Wooko ku di ten fii a wan köni fasi a di peleikiwooko
A di diniwooko jaa u 2014 dee Jehovah Kotoigi peleiki 1.945.487.604 juu longi. Di soni aki ta lei gbelingbelin taa u dë kabakaba u du di kë u Jehovah hii juu! (Ps. 110:3; 1 Kol. 15:58) U di ’di ten u dë aki ko zuntu fu di goonliba kaba’, mbei a bi o möön bunu fuu wooko bunu ku di ten fuu u miti möön hia sëmbë a di peleikiwooko—1 Kol. 7:29.
Ee u kë wooko ku di ten fuu a wan köni fasi a di peleikiwooko, nöö u musu sa’ u fiti useei a di pisiwata ka u ta peleiki. Boo taa i bi guwenti peleiki wan juu nasö möön longi, ma ja ta miti na wan sëmbë, nöö an bi o möön bunu fii peleiki a wan woto juu ka joo sa miti sëmbë u? Na hii kamian dë di wan fasi. Ma tökuseei dee lai dee sikifi a basu aki sa heepi i fii wooko ku di ten fii a wan köni fasi sö taa ja ta „naki böö nango a sösö kamian”.—1 Kol. 9:26.
Te u nango peleiki da sëmbë a de pisi: Sömëni jaa kaa dee peleikima nango ta peleiki da sëmbë a de pisi a mamate. Ma u di sömëni sëmbë nango a wooko a mamate mbei a bi o möön bunu u go a de a sapate te de dë a wosu. Te woo go taanpu peleiki da sëmbë a sitaati nasö a kamian ka sëmbë ta wooko, nöö a bi möön bunu u du ën a didia.
Peleiki a kamian ka hia sëmbë ta waka pasa: Dee kemeente musu seti dee bukutafa ku dee bukuwagi a kamian ka hia sëmbë ta waka pasa, nöö de musu du ën a di pisiwata di di kemeente u de kisi u peleiki. (Luku di Wi Kownukondre diniwroko u baaimatu-liba u 2013 bld. 5.) Ee sëmbë an ta waka pasa sö hia möön a di kamian ka u bi guwenti u buta di bukutafa nasö di bukuwagi, nöö di Diniwooko komite sa seti soni u butëën a wan woto kamian ka hia sëmbë ta waka pasa.
Dee gobaka fuu ku dee sëmbë dee u ta lei soni u Bëibel: An bi o möön bunu fii go a dee gobaka fii ku dee Bëibel studie fii a dee juu dee i sabi taa ja ta miti hia sëmbë a wosu ö? Ee i guwenti u miti hia sëmbë a di peleikiwooko sata mamate, nöö an bi o möön bunu fii go a dee studie fii a sapate u? Te dee peleikima nango luku dee gobaka u de, nöö de sa go wante a dee studie u de dee ta libi a di pisiwata dë. A sö wan fasi woo sa du möön hia a di peleikiwooko.
Tuu taa u sa bigi konda dee juu fuu solanga u bigi peleiki da wan sëmbë, ma te u ta peleiki da möön hia sëmbë, nöö möönmöön woo ta dë waiwai. Ee i si taa ja ta miti sëmbë a mamate a di peleikiwooko, nöö pooba u go peleiki da de a wan woto juu. Begi Jehovah di „goon Masa”, faa tii i sö taa i sa wooko ku di ten fii a wan köni fasi a di peleikiwooko!—Mat. 9:38.