Ambë ku ambë mi o kai?

Hiniwan jaa u ta mbei hii möiti u kai dee sëmbë u di pisiwata ka u ta peleiki u de ko mëni di dëdë u Jesosi makandi ku u. Gaansë u de da sëmbë di wa sabi. Ma u musu kai sëmbë di u sabi tu. Dee sëmbë dee feni wan pampia u wan baaa nasö wan sisa di de an kaba sabi sö bunu, sa ko mëni di dëdë u Jesosi ku u (yb08-O bld. 11 pal. 3; bld. 14 pal. 1) Ambë ku ambë i sa kai?

• Dee famii fii

• Dee sëmbë dee i ku de ta wooko a di wan kamian nasö dee mii dee i ku de nango a di wan siköö

• Dee sëmbë dee i ku de ta libi a di wan pisiwata

• Dee gobaka fii, dee sëmbë dee i bi ta lei soni u Bëibel ku dee i ta lei soni u Bëibel

Boiti di dë, dee gaanwomi o go kai dee baaa ku dee sisa dee an ta peleiki möön nasö dee an ta ko a komakandi möön. Ma unfa a dë ee wan u dee sëmbë di i kai an ta libi a di pisiwata fii? I sa suku di juu ku di kamian ka de o mëni di dëdë u Jesosi a di pisiwata ka a ta libi. Go a di pisi AMBË DA U? di dë a di jw.org website fuu, nöö go a di pisi „Mëni di dëdë u Jesosi”. Te i ta tei seeka u mëni di dëdë u Jesosi di jaa aki, nöö pakisei dee sëmbë dee i sa kai, nöö baka di dë, tja wan u dee pampia di u ta paati u kai sëmbë go da de.