Unfa i sa heepi baka te wan gaan hogi pasa?

Gaan hogi ta pasa hiahia a di ten aki. Te wan gaan hogi pasa, nöö a dë fanöudu u soni seeka bunu, u dee sëmbë di di hogi miti sa feni di heepi di de abi fanöudu. Fëën mbei, dee baaa u di Tii Kulupu seeka soni u hiniwan bëikantoo abi baaa di ta tei fesi te wan gaan hogi pasa.

Te dee baaa aki jei taa wan gaan hogi pasa, nöö de ta bëli dee gaanwomi u di pisiwata dë wantewante u de sa sabi un heepi dee peleikima abi fanöudu. Ee di soni hogi tee taa dee gaanwomi u di pisiwata dë an sa heepi dee peleikima, nöö dee baaa u di bëikantoo o manda woto baaa go, u go heepi. Dee baaa aki sa hakisi woto baaa ku sisa di dë kabakaba u heepi u da wan maun, nasö u da soni di dee sëmbë di di gaan hogi miti abi fanöudu, nasö de o bai soni manda da de.

A ta tja hia wini ko te u ta du soni a di lö fasi aki. Te sëmbë an ta hopo du soni kumafa deseei kë, nöö an o pasa taa de toona go du wan wooko di bi du kaa, söseei soni an o waka buujabuuja. A sö wan fasi de an o lasi hia möni ku woto soni.

Dee baaa di di bëikantoo buta u heepi te wan gaan hogi pasa, o luku un hia möni ku un hia sëmbë o dë fanöudu u heepi. De sa suku heepi a lanti u di köndë, sö taa dee baaa ku dee sisa sa feni di heepi di de abi fanöudu möön hesi. Fëën mbei, ja musu biinga pii möni nasö biinga manda soni go da dee baaa ku dee sisa, nasö biinga go a di kamian ka di hogi pasa, ee dee baaa an manda i.

Te wan gaan hogi pasa, nöö u kë heepi (Heb 13:16). U lobi dee baaa ku dee sisa fuu! Andi u sa du? Di möön fanöudu soni, hën da u sa begi da dee baaa ku dee sisa dee ta libi a di kamian ka di gaan hogi pasa, söseei da dee sëmbë dee go heepi. Söseei u sa da möni u heepi ku di wooko di ta du a hii së u goonliba. U di dee bëikantoo ta wooko makandi ku dee baaa u di Tii Kulupu, mbei de sabi andi da di möön bunu fasi fa de sa wooko ku dee möni dee u ta da. Nöö ee u bi o kë go heepi te wan gaan hogi pasa, nöö u sa fuu di DC-50 pampia.

LUKU DI FËLÖN DI GAAN WATA DI BI KO A BALAZILIKÖNDË, NÖÖ BAKA DI DË, PIKI DI HAKISI AKI:

Andi i lobi u di fasi fa dee Jehovah kotoigi bi heepi di di gaan wata bi ko a Balaziliköndë a di jaa 2020?