Andi i sa lei a di buku Akoalimbo?

1-2. Andi da wan soni di mbei u musu kë sabi soni u di buku Akoalimbo?

A BI pasa wan daka kaa taa wan sëmbë da i pasi fii luku dee footoo fëën u? Te i ta luku dee footoo, nöö i ta si sömëni sëmbë di ja sabi. Ma wan u dee footoo hai i pakisei. Faandi mbei? U di i dë a di footoo dë tu. I ta luku di footoo, nöö i ta hakisi iseei un ten de bi puu di footoo dë, söseei i ta hakisi iseei na un kamian i bi dë di de puu ën. I ta mbei möiti u ko sabi ambë da dee woto sëmbë a di footoo, nöö fëën mbei i ta buta pakisei a di footoo möön gaanfa.

² Di buku Akoalimbo dë kuma di footoo dë. Faandi mbei u taki sö? Wë woo luku tu soni di mbei u taki sö. Di fosu soni da, de sikifi di buku Akoalimbo da u. A di fosu vers u di buku dë, de taki taa: „Wan bosikopu di Jesosi Keesitu tja ko a limbo, söseei di Gadu dëën faa lei dee saafu u Gadu andi musu pasa abiti möön” (Ako. 1:1). Fëën mbei u sa taki taa dee soni dee dë sikifisikifi a di buku aki, an dë da hii sëmbë, ma a dë da u dee dinima Gadu. U di u da sëmbë u Gadu, mbei an musu bigi da u te u jei taa u ta heepi mbei dee tjabukama woto dee sikifi a di buku Akoalimbo pasa tuutuu. Te u ta lesi di buku Akoalimbo, nöö u ta lesi soni di nama ku u.

3-4. Na un ten dee tjabukama woto u di buku Akoalimbo o pasa tuutuu, nöö andi de musu mbei hiniwan fuu kë du?

³ Di u tu soni di mbei u musu kë sabi soni u dee tjabukama woto u di buku Akoalimbo, hën da di ten di de o pasa tuutuu. Apösutu Johanisi bi taki na un ten dee tjabukama woto dë bi o pasa, di a bi taki taa: „Di daka di mi si dee soni aki, nöö a bi dë di daka u Masa” (Ako. 1:10). Johanisi bi taki di soni aki a di jaa 96 baka Keesitu, nöö a di ten dë „di daka u Masa” an bi dou jeti seei (Mat. 25:14, 19; Luk. 19:12). Dee woto tjabukama woto u Bëibel, ta lei taa di daka dë bigi a di jaa 1914, di Jesosi toon Könu a liba ala. Sensi di jaa dë, hën dee tjabukama woto dee nama ku dee sëmbë u Gadu, dee dë a di buku Akoalimbo, bigi ta pasa tuutuu. Awa, u ta libi a „di daka u Masa”!

⁴ U di u ta libi a di sipan pisiten aki, mbei u musu buta hii u pakisei a di soni di sikifi na Akoalimbo 1:3. A taa: „Gadu o mbei di sëmbë di ta lesi dee soni u di tjabukama woto aki feni gaan bunu. Söseei tu, ee wan sëmbë i ta haika de te i tei de buta a i hati ta libi ku de, nöö Gadu o mbei i feni bunu tu. Biga abiti möön nöö de o ko pasa.” U musu ta lesi di tjabukama woto aki fuu jei dee fan u Gadu, söseei u musu tei de buta a u hati ta libi ku de. Andi da so u dee soni dee u musu ta libi ku de?

MBEI JEHOVAH WAI KU DI FASI FA I TA DINI ËN

5. Unfa di buku Akoalimbo ta lei taa a dë fanöudu u du soni di o mbei Jehovah feni di dini di u ta dini ën u bunu?

⁵ A di fosu kapitë u di buku Akoalimbo, u ta si taa Jesosi sabi hii soni di ta pasa a dee kemeente fëën (Ako. 1:12-16, 20; 2:1). Dee bosikopu dee Jesosi bi manda da seibi kemeente u Piki Asia ta lei u di soni dë. A bi piki dee fesiten Keesitu sëmbë soni di bi o heepi de u de du soni di o mbei taa Jehovah feni di dini di de ta dini ën u bunu. Dee soni dee Jesosi bi taki dë dë da u a di ten aki tu. Andi u sa lei u dee soni dë? Jesosi Keesitu di fesima fuu, sabi ee u ku Jehovah dë mati tuutuu. A ta tii u, söseei a ta tjubi u, nöö soni an dë di an ta si. A sabi andi u musu du sö taa Jehovah sa ta feni u u bunu. Andi da dee soni dee a bi taki di u abi fanöudu a di ten aki?

6. (a) Andi Jesosi bi si a di kemeente u Efeise, te u luku di soni di a taki na Akoalimbo 2:3, 4? (b) Andi u ta lei u di woto aki?

⁶ Lesi Akoalimbo 2:3, 4. Wa musu mbei di lobi di u abi da Jehovah ko kötö. A di bosikopu di Jesosi bi manda da dee sëmbë u di kemeente a Efeise, a bi piki de taa a bi ta si unfa de bi ta hoi dou, söseei taa de bi ta dini Jehovah go dou, hii fa sömëni fuka bi ta miti de. Ma tökuseei de an bi lobi Gadu möön kumafa de bi lobi ën a fesi. De bi musu mbei möiti u de ko abi di seei lobi dë da Gadu baka, ee nasö Gadu an bi o feni di dini di de ta dini ën u bunu. Sö nöö a dë da u a di ten aki. Na hoi nöö u musu ta hoi dou, ma u musu hoi dou a wan fasi di ta kai ku Gadu. Di Gadu fuu an ta buta pakisei nöö a dee soni dee u ta du nöö a kaba, ma a ta luku tu faandi mbei u ta du de. Di soni mbei u ta dini Jehovah, da di möön fanöudu soni dëën, u di a kë taa u musu ta dini ën u di u lobi ën gaanfa seei, söseei u di u ta tei dee soni dee a ta du da u u bigi.​—Nöng. 16:2; Maik. 12:29, 30.

7. (a) Andi Jesosi bi si a di kemeente u Saadisi, te u luku Akoalimbo 3:1-3? (b) Andi u musu du?

⁷ Lesi Akoalimbo 3:1-3. U musu ta dë ku wojo nöömö. Dee sëmbë u di kemeente u Saadisi bi abi wan woto soni di de bi musu wooko nëën. Bigibigi de bi ta dini Gadu fajafaja, ma bakaten de an bi ta dini ën a di fa möön. Fëën mbei Jesosi bi piki de taa de musu „weki”. Andi u ta lei u di soni aki? Jehovah an o fëëkëtë dee soni dee u du dëën (Heb. 6:10). Ma tökuseei wa musu ta pakisei taa u di u bi dini Jehovah a di ten di pasa, mbei wa abi fu dini ën nöunöu möön. Hii fa kandë wa sa ta du soni kuma fosu möön, tökuseei u musu ta „biinga hiniwanten a di wooko u Masa”, söseei u musu dë ku wojo te dou di kaba u di goonliba aki.​—1 Kol. 15:58; Mat. 24:13; Maik. 13:33.

8. Andi u ta lei u dee soni di Jesosi bi piki dee sëmbë u Laodisea di sikifi na Akoalimbo 3:15-17?

⁸ Lesi Akoalimbo 3:15-17. U musu ta dini Gadu fajafaja, söseei u musu dini ën ku hii u hati. Di bosikopu di Jesosi bi manda da dee sëmbë u Laodisea bi ta lei taa de bi abi wan soni di de bi musu wooko nëën. Di fasi fa de bi ta dini Gadu bi dë kuma wata di an kendi, ma kuma wata di dë gbölöö sö. U di de an bi ta dini Gadu fajafaja, mbei Jesosi piki de taa de dë kuma „penama”. De bi musu ta dini Jehovah fajafaja (Ako. 3:19). Andi u ta lei u di soni aki? Ee a ko dë taa wa ta dini Gadu fajafaja möön, nöö u musu mbei möiti fuu möön tei hii dee bunu soni di Jehovah ku di ölganisaasi fëën ta da u u bigi (Ako. 3:18). Wa musu ta biinga fuu ko abi wan möön bunu libi tee taa di dini di u ta dini Jehovah an ko dë di möön fanöudu soni da u möön.

9. Andi u musu koti pasi da, te u luku di soni di Jesosi bi piki dee Keesitu sëmbë u Peegamu ku Tiatila?

⁹ U musu koti pasi da dee lei u dee sëmbë dee bia baka da di tuutuu lei. Jesosi bi musu fan ku so sëmbë u di kemeente u Peegamu, u di de bi ta paati sëmbë ku sëmbë (Ako. 2:14-16). A bi gafa dee sëmbë u Tiatila, u di de bi koti pasi da dee „köni u Saatan”, söseei a bi da de taanga u de „hoi” deseei a di tuutuu lei (Ako. 2:24-26). Dee Keesitu sëmbë dee bi bigi haika dee lei u Saatan bi musu bia du soni woto fasi. Unfa a dë da u a di ten aki? U musu koti pasi da hiniwan lei di an ta kai ku di fasi fa Jehovah ta si soni. Kandë bigibigi a o ta djei kuma dee sëmbë dee bia baka da di tuutuu lei ta booko de hedi ku andi di Bëibel ta taki, ma di fasi fa de ta du soni, ta lei taa na sö a dë tuutuu (2 Tim. 3:5). Te u abi di guwenti u lei soni u Bëibel, nöö an o ta taanga da u fuu si andi da poipoi lei, söseei fuu koti pasi da de.​—2 Tim. 3:14-17; Jud. 3, 4.

10. Un woto soni u sa lei u di soni di Jesosi bi piki dee sëmbë u di kemeente u Peegamu ku di u Tiatila?

¹⁰ Wa musu lobi fanafiti libi kwetikweti. Wan soni bi dë jeti di dee baaa ku dee sisa u Peegamu ku Tiatila an bi ta du. Jesosi an bi feni so u dee sëmbë u dee kemeente dë u bunu, u di de an bi ta si fanafiti libi kuma wan hogi soni (Ako. 2:14, 20). Andi u ta lei u di soni aki? Wa sa dë ku di mëni taa Jehovah an o tei u u hogi ee u ta libi a wan fanafiti fasi, u di u ta dini ën sömëni jaa longi kaa, söseei u di u abi sömëni faantiwöutu a di ölganisaasi fëën (1 Sam. 15:22; 1 Pet. 2:16). Jehovah kë fuu hoi dee wëti fëën dee nama ku fanafiti libi, hii fa dee sëmbë u di goonliba aki an ta booko de hedi ku dee wëti dë.​—Ef. 6:11-13.

11. Andi da dee soni dee u lei? (Söseei luku di pisi „Dee soni dee u lei.”)

¹¹ Andi da dee soni dee u lei? Wë u bi lei taa a dë fanöudu taa u dini Jehovah a wan fasi di ta kai ku ën. Ee a dë taa u ta du soni di sa mbei taa Jehovah an feni di dini di u ta dini ën u bunu, nöö u musu tooka soni wantewante (Ako. 2:5, 16; 3:3, 16). Ma Jesosi bi taki wan soni jeti da dee kemeente. Andi a bi taki da de?

I MUSU DË KABAKABA U HOI DOU TE DE TA DU KU I

12. Andi u sa lei u dee bosikopu di Jesosi bi manda da dee baaa ku dee sisa u Similina ku Filadelifia? (Akoalimbo 2:10)

¹² Boo buta pakisei a dee bosikopu di Jesosi bi manda da dee kemeente u Similina ku Filadelifia. A bi piki dee Keesitu sëmbë fu ala taa de an musu fëëë di du di sëmbë o du ku de, u di Jehovah o paka de ee de hoi deseei nëën go dou. (Lesi Akoalimbo 2:10; 3:10.) Andi u ta lei u di soni aki? U musu hoi a pakisei taa sëmbë o du ku u, nöö u musu dë kabakaba u hoi dou (Mat. 24:9, 13; 2 Kol. 12:10). Faandi mbei a dë fanöudu fuu hoi di soni aki a pakisei?

13-14. Andi pasa ku dee sëmbë u Gadu, baka di dee soni di sikifi na Akoalimbo kapitë 12 pasa?

¹³ Di buku Akoalimbo ta konda da u taa sëmbë o ta du ku dee sëmbë u Gadu „a di daka u Masa”. A di ten dë u ta libi nöunöu. Akoalimbo kapitë 12 ta taki taa wan gaan feti bi feti a liba ala baka di Jesosi toon könu. Mikaëli, nasö Jesosi Keesitu ku dee ëngëli fëën bi feti ku Saatan ku dee taku jeje. (Ako. 12:7, 8). Saatan ku dee taku jeje lasi di feti, hën de vinde de ko a goonliba aki, nöö de ta mbei sëmbë ta tja sömëni sitaafu (Ako. 12:9, 12). Andi pasa ku dee sëmbë u Gadu baka di di soni dë pasa?

¹⁴ Akoalimbo ta konda da u andi Saatan du baka di feti. An sa toona go a liba ala möön, nöö fëën mbei a ta du ku dee salufuwan u Gadu dee dë a goonliba aki jeti. Dee salufuwan aki ta wooko da di Könuköndë u Gadu, söseei de „da dee sëmbë dee ta piki Gadu buka ta hoi a dee lei u Jesosi dee a bi konda da de” (Ako. 12:17; 2 Kol. 5:20; Ef. 6:19, 20). Unfa di tjabukama woto aki pasa tuutuu?

15. Ambë de bi taki taa da dee „tu kotoigi” di Akoalimbo kapitë 11 ta taki soni u de, nöö andi bi pasa ku de?

¹⁵ Saatan bi mbei dee felantima u Gadu du ku dee baaa dee bi dë salufuwan, söseei dee bi ta tei fesi a di peleikiwooko. De bi taki taa dee baaa aki bi dë dee „tu kotoigi” di sëmbë bi kiib (Ako. 11:3, 7-11). A di jaa 1918, de mindi soni da aiti u dee baaa dee ta tei fesi, hën de lesi sömëni jaa sitaafu da de. Sömëni sëmbë bi ta si kuma di wooko u dee salufuwan aki bi tapa.

16. Un foombo soni bi pasa a di jaa 1919, ma andi Saatan ta du sensi di ten dë?

¹⁶ Di tjabukama woto di sikifi na Akoalimbo kapitë 11 ta lei tu taa dee „tu kotoigi” bi o ko a libi baka, baka wan kölö pisiten. Di tjabukama woto aki bi pasa a wan foombo fasi di jaa baka di de söötö dee aiti baaa aki. A gaanliba u di jaa 1919, hën de puu dee salufu baaa aki a dunguwosu, söseei bakaten lanti an bi kuutu de u dee soni sëmbë bi mindi da de möön. Di de puu de a dunguwosu, hën wantewante de bigi tei fesi baka a di peleikiwooko ku di lei di de ta lei sëmbë soni u Bëibel. Ma hii fa a bi dë sö, tökuseei an tapa Saatan fu an du ku dee sëmbë u Gadu möön. Sensi di ten dë, hën Saatan ta du ku dee sëmbë u Gadu nöömö (Ako. 12:15). Awa, hii u tuu musu „abi taihati ku gaan futoou a Masa Gadu liba”.​—Ako. 13:10.

DU HII SONI DI I SA DU A DI WOOKO DI JEHOVAH DA U

17. Un heepi dee sëmbë u Gadu bi feni di de an bi mëni, hii fa Saatan ta du ku de?

¹⁷ Akoalimbo kapitë 12 ta lei u taa dee sëmbë u Gadu bi o feni heepi a wan kamian ka de an bi mëni. A bi o dë kuma di „goonliba” guli di du di sëmbë ta du ku dee sëmbë u Gadu (Ako. 12:16). Sö wan pei soni wë bi ko pasa. So juu di goonliba u Saatan ta du soni a wan fasi di ta mbei dee sëmbë u Gadu feni wini. Sömëni pasi dee Jehovah Kotoigi wini kuutu di bi da de pasi u de sa toona du so soni baka. Unfa de ta du soni te de feni di okasi u toona du so soni baka? Wë de ta wooko ku di ten dë a wan köni fasi u du di wooko di Jehovah da de u de du (1 Kol. 16:9). Andi da di wooko di de musu du?

18. Andi da di möön fanöudu wooko di u ta du a dee lasiti daka aki?

¹⁸ Jesosi bi taki a fesi taa dee sëmbë fëën o paaja di „bunu buka u di Könuköndë” u Gadu a hii së u goonliba, ufö di kaba dou (Mat. 24:14). Te de ta du di peleikiwooko, nöö de ta feni heepi u wan ëngëli, nasö u wan kulupu ëngëli. Di Bëibel taki taa de ’abi di Bunu Buka di dë u teego u de musu konda da dee peipei sëmbë u goonliba. Hii pei nasiön sëmbë, ku hii pei lö, ku hii pei föluku dee ta fan hii dee peipei töngö u goonliba, de tuu de musu konda di buka da’.​—Ako. 14:6.

19. Un woto bosikopu dee sëmbë dee lobi Jehovah musu ta paaja?

¹⁹ Na di bunu buka u di Könuköndë wanwan nöö dee sëmbë u Gadu musu paaja a di ten aki. Ma de musu heepi dee ëngëli u du di wooko di Akoalimbo kapitë 8 te go miti kapitë 10 ta taki soni fëën. Dee ëngëli ta taki u dee gaan hogi dee o miti dee sëmbë dee an kë u di Könuköndë u Gadu tii de. Fëën mbei di bosikopu di dee Jehovah Kotoigi ta paaja, di ta kuutu di hogi goonliba u Saatan, dë kuma „ëisi logologo” ku „faja” (Ako. 8:7, 13). Sëmbë musu sabi taa di kaba u di goonliba aki dë zuntu, nöö de musu tooka soni a de libi, sö taa de an dëdë a di daka di Jehovah hati o boonu (Sef. 2:2, 3). Ma di bosikopu aki an dë wan bosikopu di sëmbë lobi. Fëën mbei u musu abi degihati te u ta paaja di bosikopu aki. A di pisiten u di gaan fuka, woo ta paaja wan lasiti kuutu bosikopu di o mbei sëmbë hati boonu ku u möön gaanfa.​—Ako. 16:21.

DU ANDI DI TJABUKAMA WOTO TA TAKI

20. Fuun soni woo taki a dee tu woto dee ta ko baka disi?

²⁰ A dë fanöudu fuu buta pakisei a di tjabukama woto aki, u di dee soni dee sikifi a di buku Akoalimbo nama ku u (Ako. 1:3). Ma unfa u sa hoi dou te sëmbë ta du ku u, söseei unfa u sa peleiki ku degihati go dou? Wë tu soni dë di o da u taanga. Di fosu soni, hën da dee soni dee di buku Akoalimbo ta taki u dee felantima u Gadu, nöö di u tu soni da dee gaan bunu dee woo feni te u hoi dou. Woo taki u dee soni aki a dee tu woto dee ta ko.