Heepi wotowan u de hoi dou te soni ta taanga da de

1. Unfa Jehovah lo’ u piki dee begi u dee dinima fëën?

I BI sabi taa Jehovah sa tei i fii heepi wan sëmbë di ta begi ën fajafaja faa heepi ën u? A sa tei i fii du ën aluwasi ee i dë wan gaanwomi, wan dinai, wan sëmbë di ta du di pioniliwooko, nasö wan peleikima a di kemeente. A sa tei i fii du ën tu aluwasi ee i njönku nasö i ko gaandi kaa, nasö aluwasi ee i dë wan baaa nasö wan sisa. Te wan sëmbë di lobi Jehovah ta begi ën faa heepi ën, nöö a lo’ u tei dee gaanwomi ku woto dinima fëën di ta hoi deseei nëën, u de da di sëmbë „degihati” (Kol. 4:11). U ta wai seei taa u sa du soni da Jehovah ku dee baaa ku dee sisa fuu a di lö fasi dë! U sa du sö te wan siki ko di ta paaja, te wan gaan ventu nasö wan gaan wata ko, nasö te sëmbë ta du ku dee baaa ku dee sisa fuu.

HEEPI WOTOWAN TE WAN SIKI KO DI TA PAAJA

2. Faandi mbei a sa taanga da u fuu heepi wotowan te wan siki ko di ta paaja?

² Te wan siki ko di ta paaja, nöö a sa taanga da u fuu heepi wotowan. Kandë u bi o kë go luku dee mati fuu a de pisi, ma an bi o dë wan köni soni u du sö. Kandë u bi o kë kai baaa ku sisa di a ta taanga da a möni së, u de ko njan makandi ku u, ma di dë seei wa sa du tu. Kandë u bi o kë heepi wotowan, ma a sa taanga da u ee dee sëmbë fuu seei abi heepi fanöudu tu. Hii fa a dë sö, tökuseei u kë heepi dee baaa ku dee sisa fuu, nöö Jehovah ta wai ku u te a si taa u ta du andi u sa du u heepi de (Nöng. 3:27; 19:17). Wë nöö andi u sa du?

3. Andi u ta lei u di fasi fa dee gaanwomi u di kemeente ka Sisa Desi dë, bi du soni? (Jelemia 23:4)

³ Soni di dee gaanwomi sa du. Ee i da wan gaanwomi, nöö mbei möiti fii ko sabi dee baaa ku dee sisa fii möön bunu. (Lesi Jelemia 23:4.) Wan sisa de kai Desi, di u bi taki soni fëën a di woto di pasa, bi taki taa: „Hii juu dee gaanwomi u di peleikiwooko kulupu ka mi dë, ta peleiki ku mi ku dee wotowan a di peleikiwooko, söseei de ta ko ku u te u ta du soni u mbei piizii.”b Di soni aki bi mbei taa an bi taanga da dee gaanwomi u heepi Desi di di kolona siki ko, söseei di di siki aki bi kii so u dee sëmbë fëën.

4. Faandi mbei dee gaanwomi bi sa heepi Sisa Desi, nöö andi u sa lei a di soni dë?

⁴ Desi bi taki taa: „U di mi ku dee gaanwomi bi dë mati kaa, mbei an bi taanga da mi u mi piki de unfa mi bi ta fii ku andi bi ta toobi mi.” Andi dee gaanwomi sa lei a di soni aki? Un dee gaanwomi, un heepi dee baaa ku dee sisa fuunu ufö wan hogi ko pasa. Un ko dë mati u de. Ee wan siki ko di ta paaja, di ta mbei taa wan sa go luku de a de pisi, nöö un sa mbei möiti u jei fa u de a wan woto fasi. Desi bi taki taa: „So juu sömëni gaanwomi ta bëli mi nasö de ta manda bosikopu da mi a di seei daka. Dee Bëibel tëkisi di de bi ta lesi da mi bi ta dou mi hati seei, hii fa mi bi sabi de kaa.”

5. Unfa dee gaanwomi sa ko sabi andi dee baaa ku dee sisa u de abi fanöudu, nöö de heepi de?

⁵ Wan fasi fa i sa ko sabi andi dee baaa ku dee sisa fii abi fanöudu, hën da te i ta hakisi de soni söndö fii mbei de fii wan fasi (Nöng. 20:5). De abi soni u njan u? De abi deesi nasö woto soni fanöudu ö? A kan taa de o lasi di wooko u de u? De o abi möni tjika u paka wosu ö? De abi sëmbë fanöudu u heepi de suku heepi a lanti ö? Dee baaa ku dee sisa bi heepi Desi faa feni dee soni dee a bi abi fanöudu. Ma di taanga di dee gaanwomi bi dëën, hën bi möön heepi ën faa bi hoi dou, di soni bi ta taanga dëën. A bi taki taa: „Dee gaanwomi bi ta begi makandi ku mi. Hii fa ma ta mëni bumbuu andi de bi taki a dee begi möön, tökuseei mi ta mëni jeti unfa mi bi ta fii. A bi dë kuma Jehovah hën bi ta piki mi taa: ’Ja dë i wanwan.’”​—Jes. 41:10, 13.

6. Andi u sa du u heepi wotowan a di kemeente? (Luku di peentje.)

⁶ Soni di dee woto baaa ku sisa sa du. U ta hoi taa dee gaanwomi o ta heepi dee baaa ku dee sisa u di kemeente. Ma Jehovah ta da hii u tuu taanga fuu ta heepi u na u (Gal. 6:10). Wan sëmbë sa feni taanga seei, aluwasi ee wan piki soni seei u du u lei taa u lobi ën. Wan piki mii sa sikifi wan soni manda da wan baaa nasö a sa teeken wan soni dëën. Wan njönku baaa nasö wan njönku sisa sa go bai soni da wan sisa, nasö a sa go du wan woto soni dëën. U sa boi wan soni tja go da wan baaa nasö wan sisa di dë ku suwaki tu. Wë te wan siki ko di ta paaja, nöö hii sëmbë u di kemeente ta abi taanga fanöudu. Kandë u sa fika piki sö möön longi baka dee komakandi fuu sa fan ku dee baaa ku dee sisa fuu, aluwasi di komakandi bi hoi a zali nasö a Internet. Dee gaanwomi seei abi taanga fanöudu tu. So baaa ku sisa bi manda wan kaita da dee gaanwomi u da de tangi, u di de ta abi te a hia soni ta du seei te wan siki ko di ta paaja. A ta suti seei te hiniwan fuu ta du andi u sa du, u ’da useei degihati ta heepi u na u fuu nango a fesi nöömö’!​—1 Tes. 5:11.

HEEPI WOTOWAN TE WAN GAAN HOGI PASA

7. Andi sa mbei soni taanga da sëmbë, te wan gaan hogi pasa?

⁷ Te wan gaan hogi pasa, nöö di soni dë sa tooka wan sëmbë libi vou sö. Sëmbë sa lasi dee soni u de, di wosu u de, nasö sëmbë u de seei sa lasi libi tu. Dee soni aki ta miti dee baaa ku dee sisa fuu tu. Wë nöö andi u sa du u heepi de?

8. Andi dee gaanwomi ku dee hedima u wosudendu sa du ufö wan gaan hogi pasa?

⁸ Soni di dee gaanwomi sa du. Un dee gaanwomi, un heepi dee baaa ku dee sisa fuunu u de sa dë seekaseeka ufö wan gaan hogi pasa. Un mbei dee sëmbë u di kemeente ko sabi andi de musu du u hogi an miti de, söseei un mbei de ko sabi andi de sa du sö taa un sa sabi soni u de. Sisa Margaret, di u bi taki soni fëën a di woto di pasa, bi taki taa: „Dee gaanwomi bi taki u soni di di kemeente abi fanöudu a wan komakandi, nöö de bi piki u fuu ta dë ku di mëni taa faja sa ko tjuma soni a di pisiwata fuu. De bi piki u taa ee lanti piki u fuu kumutu ka u ta libi, nasö ee u si taa hogi sa pasa ku u, nöö u musu go hesihesi.” A bunu seei taa dee gaanwomi bi piki de dee soni dë, u di feifi wiki baka di dë, hën wan gaan faja bi ko tjuma soni a di pisiwata ka de ta dë. Te dee hedima u wosudendu ta hoi di Wosudendu Dini u de, nöö de sa toona luku andi dee sëmbë u de wosudendu musu du. Ee unu dee hedima u wosudendu, ku dee mii fuunu seeka unuseei bunu a fesi, nöö wan o panta poi ee wan gaan hogi ko pasa.

9. Unfa dee gaanwomi sa seeka soni ufö wan gaan hogi pasa, söseei baka te gaan hogi pasa?

⁹ Ee i dë wan fesima u wan peleikiwooko kulupu, nöö na wakiti u wan hogi pasa ufö i mbei möiti fii ko abi di bumbuu tëlëfön nöbu ku di wosu nöbu u dee sëmbë u di kulupu fii. Sikifi de tei, nöö ta dë te wan pisi, nöö i hakisi de luku ee dee nöbu dë bunu jeti. Te i du sö, nöö te wan soni pasa, nöö joo sa ko sabi soni u de fii sa heepi de ku dee soni di de abi fanöudu. Piki di fesima u dee gaanwomi dee soni aki wantewante, nöö a o piki di keling-gaanwomi. Te un ta wooko makandi, nöö woon sa heepi dee baaa ku dee sisa a wan möön bunu fasi. Di di faja bi ko, di keling-gaanwomi di bi nango ta luku di kemeente ka Sisa Margaret bi dë, bi dë ku wojo 36 juu longi, u di a bi ta heepi dee gaanwomi dee bi ta mbei möiti u de ko sabi soni u söwan 450 baaa ku sisa di bi abi u foloisi kumutu a de pisi (2 Kol. 11:27). A sö wan fasi hii dee sëmbë dee an bi abi wan kamian u de dë, bi feni di heepi di de bi abi fanöudu.

10. Faandi mbei dee gaanwomi ta si di luku di de musu ta luku dee baaa ku dee sisa u de, kuma wan fanöudu soni? (Johanisi 21:15)

¹⁰ Dee gaanwomi abi di faantiwöutu u da dee baaa ku dee sisa u de taanga tu (1  Pet. 5:2). Te wan gaan hogi pasa, nöö dee gaanwomi musu mbei möiti u sabi ee soni an du dee baaa ku dee sisa u de, söseei de musu mbei möiti u de sa feni soni u njan, soni u bisi, ku wan kamian u de dë. Ma aluwasi sömëni liba pasa, tökuseei dee baaa ku dee sisa aki o sa abi taanga fanöudu jeti. (Lesi Johanisi 21:15.) Wan baaa de kai Harold, di dë a wan Bëikantoo Komite, bi taki taa: „A ta tei ten u dee lö sëmbë aki ko kisi deseei baka. De sa bigi kisi deseei, ma de o sa ta mëni so soni jeti. Kandë de sa ta mëni wan sëmbë u de di lasi libi, wan soni u de di poi kaba a sösö, söseei de sa ta mëni wan gaan soni di bi miti de. Nöö dee soni aki sa mbei de toona ko ta fii tjali baka. Di soni aki an kë taki taa de an abi wan taanga biibi, ma a ta lei taa sö libisëmbë dë kaa.”

11. Un soni sëmbë u wan wosudendu ta abi fanöudu hii juu?

¹¹ Dee gaanwomi ta mbei möiti u „këë ku dee sëmbë dee ta këë” (Lom. 12:15). Dee gaanwomi musu heepi dee sëmbë di di gaan hogi miti, u de si taa Jehovah ku dee baaa ku dee sisa u de lobi jeti. De o heepi dee sëmbë u de wosudendu tu, u de ta du dee soni di de musu ta du u de sa abi wan taanga biibi. De o heepi de u de ta begi, u de ta lei soni u Bëibel, u de nango a dee komakandi, söseei u de ta du di peleikiwooko. Dee sëmbë dee abi miii sa da dee mii u de taanga tu u de ta buta pakisei a dee soni di gaan hogi an o sa poi kaba a sösö nöiti. Un dee mama ku dee tata, un mbei dee mii fuunu ko sabi taa Jehovah an o disa de möönsö, söseei taa a o dë mati u de go dou aluwasi andi ta pasa. Boiti di dë, un mbei de ko sabi taa de abi baaa ku sisa a hii së u goonliba, di dë kabakaba u heepi de.

12. Andi dee woto baaa ku sisa sa du, u heepi dee sëmbë dee wan gaan hogi miti? (Luku di peentje.)

¹² Soni di dee woto baaa ku sisa sa du. Ee wan gaan hogi pasa zuntu ku ka i ta libi, nöö hakisi dee gaanwomi unfa i sa heepi. Kandë i sa hoi dee sëmbë di di hogi miti a i pisi, nasö i sa hoi dee sëmbë dee go heepi de. Kandë i sa da dee peleikima soni u njan, ku woto soni di de abi fanöudu. Ee wan hogi pasa a wan möön longi kamian, tökuseei i sa heepi. Na un fasi? Wë i sa begi da dee sëmbë di di soni miti (2 Kol. 1:8-11). I sa heepi de tu te i ta buta möni da di wooko di ta du a hii di goonliba (2 Kol. 8:2-5). Ee i sa go a di kamian ka di gaan hogi pasa, nöö i sa hakisi dee gaanwomi andi i sa du u heepi. Ee de kai i fii go heepi, nöö de o lei i unfa i sa du soni, sö taa i sa heepi a di möön bunu fasi.

HEEPI DEE BAAA KU DEE SISA TE SËMBË TA DU KU DE

13. Andi ta miti dee baaa ku dee sisa fuu dee ta dë a dee köndë ka lanti tapa di wooko fuu?

¹³ Di libi ta möön taanga te u ta libi a wan köndë ka lanti tapa di wooko fuu. Dee baaa ku dee sisa dee ta dë a dee köndë dë, ta dë ku möni fuka tu, de ta dë ku suwaki, söseei sëmbë u de ta lasi libi. Ma u di lanti tapa di wooko fuu, mbei a sa pasa taa dee gaanwomi an o sa feni pasi go luku dee baaa ku dee sisa aki u da de taanga, nasö kandë de an o sa feni pasi fan ku de kumafa de bi o kë. Di soni aki hën bi pasa ku wan baaa de kai Andrei, di u bi taki soni fëën a di woto di pasa. Wan sisa di bi dë a di peleikiwooko kulupu fëën bi dë ku möni fuka. Bakaten hën di sisa ko naki ku wagi. A bi dë u de opalasi ën, nöö an bi sa wooko. Hii fa de bi tapa di wooko fuu, söseei hii fa di kolona siki bi ta paaja, tökuseei dee baaa bi du andi de bi sa du u heepi di sisa, nöö Jehovah bi sabi andi bi ta pasa.

14. Unfa dee gaanwomi sa lei taa de ta futoou Jehovah?

¹⁴ Soni di dee gaanwomi sa du. Baaa Andrei bi begi, hën a du andi a bi sa du. Unfa Jehovah bi piki di begi fëën? A bi mbei sömëni woto baaa ku sisa heepi di sisa. So u de bi ta tjëën go a data, nöö so u de bi dëën möni. Jehovah bi mbei de heepi di sisa, hën a mbei soni waka bunu (Heb. 13:16). Un dee gaanwomi, te de tapa di wooko fuu, nöö un hakisi wotowan u de heepi unu ku di wooko (Jel. 36:5, 6). Ma di möön fanöudu soni, hën da un musu ta futoou Jehovah. A sa heepi unu fuun sa luku dee baaa ku dee sisa fuunu.

15. Unfa u sa ta libi fiifii ku useei go dou te sëmbë ta du ku u?

¹⁵ Soni di dee woto baaa ku sisa sa du. Te de tapa di wooko fuu, nöö kandë a o dë fanöudu fuu ta miti a piki kulupu. Fëën mbei a dë fanöudu seei fuu ta libi fiifii ku useei. Hoi a pakisei taa ku Saatan u musu feti, na ku useei. Wa musu ta buta pakisei a dee pikipiki föutu di dee baaa ku dee sisa fuu ta mbei. Söseei ee wan toobi ko dë, nöö u musu mbei möiti u seekëën wantewante (Nöng. 19:11; Ef. 4:26). U musu ta dë kabakaba u heepi useei (Tit. 3:14). Di heepi di dee woto baaa ku sisa bi heepi di sisa di bi a heepi fanöudu, bi tja wini ko da dee sëmbë u di peleikiwooko kulupu u de. De bi ko möön lobi deseei, leti kuma wan famii.​—Ps. 133:1.

16. Unfa u sa heepi dee baaa ku dee sisa fuu dee sëmbë ta du ku de, kumafa Kolosën 4:3, 18 ta taki?

¹⁶ Dusudusu u dee baaa ku dee sisa fuu ta dini Jehovah, hii fa lanti tapa di wooko fuu. De ta buta so u de a dunguwosu u di biibi u de hedi. U sa ta begi da de ku dee famii u de, te dou ku dee sëmbë dee ta du soni ku degihati u heepi dee baaa ku dee sisa aki, hii fa de sa söötö de tu. De ta da de taanga, de ta heepi de u de feni dee soni di de abi fanöudu, söseei de ta hopo fan da de te de dë a kuutu.c (Lesi Kolosën 4:3, 18.) Na fëëkëtë taa di begi di i ta begi da dee baaa ku dee sisa aki sa heepi de tuutuu!​—2 Tes. 3:1, 2; 1 Tim. 2:1, 2.

17. Unfa i sa seeka iseei nöunöu kaa da di du di sëmbë sa du ku i?

¹⁷ I ku dee sëmbë fii wosudendu sa seeka unuseei nöunöu kaa da di du di sëmbë sa du ku u (Tjab. 14:22). Na pakisei dee hogi soni dee sa miti i. Ma mbei möiti fii ku Jehovah sa ko dë möön gaan mati, nöö i heepi dee mii fii u deseei du di seei soni tu. Ee so juu i ta fëëë, nöö begi Gadu, nöö i konda hii soni di dë a i hati dëën (Ps. 62:7, 8). I ku dee sëmbë fii wosudendu sa taki u dee soni dee mbei un sa futoou Jehovah.d Leti kumafa i sa heepi dee mii fii u de dë seekaseeka da wan gaan hogi di sa pasa, sö nöö i sa heepi de u de dë seekaseeka da di du di sëmbë sa du ku de tu. Di soni aki o heepi de u de an fëëë, söseei u de an ta dë pantapanta, u di de sabi taa de sa futoou Jehovah.

18. Un bunu woo feni a di ten di ta ko?

¹⁸ Di kötöhati di Gadu ta da u, ta mbei taa wa ta dë fëëëfëëë (Fil. 4:6, 7). Jehovah ta da u di kötöhati dë u heepi u fuu sa dë bööböö, hii fa u sa ko dë ku suwaki, hii fa gaan hogi sa miti u, söseei hii fa sëmbë sa du ku u. Jehovah ta tei dee gaanwomi u heepi u, söseei a ta da u di gaandi fuu sa ta heepi u na u. Di kötöhati di a ta da u nöunöu o heepi u fuu sa hoi dou te möön gaan soni o miti u a di ten di ta ko, möönmöön a di pisiten u di „gaan fuka” (Mat. 24:21). A di ten dë, a o dë fuu ta heepi u na u fu wa ta dë pantapanta. Ma te di ten dë pasa kaa, nöö soni an o ta miti u möön di o ta mbei u ta dë pantapanta. Woo dë seei bööböö u nöömö, kumafa Jehovah bi kë sensi ten kaa.​—Jes. 26:3, 4.