Wan njunjun fasi u peleiki di ta da piizii
1. Un degihati dee baaa ta da dee kemeente dee dë a kamian ka hia sëmbë ta waka pasa?
1 Dee baaa ta da dee kemeente dee dë a kamian ka hia sëmbë ta waka pasa, di degihati u seti soni u peleiki da dee sëmbë u di pisiwata dë. De sa seti wan tafa ku dee buku fuu nasö wan bukuwagi di i ta hai. Ee de o wooko ku di bukuwagi di i ta hai, nöö wan peleikima sa taanpu nasö sindo nëën bandja. Ma tu peleikima musu dë a di bukuwagi. Dee baaa ku sisa dee o kisi di gaandi u du di wooko aki, musu ta dë waiwai söseei de musu ta da dee sëmbë wan suti ko. Ee wan sëmbë ko taanpu ta luku dee buku a di bukuwagi, nöö wan u dee peleikima sa bigi wan takimakandi ku ën. Kande a sa taki taa: „I hakisi iseei wan daka kaa andi di Bëibel ta taki u di soni aki ö?” Wan nasö tu peleikima sa ta luku di bukuwagi, hii fa a di wan seei ten de ta du okasi peleiki tu.
2. Konda wan woto di ta lei fa a dë wan bunu soni u peleiki ku wan bukutafa nasö wan bukuwagi?
2 Di fasi u peleiki aki bi mbei baaa ku sisa feni sömëni njunjun Bëibel studie. Wan mujëë mii di bi nango a hei siköö bi kë sikifi soni u Jehovah Kotoigi, ma an bi sa feni wan Könuköndë zali. Di wiki nëën baka, hën a si di bukuwagi u dee Jehovah Kotoigi a di siköödjai. De bi bigi lei ën soni u Bëibel. Nöunöu a dë wan dopu sisa, nöö hënseei ta peleiki ku di bukuwagi tu.
3. Unfa so peleikima ta feni di njunjun fasi u peleiki aki?
3 Wan sisa di bi ta piizii u peleiki a di fasi aki, bi taki taa: „So sëmbë ta waka ko a di bukuwagi ko tei dee möön njunjun buku dee ko. So u dee sëmbë an bi jei soni u Jehovah Kotoigi wan daka. Mi ta si taa di njunjun fasi aki sa mbei u miti hia sëmbë.” Wan woto sisa bi taa: „Disi da wan njunjun fasi u peleiki di ta mbei i piizii seei, u di dee sëmbë seei ta waka ko a i. Nöö aluwasi na soni u Bëibel de kë ko sabi sö, tökuseei de ta gii u ko luku andi dëën.”
4. Faandi mbei a dë wan bunu soni u ta buta di bukutafa nasö di bukuwagi a di seei juu ku di wan seei kamian hiniwan wiki?
4 A dë wan bunu soni u ta buta di bukutafa nasö di bukuwagi a di seei kamian, a di wan seei daka, söseei a di wan seei juu hiniwan wiki. Di soni dë o mbei sëmbë ta si di bukutafa nasö di bukuwagi hii juu, nöö de o kë kö hakisi soni, nasö ko tei buku. Di kemeente fii seti soni u peleiki a di fasi aki ö? Wë ee de seti ën, nöö kandë i sa peleiki a di bunu fasi aki di o mbei i piizii, söseei di o heepi i u ’paaja di Buka, be sëmbë ko sabi di Njunjun Tii [Könuköndë, NW] u Masa Gadu.’—Luk. 9:60.