Unfa u sa du di diniwooko fuu möön bunu—Heepi dee njunjun peleikima

Faandi mbei a dë fanöudu: Dee sëmbë dee ko dë njunjun bakama u Jesosi musu lei u du „hii dee soni” dee Jesosi manda u fuu du. De musu ta lei sëmbë soni u di tuutuu lei (Mat. 28:19, 20). Sömëni u dee sëmbë aki dë a di Teokalasia-siköö kaa, nöö a sa dë sö taa de peleiki da dee famii u de nasö dee mati u de kaa. Ma te de bigi ta tei dee soni di de ta lei u bigi, söseei te de ko sabi taa Jehovah kë u hii sëmbë musu jei di bunu buka, nöö de o piki sëmbë taa de kë du di peleikiwooko tu (Lom. 10:13, 14). Te dee sëmbë aki ko toon peleikima di an dopu jeti, nöö di lei di woo lei de fa de musu peleiki, o heepi de u na fëëë te de o du di peleikiwooko.—Lukasi 6:40.

Fa u musu du ën:

Be di njunjun peleikima tei dee buku dee a o paati da sëmbë ku dee buku dee a o abi fanöudu te a o lei sëmbë. Lei ën andi ku andi i buta a di peleikiwooko tasi fii, nöö konda dëën faandi mbei i tja dee buku dee dë a di tasi fii.
I ku ën sa luku a baka u di Könuköndë diniwooko fuu fa u sa paati dee buku fuu, nöö un pooba u du ën makandi. Piki ën taa an dë faa taki hii soni kumafa a sikifi dë. I ku ën sa luku dee fasi fa u sa peleiki da sëmbë dee sikifi a bladsëidë 82 u di Diniwroko skoro-buku fuu, nöö un pooba dee fasi dee fiti ku di pisiwata ka un ta peleiki. Piki ën taa a dë fanöudu faa a bisi a wan fasi di fiti.—2 Kol. 6:3, 4.
Lei ën soni faa go a fesi. Lei ën unfa wan kaita u wan pisiwata ka u ta peleiki ta dë. Söseei lei ën unfa a musu wooko ku di pampia ka i ta sikifi dee nöbu u dee sëmbë dee an dë a wosu. Lei ën andi a musu sikifi u wan sëmbë di kë sabi möön soni. Lei ën unfa a sa peleiki ku di website fuu jw.org, ku di buku Goed nieuws voor mensen uit alle landen. Lei ën unfa a musu heepi wan sëmbë di kë sabi möön soni.—1 Kol. 3:6.
I musu abi pasensi, nöö ta gafëën tu (Nöng. 25:11). Be a si taa i ta du bunu soni, sö taa a sa kë djeesi i. Te i dë fajafaja, söseei te i ta lei ën taa i ta buta pakisei nëën, nöö di soni dë o heepi ën be hënseei ko dë fajafaja a dee jaa dee ta ko.

Pooba di soni aki di liba aki:

Peleiki makandi ku di sëmbë di i heepi ko toon wan peleikima. Tjëën go a wan gobaka nasö a wan studie fii. Ee ja abi wan sëmbë nöunöu di i heepi ko toon peleikima, nöö hakisi wan woto peleikima di an sa’ u peleiki sö bunu jeti, fii ku ën peleiki makandi.