Buta futoou a Jehovah be i feni libi!

1. Faandi mbei hii u tuu abi kötöhati fanöudu?

HII u tuu abi kötöhati fanöudu. Kandë u abi te a hia fuka, kandë soni an ta waka kumafa u kë, nasö kandë soni ta da u bookohedi. Kandë u ta tja fuka u di u dë ku wan siki, u di u ta ko gaandi, nasö u di wan sëmbë di u lobi ko lasi libi. Sëmbë ta libi hogi ku so fuu. Boiti di dë, möönmöön sëmbë ta du hogi ku wotowan. Di „tumisi hogi ten” di u dë nëën aki, ta mbei u si taa u ta libi tuutuu a dee „lasiti daka u di goonliba aki”, söseei taa daka fu daka u ta ko möön zuntu ku di ten ka woo libi a di njunjun goonliba (2 Timoteo 3:1). Ma hii fa di soni aki dë sö, tökuseei a sa kan taa u ta wakiti longi u Jehovah du dee soni dee a paamusi u, nöö kandë möönmöön di libi ta ko taanga da u. Wë nöö naasë u sa feni kötöhati?

2, 3. (a) Andi ku andi u sabi u Habaki? (b) Faandi mbei woo taki soni u di buku Habaki?

² Boo luku andi di buku Habaki ta taki, fuu ko sabi naasë u sa feni kötöhati. Hii fa di Bëibel an ta konda hia soni u Habaki da u, tökuseei di buku di a sikifi ta da u taanga seei. Di në Habaki, kë taki „baasa”. U sa taki taa di soni aki dë kuma Jehovah ta baasa dee dinima fëën u di a lobi de, nasö a dë kuma dee dinima u Jehovah ta panjëën hoi kuma te wan mii ta panjan hën tata hoi u di a ta futoou ën. Habaki bi hakisi Jehovah wantu soni. Jehovah bi mbei Habaki sikifi dee soni aki buta a Bëibel u di a bi sabi taa u bi o sa feni wini u dee soni dë.​—Habaki 2:2.

³ Dee soni dee Habaki bi hakisi Jehovah ku dee soni dee Jehovah bi piki ën nöö u sabi u Habaki. Ma di buku di Habaki sikifi, da wan u dee pisi u di „Buku u Gadu” di Gadu bi mbei sëmbë sikifi, nöö „te u lesi fa dee sëmbë u fesiten bi abi degihati ta hoi pasensi, nöö a ta da u degihati tu fuu hoi dou ta luku dee soni dee Gadu bi paamusi u taa de o pasa nöömö” (Loomë 15:4). Unfa di buku Habaki sa heepi hiniwan fuu? Wë di buku aki sa heepi u fuu ko sabi andi u musu du u lei taa u ta futoou Jehovah. Di buku aki ta lei u tu taa aluwasi un fuka ta miti u, tökuseei u sa ta dë bööböö.

BEGI JEHOVAH

4. Faandi mbei Habaki bi ta booko hën hedi?

⁴ Lesi Habaki 1:2, 3. Habaki bi ta libi a wan hogi pisiten. Dee sëmbë u di ten fëën bi abi hogihati, söseei de bi ta du hogi ku wotowan. Nöö di soni aki bi mbei Habaki tjali gaanfa seei. A hii së dee Isaëli sëmbë bi ta du hogi ku deseei. Habaki bi ta hakisi hënseei taa: ’Na un ten di hogidu aki o kaba? Faandi mbei Jehovah ta wakiti longi sö ufö a du wan soni?’ Habaki bi fii bookosaka seei. Fëën mbei a bi begi Jehovah faa du wan soni. Kandë Habaki bi bigi ta pakisei taa Jehovah an bi ta booko hën hedi ku dee sëmbë fëën möön, nasö taa an bi o du wan soni. I bi fii sö wan daka kaa u?

5. Andi u sa lei a di buku Habaki? (Luku di peentje a bigi u di woto.)

⁵ Habaki bi ta hakisi hënseei dee soni aki u di an bi ta futoou Jehovah möön u, söseei u di an bi ta biibi möön taa Jehovah bi o du dee soni dee a bi paamusi de u? Na seei! Habaki bi ta hakisi Jehovah faa heepi ën faa ko fusutan dee soni dë, söseei faa heepi ën ku dee fuka fëën. Di soni aki ta lei taa Habaki bi ta futoou Jehovah jeti. Wë u ta si taa Habaki bi ta booko hën hedi u di an bi ta kaba fusutan faandi mbei sömëni hogi soni bi ta pasa. An bi sa fusutan faandi mbei Jehovah an bi hopo du wan soni jeti, söseei an bi sa fusutan faandi mbei Jehovah bi ta disëën faa tja fuka. Di mbei di Jehovah bi mbei Habaki sikifi soni u dee bookohedi fëën buta a di Bëibel, ta lei u wan fanöudu soni. A ta lei u taa wa musu fëëë u piki Jehovah andi da dee bookohedi fuu, söseei wa musu ta fëëë u piki ën te wa ta kaba fusutan wan soni. Hën da ee fuu taki ën, nöö Jehovah kë fuu ta begi ën nöö u konda hii soni di dë a u hati dëën (Psalöm 50:15; 62:8). Nöngö 3:5 ta piki u taa: „Buta futoou a Jehovah ku hii i hati. Na buta futoou a iseei.” Di soni aki Habaki bi ta du.

6. Faandi mbei a dë fanöudu fuu ta begi?

⁶ Habaki bi ta futoou Jehovah. Jehovah bi dë hën mati, nöö a bi dë hën Tata tu. Nöö Habaki bi ta mbei möiti fu hën ku Jehovah ko dë möön gaan mati. Habaki an bi ta booko hën hedi ku dee fuka fëën nöö, söseei an bi du soni kumafa a kë u puu hënseei a di fuka dë. Ma a bi begi piki Jehovah hii soni di bi dë nëën hati. Di soni aki da wan soni di useei sa ta du tu. Jehovah da di Sëmbë di ta haika begi, nöö a kë fuu konda hii dee fuka fuu dëën. Ee u ta du di soni aki, nöö woo lei taa u ta futoou ën (Psalöm 65:2). Te u ta du di soni aki, nöö woo si tu unfa Jehovah o ta piki dee begi fuu. Woo ta fii te a o ta da u kötöhati, ku te a o ta tii u (Psalöm 73:23, 24). Aluwasi un fuka ta miti u, Jehovah o heepi u fuu ko fusutan unfa hën a ta si di fuka dë. Wan u dee möön bunu fasi fa u ta lei taa u ta futoou Jehovah, hën da te u ta konda dee fuka fuu dëën.

PIKI JEHOVAH BUKA

7. Andi Jehovah bi du di Habaki bi konda dee fuka fëën dëën?

⁷ Lesi Habaki 1:5-7. Baka di Habaki bi konda dee fuka fëën da Jehovah, nöö kandë a bi ta pakisei unfa Jehovah bi o piki ën. U di Jehovah da wan lobihati Tata, mbei a bi fusutan unfa Habaki bi ta fii. Jehovah bi sabi taa a bi ta tja fuka, söseei taa a bi ta suku heepi nëën. Fëën mbei an bi bë wojo dëën, ma a bi piki ën andi a bi o du ku dee Dju dee an bi ta hoi deseei nëën. A sa kan taa Habaki bi dë di fosu sëmbë di Jehovah bi piki taa an bi o tei longi möön, nöö a bi o sitaafu dee sëmbë dë.

8. Faandi mbei Habaki an bi pakisei taa Jehovah bi o piki ën di soni di a bi piki ën?

⁸ Jehovah bi piki Habaki taa a bi dë kabakaba u du wan soni. A bi o sitaafu dee hogihati sëmbë u Juda. Jehovah bi taki taa di soni aki bi o pasa „a di ten fuunu”. Hën da de bi o kisi sitaafu a di ten di Habaki bi o dë a libi jeti, nasö a di ten u dee woto sëmbë dee bi dë a libi a di ten fëën. Habaki an bi pakisei taa Jehovah bi o piki ën sö wan soni. Dee Kalideja sëmbë nasö dee sëmbë u Babilon, bi abi hogihati. De bi ta libi hogi möön dee sëmbë u Juda dee bi sabi dee wëti u Jehovah, ma dee an bi ta hoi de. Ma faandi mbei Jehovah bi o mbei dee hogihati sëmbë aki sitaafu dee sëmbë fëën? Di soni aki bi o mbei dee sëmbë u Juda tja möön fuka.a (Luku di pisi a basu.) Unfa i bi o fii ee i bi dë Habaki?

9. Un woto soni Habaki bi hakisi Jehovah?

⁹ Lesi Habaki 1:12-14, 17. Hii fa Habaki bi fusutan taa Jehovah bi o mbei dee sëmbë u Babilon sitaafu dee hogihati sëmbë u Juda, tökuseei Habaki an bi kaba fusutan hii soni. Ma a bi abi sakafasi, nöö a bi dë kabakaba u buta futoou a Jehovah go dou. A bi taki seei taa Jehovah bi dë kuma wan „Gaan Sitonu” dëën (Detolonomi 32:4; Jesaaja 26:4). Habaki bi sabi taa Jehovah da wan lobihati Gadu, söseei taa a abi sutifasi. Fëën mbei an bi ta fëëë u hakisi Jehovah dee woto soni dee a bi kë hakisi ën. Soni kuma: Faandi mbei Jehovah bi o da pasi taa soni ko möön hogi a Juda, nasö u dee sëmbë fëën tja möön hia fuka? Faandi mbei an ta du wan soni wantewante? Faandi mbei di Sëmbë di abi hii makiti, ta „dë piii ta luku” fa sëmbë ta du hogi? Wë Jehovah da di „Santa wan”, nöö ’dee wojo fëën limbo tumisi faa sa ta luku fa sëmbë ta du hogi’.

10. Andi sa mbei u fii kumafa Habaki bi ta fii?

¹⁰ A sa kan taa u sa ta fii kumafa Habaki bi ta fii. U ta piki Jehovah buka, u ta futoou Jehovah, söseei u ta lei soni a di Wöutu fëën. Dee soni aki ta taanga di biibi fuu. Di ölganisaasi u Jehovah ta mbei u ko sabi andi Jehovah o du da u a di ten di ta ko. Ma kandë u ta hakisi useei taa: ’Na un ten dee fuka fuu o kaba?’ Wë di soni di Habaki bi du bakaten sa heepi u fuu fusutan di soni aki.

WAKITI BE JEHOVAH DU WAN SONI

11. Andi Habaki bi dë kabakaba u du?

¹¹ Lesi Habaki 2:1. Baka di Habaki bi fan ku Jehovah, hën a bi feni kötöhati. Di begi di a begi Jehovah bi heepi ën faa dë kabakaba u wakiti be Jehovah du wan soni. Habaki bi taki taa: „Mi o dë pii, hii fa mi o ta wakiti di daka ka gaan fuka o dë” (Habaki 3:16). Woto dinima u Gadu bi ta wakiti Gadu ku pasensi faa du wan soni da de tu. Di woto u de ta da u degihati. De ta lei u taa useei sa wakiti Jehovah tu.​—Mika 7:7; Jakobosi 5:7, 8.

12. Andi u sa lei u Habaki?

¹² Andi u sa lei a di dë di Habaki bi dë kabakaba u wakiti Jehovah? Di fosu soni di u ta lei, hën da hii juu u musu ta fan ku Jehovah, aluwasi un fuka u abi. Di u tu soni da, u musu ta haika andi Jehovah ta piki u a di Wöutu fëën, söseei u musu ta du dee soni di di ölganisaasi fëën ta piki u fuu du. Di u dii soni da, u musu ta wakiti ku pasensi be Jehovah du wan soni, nöö u musu biibi taa a o heepi u ku dee fuka fuu, a di ten di a si taa bunu. Ee u ta du dee soni aki kumafa Habaki bi ta du de, nöö woo feni kötöhati, söseei woo sa hoi dou. Di pakisei di woo ta pakisei unfa soni o dë a di ten di ta ko o heepi u fuu wakiti ku pasensi, söseei fuu dë waiwai, aluwasi un fuka u abi. U dë seiki taa di Tata fuu di dë a liba ala o hopo du wan soni.​—Loomë 12:12.

13. Unfa Jehovah bi da Habaki kötöhati?

¹³ Lesi Habaki 2:3. U sa dë seiki taa Jehovah bi ta wai seei taa Habaki bi wakiti ën faa du wan soni. Di Sëmbë di abi hii makiti bi sabi unfa Habaki bi taa fii. Fëën mbei a bi da di tjabukama fëën kötöhati, söseei a wan lobihati fasi a bi piki ën taa a o du wan soni. An bi o tei longi möön ufö Habaki kumutu a di fuka dë basu. A bi dë kuma Jehovah bi ta piki Habaki taa: „Hoi pasensi, nöö buta futoou a mi. Mi o piki di begi fii aluwasi a sa djei kuma a ta tei longi.” Jehovah bi toona mëni Habaki taa a bi buta kaa na un ten a bi o du dee soni dee a bi paamusi ën. Fëën mbei a bi da Habaki taanga faa wakiti ën ku pasensi, u di te u kaba fëën, Habaki bi o ta wai.

14. Andi u musu dë kabakaba u du te fuka ta miti u?

¹⁴ Useei musu ta wakiti Jehovah faa du wan soni. U musu ta piki ën buka tu. Te u ta du di soni aki, nöö woo ta futoou ën, söseei woo feni kötöhati aluwasi un pei fuka ta miti u. Jesosi bi taki taa wa musu ta booko u hedi poi fuu ko sabi „di daka ku di juu” di Jehovah o du dee soni dee a paamusi u (Tjabukama 1:7). U musu abi di futoou taa Jehovah sabi andi da di möön bunu ten u du wan soni. Fëën mbei u musu hoi dou, u musu abi sakafasi, u musu abi pasensi, söseei u musu buta futoou a Gadu. Hii fa u ta wakiti Jehovah, u musu wooko ku di ten fuu a wan köni fasi, söseei u musu dini Jehovah ku hii u hati.​—Maikusi 13:35-37; Galasia 6:9.

JEHOVAH TA DA DEE SËMBË DEE TA FUTOOU ËN LIBI

15, 16. (a) Un soni di Gadu paamusi u u sa feni a di buku Habaki? (b) Andi dee soni dee Gadu paamusi u ta lei u?

¹⁵ Jehovah paamusi u taa „di sëmbë di ta du soni a wan leti fasi o libi u di a abi biibi”, nöö „hii sëmbë o ko sabi unfa Jehovah waiti tjika” (Habaki 2:4, 14). Jehovah ta paamusi dee sëmbë dee ta wakiti ën ku pasensi, söseei dee sëmbë dee ta buta futoou nëën taa de o libi u teego.

¹⁶ Di soni di Jehovah taki a Habaki 2:4 dë wan gaan fanöudu soni. Fëën mbei apösutu Paulosu bi toona sikifi ën dii pasi a dee biifi fëën! (Loomë 1:17; Galasia 3:11; Hebelejën 10:38) U sa dë seiki taa ee u ta buta futoou a Jehovah aluwasi un fuka ta miti u, nöö woo sa si di ten ka Jehovah o du hii dee soni dee a paamusi u. Jehovah kë fuu ta buta pakisei a dee soni dee a o du da u a di ten di ta ko.

17. Andi Jehovah ta paamusi u taa a o du da u ee u ta futoou ën?

¹⁷ U dee sëmbë dee ta libi a dee lasiti daka u di goonliba aki, ta lei wan fanöudu soni a di buku u Habaki. Jehovah ta paamusi dee sëmbë dee ta buta futoou nëën taa a o da de teego libi. Fëën mbei boo lei taa u ta futoou Jehovah möönmöön, aluwasi un fuka nasö un booko hedi u abi. Di soni di Jehovah bi piki Habaki ta mbei u dë seiki taa Jehovah o heepi u, söseei taa a o tjubi u. Jehovah kë fuu futoou ën, söseei fuu wakiti ën ku pasensi u di a buta wan ten kaa, ka di Könuköndë fëën o tii di goonliba. A di ten dë, hii sëmbë a goonliba o ta dë waiwai, söseei de o ta libi fiifii ku deseei ta dini Jehovah makandi.​—Mateosi 5:5; Hebelejën 10:36-39.

BUTA FUTOOU A JEHOVAH, NÖÖ BE HATI FII DË KU PIIZII

18. Unfa dee soni dee Jehovah bi taki bi heepi Habaki?

¹⁸ Lesi Habaki 3:16-19. Di soni di Jehovah bi piki Habaki bi bigi dëën seei. Habaki bi pakisei fundu u dee soni dee Jehovah bi du da dee sëmbë fëën a di ten di pasa. A bi ko möön buta futoou a Jehovah. A bi dë seiki taa an bi o tei longi möön ufö Jehovah bi o du wan soni! Di soni aki bi kötö di tjabukama aki hati, hii fa a bi sabi taa a bi o tja fuka wan pisi ten jeti. Habaki bi dë seiki taa Jehovah bi o du wan soni. A bi ta biibi taa Jehovah bi o heepi ën. Di soni di a bi taki a vers 18 da wan u dee möön gaan soni di sëmbë sikifi, di ta lei unfa de bi ta futoou Jehovah tjika. So sëmbë di ta öndösuku soni u Bëibel ta biibi taa di soni di sikifi a di tëkisi aki kë taki: „Mi o ta djombo ta piizii u Masa hedi. Mi o baja u di mi lobi Gadu.” Wan fanöudu soni seei u ta lei a di soni aki! Na paamusi nöö Jehovah paamusi u taa a o mbei soni waka bunu da u a di ten di ta ko, ma a ta piki u tu taa abiti möön a o mbei dee soni dee a taki, pasa tuutuu.

19. Unfa u sa feni kötöhati a Jehovah kumafa Habaki bi feni kötöhati nëën?

¹⁹ U ta lei wan gaan fanöudu soni a di buku Habaki. U ta lei nëën taa u musu ta futoou Jehovah (Habaki 2:4). Ee u kë ta futoou Jehovah, nöö u musu mbei möiti fuu ko dë möön gaan mati fëën. U musu ta du dee soni aki: (1) U musu ta begi Jehovah, ta konda hii dee fuka fuu dëën. (2) U musu ta buta hii u pakisei a dee soni dee a ta piki u a di Wöutu fëën, söseei u musu ta du dee soni di di ölganisaasi fëën ta piki u fuu du. (3) U musu ta futoou ën, nöö u musu ta wakiti ku pasensi u te Jehovah du dee soni dee a paamusi u. Di soni aki Habaki bi du. Hii fa a bi dë ku sömëni bookohedi di a bi ta fan ku Jehovah, tökuseei te u kaba fëën, a bi feni taanga, nöö a bi ko dë waiwai baka! Ee u ta djeesi Habaki, nöö useei o fii taa Jehovah di Tata fuu di dë a liba ala, dë ku u. A o dë kuma u ta fii fa a ta baasa u duuu sö. Soni an dë a di goonliba aki di sa da u kötöhati kuma di soni aki.