Djeesi dee tjabukama—Habaki
1. Faandi mbei u sa fusutan unfa di tjabukama Habaki bi ta fii?
1 A hii së u goonliba hogidu ta ko möön hia, nöö u sa fii kuma Habaki, di a bi hakisi Jehovah taa: „Faandi mbei i ta mbei mi ta si hogi soni sö? Faandi mbei i ta dë piii ta luku fa sëmbë ta du hogi?” (Hab. 1:3; 2 Tim. 3:1, 13) Te u ta pakisei fundu u dee soni dee Habaki bi taki, ku fa a bi hoi hënseei a Jehovah, nöö woo sa hoi useei a Jehovah tu, hii fa u dë ta wakiti di daka fëën di a o kuutu sëmbë.—2 Pet. 3:7.
2. Unfa u sa lei taa u abi biibi?
2 I musu abi biibi: Habaki bi ta dini Jehovah fajafaja, ka faa bi go sindo ta booko hën hedi ku dee hogi soni dee bi ta pasa (Hab. 2:1) Jehovah bi piki Habaki taa dee soni dee a bi mbei a taki bi o pasa a di soifi ten, söseei taa „di sëmbë di libi a wan leti fasi o dë a libi u di a abi biibi” (Hab. 2:2-4). Andi di soni dë kë taki da dee Keesitu sëmbë dee ta libi a dee lasiti daka aki? Wë a kë taki taa di möön fanöudu soni na u de sabi na un ten di kaba o ko, ma u de dë seiki taa a o ko. Te u abi biibi, nöö woo dë ku wojo, söseei woo buta di diniwooko fuu a di fosu kamian a u libi.—Heb. 10:38, 39.
3. Faandi mbei wa musu lasi di piizii di u ta piizii u di u ta dini Jehovah?
3 Ta piizii u di i ta dini Jehovah: Te Gögi u Magögi o ko feti ku dee sëmbë u Jehovah, nöö di biibi fuu o kisi tesi (Eze. 38:2, 10-12). Te feti ta feti, nöö a ta tja fuka ko. A ta tja fuka ko da dee sëmbë dee wini seei tu. A sa tja hangi pena ko, nöö sëmbë sa lasi dee soni di de bi abi, söseei sëmbë an o sa libi kumafa de bi guwenti u libi möön. Andi woo du te di libi bigi ta taanga da u? Habaki bi sabi taa di libi bi o ko taanga dëën, ma tökuseei an bi kë na wan soni ko poi di piizii di a bi ta piizii u di a bi ta dini Jehovah (Hab. 3:16-19). „Di piizii di Jehovah ta da sëmbë” o heepi u fuu hoi dou te tesi miti u.—Neh. 8:10; Heb. 12:2.
4. Andi sa tja piizii ko da u nöunöu kaa, söseei a di ten di ta ko?
4 Dee sëmbë dee Jehovah o tjubi u pasa di daka fëën di a o kuutu sëmbë, o ta lei nango nöömö u libi a di fasi di ta kai ku Gadu (Hab. 2:14). Dee sëmbë dee o ko a libi baka seei o lei soni u Jehovah tu. Boo tei hii okasi nöunöu kaa, u konda soni u Jehovah ku dee foombo soni dee a ta du, da sëmbë!—Ps. 34:1; 71:17.