Unfa i sa wooko ku di pisi „Fasi fa u sa bigi wan takimakandi”?

Sensi jailiba u di jaa 2018, hën u ta si di pisi „Fasi fa u sa bigi wan takimakandi” a di kafiti u di Di libi ku di diniwooko fuu kuma Keesitu sëmbë​—Komakandi-buku. Unfa u sa wooko ku de?

Te joo hoi wan pisi: I musu wooko ku di hakisi, di tëkisi, ku di hakisi fii sa toona go baka, di dë a di pisi „Fasi fa u sa bigi wan takimakandi”. Ma an dë fii taki dee seei soni dee dë a di fëlön u di pisi dë. I sa du ën kuma i dë a wan woto kamian, i sa bigi wan woto fasi, nasö i sa du woto soni tu. I sa da di sëmbë wan u dee buku di u ta lei sëmbë soni u Bëibel tu, aluwasi de an sikifi ën buta a di pisi di i musu hoi.

Te i dë a di peleikiwooko: Di pisi „Fasi fa u sa bigi wan takimakandi” ta lei u unfa u sa peleiki. Ee wan sëmbë kë sabi möön soni, nöö i sa fan ku ën go dou, kandë i sa taki u di woto pisi „Fosu pasi di joo gobaka” ku ën wante. I sa tooka wantu soni a di takimakandi u di pisi „Fasi fa u sa bigi wan takimakandi”, nasö i sa taki u wan hii woto soni. Kandë i sa wooko ku wan u dee takimakandi u wan u dee liba dee pasa nasö ku wan woto tëkisi di o möön dou dee sëmbë hati. Dee sëmbë u di pisiwata ka i ta peleiki ta kë taki u soni di an pasa so longi jeti ö, nasö u wan soni di ko a njunsu a di köndë fii ö? Aluwasi na un fasi i kë wooko ku di pisi „Fasi fa u sa bigi wan takimakandi”, tökuseei di maaka fii musu dë taa i kë „du hii soni u di bunu buka hedi, sö taa i sa paati ën ku wotowan”.​—1Ko 9:22, 23.