën. Nöö a bi a’ wan lo miii di bi kë sabi soni u di talakitaati seei. Hën di baaa lei ën di në u di website fuu di sikifi a baka u di talakitaati. U di di mujëë bi kë sabi möön soni, mbei di baaa bi tei di okasi dë u pëë wan u dee fëlön u Kaalëpu a di tëlëfön fëën da di mujëë ku dee miii fëën.

Wan sisa bi konda soni u di website fuu da wan mujëë di a’ miii, di hën ku ën ta wooko a di wan kamian. A bi piki ën taa di website fuu abi soni di nama ku di wosudendu libi. Di mujëë ku dee mii fëën bi go a di website fuu jw.org. Bakaten, a piki di sisa taa dee mii bi ta kanda a di wosu seei. De bi ta kanda wan u dee poku di u ta kai „Breng het Woord” (Preiki a wortu) di dë a di pisi „Tron wan mati fu Yehovah”.

Ko sabi di pisi u jw.org aki, nöö i download fëlön, poku nasö woto soni buta a di tëlëfön, nasö di tablet fii. A sö wan fasi joo dë kabakaba u wooko ku di pisi u jw.org aki a di peleikiwooko. A dë wan bunu soni seei di o heepi u u dini Masa kuma futuboi fëën!​—Tjab. 20:19.