Dee soni dee u abi ta lei sëmbë soni u Bëibel
1. Unfa Keesitu sëmbë di ta paaja di bunu buka dë kuma wan tëmbëma?
1 Wan tëmbëma ta wooko ku peipei wookolai te a ta tëmbë. A abi wookolai di a ta wooko ku de so juu te a ta du wan apaitiwooko, nöö a abi wotowan di a ta wooko ku de hibiwan daka. Hii juu a ta abi dee wookolai dee a ta wooko ku de hibiwan daka, nëën wooko tasi, nöö ku de a sa’ u wooko möön bunu. Di Bëibel ta da hii Keesitu sëmbë di degihati u dë kabakaba u du di peleikiwooko, söseei u dë wan sëmbë di ta ’wooko a wan fasi u sen an musu kisi ën a bakaten’ (2 Tim. 2:15). Andi da di möön fanöudu wookolai di u abi u lei sëmbë soni? Wë, hën da di Wöutu u Gadu. Hën da di möön fanöudu wookolai di u abi ta lei sëmbë soni u de „ko dë bakama” u Jesosi (Mat. 28:19, 20). Fëën mbei u musu mbei möiti fuu ko sa’ u wooko ku „di wöutu u Gadu ta lei ën leti kumafa a dë”. Ma woto fanöudu wookolai dë tu di u ta tei u lei sëmbë soni, nöö hii Keesitu sëmbë musu lei u ko sa’ u wooko ku de, u de sa lei sëmbë di tuutuu lei.—Nöng. 22:29.
2. Andi da dee fanöudu wooko lai dee u abi ta lei sëmbë soni u Bëibel?
2 Dee fanöudu wookolai dee u abi ta lei sëmbë soni u Bëibel: Boiti di wooko di u ta wooko ku di Bëibel u lei sëmbë soni, ku un woto wookolai u sa wooko möön? Di fosu wookolai di u abi ta lei sëmbë dee tuutuu lei u Bëibel da di buku Andi di Bëibel ta lei u tuutuu? Te u kaba lei wan sëmbë ku di buku aki, nöö u nango a di buku Meki Gado tan lobi yu, u lei ën unfa a musu ta libi ku dee mama wëti u Bëibel hiniwan daka. Fëën mbei u musu ko sa’ u wooko ku dee tu buku aki. U abi brochure tu, dee u ta tei u lei sëmbë soni. Di brochure Gadu abi bunu buka da u!, da wan u dee fanöudu wookolai di u ta tei u bigi wan Bëibel studie. Ee sëmbë di an ta lesi dë a di pisiwata ka u ta peleiki, nasö ee sëmbë dë di ta fan wan woto töngö, ma wa abi buku a di töngö dë nasö u abi wan tu nöö a di töngö dë, nöö u sa wooko ku di buku Haika Gadu nasö di buku Haika Gadu nöö joo libi u teego. Wan u dee wookolai dee u abi u heepi dee studie fuu u ko sabi di ölganisaasi fuu, da di buku Ambë ta du di kë u Jehovah a di ten aki? Wan tu u dee fëlön dee u abi u heepi sëmbë u ko dë bakama u Jesosi da, Faandi mbei u musu lei soni u Bëibel?, Andi de ta du a wan Könuköndë zali? ku Heeft God een naam? Nöö u musu lei u sa’ u wooko ku dee fëlön aki.
3. Andi dee soni dee o ko a Di Könuköndë diniwooko fuu o heepi u fuu du?
3 Dee soni dee o ko a Di Könuköndë diniwooko fuu, o heepi u fuu ko sa’ u wooko ku dee fanöudu soni dee u abi ta lei sëmbë soni u Bëibel. Te u ta mbei möiti u wooko ku dee wookolai aki a wan bunu fasi, hën da u ta wooko ku di lai di ta taki taa: „I musu ta mbei möiti nöömö be hii libi fii dë a tatai liba. Nöö di lei u Gadu di i ta lei sëmbë dë, hënseei musu dë a tatai liba tu e. I musu köni seei fu ja tookëën. Nöö te i ta libi sö kaa nöö joo puu i seei a hogi basu, i ku dee oto sëmbë dee ta haika i dë tuu.”—1 Tim. 4:16.