I sa heepi dee sëmbë u di wosudendu fii u de ta dë waiwai hii juu

Jehovah kë taa dee sëmbë u wan wosudendu musu ta dë waiwai (Ps 127:3-5; Pel 9:9; 11:9). Ma a sa pasa taa dee bookohedi u di goonliba aki ku dee föutu di dee sëmbë u di wosudendu fuu ta mbei, sa mbei wa ta dë waiwai möön. Andi hiniwan sëmbë u di wosudendu sa du u de sa ta dë waiwai?

Wan womi musu lei taa a ta si hën mujëë u gaan soni (1Pe 3:7). A ta abi ten dëën mujëë, söseei a ta dë makandi ku ën. A ta hoi a pakisei andi hën mujëë sa du ku andi an sa du, söseei a ta tei dee soni dee a ta du dëën ku dee a ta du da di wosudendu u de, u bigi (Kol 3:15). A ta lei ën taa a lobi ën, nöö a ta gafëën tu.—Nön 31:28, 31.

Wan mujëë ta luku unfa a sa ta heepi hën manu a soni (Nön 31:12). A ta saka hënseei nëën manu basu, nöö a ta wooko makandi ku ën (Kol 3:18). A ta fan a wan lesipeki fasi ku ën, söseei a ta taki bunu soni fëën.—Nön 31:26.

Dee mama ku dee tata ta abi ten da dee mii u de (Det 6:6, 7). De ta piki dee mii u de taa de lobi de (Mt 3:17). Te de musu sitaafu dee mii u de, nöö de ta du ën ku lobi, söseei ku köni.—Ef 6:4.

Dee mii ta abi lesipeki da de mama ku de tata, nöö de ta piki de buka (Nön 23:22). De ta piki de mama ku de tata unfa de ta fii, söseei unfa de ta pakisei. De ta tei di sitaafu di de mama ku de tata ta da de, nöö de ta lesipeki de.—Nön 19:20.

LUKU DI FËLÖN MBEI MÖITI U DEE SËMBË FII WOSUDENDU TA DË WAIWAI, NÖÖ BAKA DI DË, PIKI DI HAKISI AKI:

Andi hiniwan sëmbë a di wosudendu bi du u de bi sa ta dë waiwai?