Joo dë fajafaja kuma Jehovah ku Jesosi te di juu ta zuntu fuu mëni di dëdë u Jesosi ö?
1. Un möiti Jehovah kotoigi ta mbei te di juu ta zuntu u mëni di dëdë u Jesosi?
1 Jehovah ta du dee soni dee a abi a pakisei fajafaja seei. Te a nama ku so u dee bunu di di Könuköndë u Gadu o tja ko, nöö Jesaaja 9:7 ta taki taa: „Jehovah di ta tii dee sodati o mbei di soni aki pasa nöömö.” Sö nöö di Womi Mii u Gadu bi lei taa a dë fajafaja da di tuutuu biibi di a bi dë a goonliba aki (Joh. 2:13-17; 4:34). Hiniwan jaa te di juu ta zuntu u mëni di dëdë u Jesosi, nöö milionmilion peleikima a hii së u goonliba ta mbei möiti u dë fajafaja kuma Jehovah ku Jesosi, u di de ta peleiki möön hia. Joo peleiki fajafaja tu ö?
2. Te u dë fajafaja, nöö andi woo du a bigi u 7 u gaanliba?
2 Te woo paati dee kai u mëni di dëdë u Jesosi: A di jaa aki woo bigi paati dee kai a sata 7 u gaanliba. Seti soni nöunöu fii sa dë fajafaja a di peleikiwooko a di pisiten dë. Dee kemeente o wai seei te de o ta paati di pampia a hii di pisiwata ka de ta peleiki. Mbei hii möiti u kai dee studie fii, dee gobaka fii, dee sëmbë i ku de ta wooko a di wan kamian, dee famii fii, ku dee mii i ku de ta sindo a di wan kalasi. I sa manda de go luku di kai a jw.org/srm tu.
3. Unfa u sa peleiki möön hia a gaanliba ku piki-deewei-liba?
3 Heepi pionili: Te u dë fajafaja, nöö woo kë peleiki möön hia. U di nöunöu di seti dë taa u sa peleiki 30 juu, mbei sömëni baaa ku sisa o go a di heepi pionili a di pisiten u gaanliba ku piki-deewei-liba. Te joo hoi di Wosudendu Dini fii, nasö te joo lei iseei soni u Bëibel,nööbegi fii sa du di soni aki (Nöng. 15:22). Te joo dë fajafaja u paati di pampia, nöö joo sa da wotowan degihati u dë fajafaja tu. Ee i seti soni u peleiki möön hia, nöö joo dë fajafaja kuma Jesosi.—Maik. 6:31-34.
4. Un wini woo feni te u dë fajafaja kuma Jehovah ku Jesosi?
4 Te woo dë fajafaja kuma Jehovah ku Jesosi te di juu ta zuntu fuu mëni di dëdë u Jesosi, nöö a o tja gaan wini ko da u seei. Woo sa peleiki da möön hia sëmbë a di pisiwata ka u ta peleiki. Woo dë waiwai u di u sabi taa u ta dini Jehovah, söseei u di u ta da wotowan soni tu (Tjab. 20:35). Nöö di möön fanöudu soni, hën da Jehovah di Gadu fuu di dë fajafaja ku di Womi Mii fëën o feni u bunu.