Tei lei a dee peleikima dee sa’ u du di peleikiwooko bunu

U ta wai seei ku dee peleikima u di kemeente dee sa’ u du di peleikiwooko bunu. So u de ta dini Jehovah sömëni jaa kaa ku hii de hati. Nöö wotowan ko sa’ u peleiki möön bunu a dee jaa dee pasa aki. Dee peleikima aki si fa Jesosi ta tii di kemeente a dee lasiti daka aki, u di a ta mbei di peleikiwooko ku di wooko u mbei sëmbë ko toon bakama fëën go a fesi seei (Mat. 28:19, 20). U di de ta du di peleikiwooko, mbei de kisi „di gaan kaakiti” di Gadu ta da sëmbë te de abi bookohedi ku te tesi ta miti de (2 Kol. 4:7). U sa lei sömëni soni a dee peleikima aki. De ta wai seei te de feni di okasi u lei wotowan dee soni di deseei bi lei (Ps. 71:18). Fëën mbei u musu suku okasi fuu tei lei a de. Unfa u sa du ën?

Te u dë a di diniwooko. Ee dee njunjun peleikima ku dee peleikima dee an sa’ u peleiki sö bunu jeti, kë ko sabi fa de musu peleiki möön bunu, nöö de musu kisi lei. De sa lei sömëni soni te de ta luku fa dee peleikima dee taanga a di biibi ta du di peleikiwooko. (Luku di woto „Mbei möiti u ta dë fajafaja a di peleikiwooko hii juu”, di dë a di Hei Wakitimawosu u 15 u bakajailiba u di jaa 2015. Luku di u dii palaklafu a basu u di hedi pakisei „Heepi njunjun peleikima”.) Un wini i bi feni di i bi peleiki ku dee peleikima aki?

Ja bi o kë hakisi wan u dee peleikima di sa’ u peleiki bunu fii ku hën wooko a di peleikiwooko u? Ee i si taa a gaandi nasö an sa waka, nöö kandë i sa ta tja wan u dee sëmbë dee i ta lei soni u Bëibel go nëën pisi, nöö i ku ën ta lei ën. Te un kaba, nöö i sa hakisi ën unfa a bi feni di fasi fa i bi hoi di studie, nöö un lai a bi o kë da i.

Mbei ten u ta du soni makandi ku de: Mbei ten u du soni makandi ku dee peleikima dee sa’ u du di peleikiwooko bunu, sö taa i sa ko sabi de möön bunu. Kai wan u de ko a di Wosudendu Dini fii, nöö buta hakisi dëën. Ee i si taa an sa waka, nöö kandë i sa seeka soni u go hoi di Wosudendu Dini nëën pisi. Hakisi ën unfa a du ko sabi di tuutuu lei. Un wini a feni? Unfa a si taa di wooko go a fesi a di kemeente? Un soni ta dëën piizii a di dini di a ta dini Jehovah?

Na suku hia a de poi. Leti kumafa hii u tuu abi tookatooka köni u du di peleikiwooko, sö nöö dee peleikima aki dee ta peleiki sömëni jaa kaa abi tookatooka köni u du di peleikiwooko tu (Lom. 12:6-8). So u de ko gaandi, nöö na hii juu de o sa ta du soni makandi ku u möön. Tökuseei u sa lei sömëni soni a de, u di de ta dini Jehovah sömëni jaa kaa ku hii de hati.