Peleikiwooko komakandi di ta heepi u u du di peleikiwooko möön bunu

1. Faandi mbei u ta hoi peleikiwooko komakandi?

¹ Wan daka Jesosi bi hoi wan komakandi ku 70 u dee bakama fëën ufö de go peleiki (Luk. 10:1-11). A da de degihati u di a toona mëni de taa de an bi o dë de wanwan, ma Jehovah ’di Masa u di koti wooko’ bi o tii de. Söseei a bi da de lai di bi o heepi de u du di wooko möön bunu, nöö a bi buta de „tu ku tu” u wooko. Sö nöö dee peleikiwooko komakandi dee u ta hoi a di ten aki ta da u degihati, söseei de ta seeka u u du di peleikiwooko a wan bunu fasi.

2. Un longi wan peleikiwooko komakandi musu hoi?

² Nöunöu wan peleikiwooko komakandi ta hoi 10 miniti te go miti 15 miniti. Nöö a dee ten dë dendu de musu paati dee peleikima, de musu taki na un pisiwata de o peleiki, söseei de musu begi tu. Ma soni o tooka. Bigi u piki-deewei-liba, wan peleikiwooko komakandi o ta hoi feifi te go miti seibi miniti. Ma te wan woto kemeente o hoi komakandi a di juu dë, nöö di peleikiwooko komakandi musu hoi möön sati ee wan Bëibel tëkisi lesi kaa di da dee peleikima degihati. Te di peleikiwooko komakandi an ta hoi longi, nöö woo sa peleiki möön hia. Boiti di dë, ee wan pionili nasö wan peleikima bi bigi peleiki a fesi, nöö an ta lasi hia ten poi.

3. Unfa dee peleikiwooko komakandi musu seti sö taa de sa heepi dee peleikima?

³ Dee peleikiwooko komakandi musu seti u heepi dee peleikima. A sömëni kemeente a ta möön bunu te peleikiwooko kulupu ta hoi peleikiwooko komakandi a wan woto kamian, ka u de hoi ën a di wan kamian. Di soni aki o heepi dee peleikima u ta dou möön hesi a di kamian ka di peleikiwooko komakandi ta hoi, nasö a di kamian ka de o peleiki. Söseei an o taanga sö u paati dee peleikima, nöö di gaanwomi di ta luku di kulupu o sa buta möön pakisei a dee sëmbë u di kulupu fëën. Dee gaanwomi sa luku andi möön bunu da di kemeente. Ufö di baaa di ta hoi di komakandi tapa ku wan sati begi, hii sëmbë musu sabi naasë de musu go peleiki, söseei ku ambë de musu wooko.

4. Faandi wa musu si kuma dee kemeente komakandi dë fanöudu möön dee peleikiwooko komakandi?

⁴ Di peleikiwooko komakandi dë kuma hii dee woto kemeente komakandi: Dee peleikiwooko komakandi ta hoi u heepi dee sëmbë dee nango a peleikiwooko. Fëën mbei na hii di kemeente nango a dee komakandi dë. Tökuseei wa musu si kuma dee kemeente komakandi dë fanöudu möön dee peleikiwooko komakandi. Leti kumafa hii dee woto komakandi fuu dë fanöudu, sö nöö di peleikiwooko komakandi dë fanöudu tu. Jehovah seti ën u heepi u fuu da useei taanga u du bunu soni (Heb. 10:24, 25). Fëën mbei di baaa di ta hoi di peleikiwooko komakandi musu seeka hënseei bunu, faa sa gafa Jehovah ku dee soni dee a o taki, söseei faa sa taanga dee baaa ku sisa dee o go a di peleikiwooko. A bi o möön bunu u wan peleikima mbei möiti u dou a di peleikiwooko komakandi.

5. (a) Andi di diniwooko-gaanwomi musu du te a nama ku dee peleikiwooko komakandi? (b) Andi wan sisa musu du te a o hoi wan peleikiwooko komakandi? Luku di pisi a bladsëidë 6.

⁵ Unfa di baaa di o hoi di peleikiwooko komakandi musu seeka hënseei: Wan sëmbë musu kisi di pisi di a musu hoi a komakandi a fesi, faa sa seeka hënseei bunu u hoi di pisi dë. Di wan seei fasi a musu dë ku dee peleikiwooko komakandi. Te peleikiwooko kulupu ta hoi peleikiwooko komakandi, nöö hiniwan gaanwomi nasö di baaa di ta tei kamian dëën, o hoi di peleikiwooko komakandi da di kulupu fëën. Ma te hii dee kulupu o ko a wan, nöö di diniwooko-gaanwomi o buta wan sëmbe u hoi di komakandi. So diniwooko-gaanwomi ta da hii dee baaa dee ta hoi peleikiwooko komakandi wan skeima nasö de ta buta wan a di böutu a zali. Di diniwooko-gaanwomi musu luku bunu ambë a o ta buta u hoi peleikiwooko komakandi. A musu hoi a pakisei taa ee a kë u dee peleikiwooko komakandi hoi bunu, nöö a musu tei baaa di sa’ u lei sëmbë soni ku di sa’ u seti soni a wan bunu fasi. Ee di diniwooko-gaanwomi si taa a so daka na wan gaanwomi, na wan dinai nasö na wan dopu baaa ta dë u hoi di peleikiwooko komakandi, nöö a musu buta wan dopu sisa di sa, u hoi ën.​—Luku di pisi „Te wan sisa o hoi di peleikiwooko komakandi.”

6. Faandi mbei di baaa di ta hoi di peleikiwooko komakandi musu seeka hënseei bunu a fesi?

⁶ Te u abi wan pisi u hoi a di Teokalasia-siköö nasö a di Diniwooko Komakandi, nöö u ta seeka useei bunu, u di u ta si ën kuma wan fanöudu soni. Sömëni fuu ta seeka a fesi, nöö wa ta wakiti te u dë a pasi nango a komakandi ufö u ta bigi pakisei andi woo taki. Wë, sö a musu dë tu ku di peleikiwooko komakandi. U di di peleikiwooko komakandi o ta hoi möön sati, mbei di baaa di o hoi ën musu seeka bunu a fesi, sö taa dee peleikima sa feni degihati, söseei u di komakandi sa kaba a di juu. Söseei a musu sabi a fesi ka de o peleiki.

7. Fu un pei soni di baaa di ta hoi di peleikiwooko komakandi sa taki? Luku di pisi a bladsëidë 6.

⁷ Dee soni dee i sa taki: U di na hii kamian dë di wan fasi, mbei di „saafu di dë u futoou” an piki dee baaa dee ta hoi peleikwooko komakandi finifini andi de musu ta taki. Luku di pisi „Soni di u sa luku a wan peleikiwooko komakandi”. Di peleikiwooko komakandi musu hoi kuma wan takimakandi. So juu de sa hoi wan demo, nasö de sa luku wan u dee fëlön fuu a jw.org kuma Andi de ta du a wan Könuköndë zali?, nasö Unfa u ta lei sëmbë soni u Bëibel?. Te di baaa di o hoi di peleikiwooko komakandi ta seeka hënseei, nöö a musu pakisei andi sa da dee peleikima degihati di daka dë.

8. Fu un soni di baaa sa taki te a o hoi di peleikiwooko komakandi u sata ku sonde?

⁸ Gaansë u dee peleikima ta paati dee Waktitoren ku dee brochure fuu a sata. Sömëni peleikima dee nango a peleikiwooko sata an ta dë mindi wiki a di peleikiwooko, nöö kandë de sa fëëkëtë dee soni di de bi seeka a di Wösudendu Dini da di peleikiwooko. Fëën mbei a bi o bunu taa di baaa di ta hoi di peleikiwooko komakandi taki u di pisi di ta dë a di lasiti bladsëidë u Di Könuköndë diniwooko fuu, di ta lei u unfa u sa paati di Waktitoren ku dee brochure fuu. Söseei a sa lei dee peleikima fa de sa taki u soni di de jei a njunsu, soni di pasa nasö soni di nama ku wan piizii daka te de o paati buku da sëmbë. Nasö a sa lei de andi de sa du u toona go a wan sëmbë di de bi da wan buku. Ee wan peleikima bi paati di Waktitoren nasö di brochure kaa, nöö di baaa di ta hoi di peleikiwooko komakandi sa hakisi ën faa konda unfa a bi du ën nasö fa soni bi waka, u da dee woto peleikima degihati. Di baaa di o hoi di peleikiwooko komakandi a sonde sa du di wan seei soni u lei u unfa u sa paati dee buku dee woo paati di liba dë. Hiniwan daka u sa paati buku kuma di Bunu buka-brochure, di Haika Gadu-brochure ku di Bëibel lei-buku da sëmbë. Di baaa sa lei dee peleikima kölö sö fa de sa paati dee buku aki.

9. Faandi di baaa sa taki a sata ku sonde te woo paati wan fanöudu pampia da sëmbë?

⁹ Ee dee peleikima u wan kemeente o paati wan fanöudu pampia da sëmbë, nöö di baaa di ta hoi di peleikiwooko komakandi sa taki unfa u sa paati di pampia makandi ku di Waktitoren ku dee brochure fuu. Nasö a sa piki u andi u musu du te u si taa wan sëmbë kë sabi möön soni. Wan woto soni di a sa du tu, hën da u hakisi dee peleikima u konda fa soni bi waka di de bi paati di pampia.

10, 11. Faandi dee peleikima musu ta seeka deseei a fesi, ee de kë taa di peleikiwooko komakandi waka bunu?

¹⁰ Unfa dee peleikima sa seeka deseei: Dee peleikima seei sa mbei di peleikiwooko komakandi waka bunu. Te de ta seeka deseei a fesi, kandë te de dë a di Wosudendu Dini u de, nöö de o sa taki wan soni di o da woto peleikima degihati. Ee u kë seeka useei bunu da di peleikiwooko, nöö u musu tei dee buku dee woo paati da sëmbë ufö u ko a di peleikiwooko komakandi, sö taa wa a’ fu lasi ten te u musu hai go a di pisiwata ka woo peleiki.

¹¹ U musu ta seeka useei fuu ta dou wan tu miniti a fesi ufö di peleikiwooko komakandi bigi. Hii u tuu ta mbei möiti u dou fuuku a dee kemeente komakandi. A sa dë wan kakei soni te u dou lati a wan peleikiwooko komakandi. Unfa sö? Sömëni soni dë di di baaa di ta hoi di peleikiwooko komakandi ta luku ufö a paati dee peleikima. Ee wan tu peleikima nöö dë, nöö a sa manda hii de tuu go wooko a wan kamian di de bi wooko disa. Ee sëmbë dë a di peleikiwooko komakandi di na abi wagi, söseei ee di kamian ka de o go peleiki longi, nöö a sa buta de u wooko ku sëmbë di a’ wagi. Ee de musu wooko a wan pisiwata ka sëmbë ta du hia hogi, nöö a sa buta baaa u wooko ku dee sisa, nasö u wooko zuntu u de. De sa buta dee njunjun peleikima u wooko ku sëmbë di ta peleiki longi kaa. Ma ee dee peleikima ta dou lati, nöö di baaa di ta hoi di peleikiwooko komakandi o abi u toona paati dee sëmbë baka. A sa pasa taa u dou lati u di wan fanöudu soni bi tapa u. Ma ee hii juu u ta dou lati, nöö u musu hakisi u seei ee a ta pasa sö u di wa ta tei dee peleikiwooko komakandi u bigi, nasö u di wa ta seeka soni bunu a fesi.

12. Andi i musu hoi a pakisei ee i guwenti u mbei buka ku sëmbë u peleiki?

¹² Dee peleikima sa mbei buka ku wan sëmbë ufö di peleikiwooko komakandi bigi, nasö de sa mbei di baaa di ta hoi di peleikiwooko komakandi da de wan sëmbë u wooko makandi ku de. Ee i guwenti u mbei buka ku sëmbë u peleiki, an bi o dë wan bunu soni u ’hopo i hati’ da woto peleikima tu ö, ka fii ta wooko ku dee seei sëmbë hii juu ö? (2 Kol. 6:11-13). I bi o sa mbei buka ku wan njunjun peleikima u wooko ku ën fii heepi ën faa go a fesi a di fasi fa a ta lei sëmbë soni ö? (1 Kol. 10:24; 1 Tim. 4:13, 15). Haika bunu te de ta da i lai, söseei te de ta piki i naasë i musu bigi peleiki. Te di peleikiwooko komakandi kaba, nöö a bi o bunu u na tooka soni di de seti kaa, söseei a bi o bunu u go wantewante a di kamian ka woon peleiki.

13. Unfa dee peleikiwooko komakandi o mbei u feni wini te hiniwan fuu ta mbei möiti u du soni kumafa u musu du ën?

¹³ Dee 70 bakama u Jesosi di a bi manda go peleiki ’bi ta wai seei’ di de toona ko baka (Luk. 10:17). A musu u dë sö taa di peleikiwooko komakandi di Jesosi bi hoi ku de bi mbei taa soni bi waka bunu da de a di peleikiwooko. Sö nöö dee peleikiwooko komakandi dee u ta hoi a di ten aki sa mbei soni waka bunu da u a di peleikiwooko tu. Ee hiniwan fuu ta mbei möiti u du soni kumafa u musu du ën, nöö dee peleikiwooko komakandi o ta da u degihati, söseei dee o ta seeka u u du di peleikiwooko a wan bunu fasi, sö taa u sa du di wooko di u kisi u paaja di bunu buka u di Könuköndë „be hii sëmbë jei.”​—Mat. 24:14.