Lei sëmbë soni ku di Bunu buka-brochure
1. Na un fasi de mbei di Bunu buka-brochure?
1 A bi sikifi a Di Könuköndë diniwooko fuu u baimatu-liba taa wan u dee fanöudu wookolai dee u ta tei u lei sëmbë soni u Bëibel, da di brochure Gadu abi bunu buka da u! De an sikifi na wan pisi u dee Bëibel tëkisi a dee palaklafu, sö taa dee sëmbë sa lesi dee tëkisi dë a di Bëibel seei. Gaansë u dee buku fuu mbei a sö wan fasi taa wan sëmbë sa lei hënseei soni u Bëibel, ma di buku aki an mbei sö. A mbei a wan fasi taa wan sëmbë hën musu lei ën soni ku ën. Fëën mbei te woo paati di buku aki da sëmbë, u musu pooba u lei de unfa u ta lei sëmbë soni u Bëibel ku ën, sö taa deseei sa si taa a dë wan piizii soni u lei soni u di bunu buka di dë a Bëibel.—Mat. 13:44.
2. Unfa u sa wooko ku di Bunu buka-brochure te woo bigi peleiki da wan sëmbë di u miti di fosu pasi?
2 Te joo bigi peleiki da wan sëmbë di i miti di fosu pasi: Kandë i sa taki taa: „Wë mi ko a unu aki tide u di sëmbë ta hakisi deseei ee soni o go möön bunu a goonliba a di ten di ta ko. I si kuma soni o go möön bunu ö? [Da di sëmbë pasi faa piki.] Wë, di Bëibel ta konda bunu soni da u u di ten di ta ko. Luku so u dee hakisi di Bëibel ta piki.” Da di sëmbë di brochure, nöö piki ën taa a sa luku undi u dee hakisi dee dë a baka u di brochure a bi o kë feni piki fëën. Baka di dë, i ku ën sa luku di fosu palaklafu u di woto di nama ku di hakisi dë, u lei ën unfa u ta lei sëmbë soni u Bëibel. Wan woto soni di i sa du, hën da i sa buta wan hakisi dëën di iseei tei puu a wan u dee woto u di brochure. Nöö lei ën unfa di brochure sa heepi ën u feni di piki a Bëibel. Ee wan fëlön dë a jw.org di nama ku di woto dë, nöö so peleikima ta pëë ën da di sëmbë.
3. Konda unfa u sa lei wan sëmbë soni ku di Bunu buka-brochure.
3 Andi i musu du te joo lei di sëmbë: (1) Lesi di hakisi di sikifi möön baaka u heepi di sëmbë u buta pakisei a dee möön fanöudu soni u di woto. (2) Lesi di palaklafu di dë a di hakisi basu. (3) Lesi dee Bëibel tëkisi dee sikifi tombitombi, nöö buta hakisi da di sëmbë di o heepi ën faa si fa di Bëibel ta piki di hakisi di sikifi möön baaka. (4) Ee wan woto palaklafu dë a di hakisi dë basu, nöö du dee seei soni dee sikifi a nöbu 2 ku nöbu 3. Ee wan fëlön dë di nama ku di hakisi, nöö i sa pëë ën da di sëmbë. (5) Te un kaba taki u wan hakisi, nöö mbei di sëmbë toona piki di hakisi fii luku ee a fusutëën bunu.
4. Andi o heepi u fuu sa lei sëmbë soni ku di buku aki a wan bunu fasi?
4 Mbei möiti u ko sabi andi sikifi a di buku aki. Wooko ku ën a hiniwan okasi ka i si taa i sa wooko ku ën. Ufö i go lei wan sëmbë, i musu pakisei a fesi unfa i sa heepi di sëmbë. Söseei i musu pakisei a fesi un tëkisi joo tei u fan ku ën u heepi ën faa fusutan di soni di i kë lei ën (Nöng. 15:28; Tjab. 17:2, 3).Te i ko sa’ u wooko ku di brochure aki, joo lobi ën seei. A o dë wan u dee brochure di joo ta kë tei u lei sëmbë soni u di tuutuu lei!