Andi fii di buku Akoalimbo ta taki da di ten di ta ko?

1. Un fanöudu soni hii sëmbë musu du?

WAN fanöudu soni dë di hii sëmbë musu du a di ten aki. De musu taki ee de o tei di së u Jehovah Gadu di abi leti u tii u, nasö ee de o tei di së u di hogihati felantima fëën de kai Saatan Didibi. Wë woto fasi an dë, wa së nöö de sa tei. Ma nöö di së di de o tei, sa mbei de libi u teego, nasö a sa mbei de lasi de libi (Mat. 25:31-33, 46). A di pisiten u „di gaan fuka” de o kisi wan maaka di o lei ee de o tan a libi, nasö ee de o dëdë.​—Ako. 7:14; 14:9-11; Eze. 9:4, 6.

2. (a) Andi Hebelejën 10:35-39 ta da u taanga fuu du? (b) Unfa di buku Akoalimbo sa heepi u?

² Lesi Hebelejën 10:35-39. Ee i tei di së u di tii u Jehovah, nöö hën da i du wan bunu soni seei. Nöö fëën mbei i kë heepi wotowan u de du di seei soni aki tu. I sa heepi de te i ta lei de dee soni u di buku Akoalimbo. Di apaiti buku aki ta konda andi o pasa ku dee sëmbë dee ta hopo fia ku Jehovah, söseei a ta konda un wini dee sëmbë dee ta tei di së u di tii u Jehovah o feni. A bunu fuu lei soni u dee woto aki. Ee u du di soni aki, nöö a o heepi u fuu dë kabakaba u dini Jehovah go dou. Boiti di dë, woo sa heepi wotowan u de tei di së u Jehovah, söseei u de dini ën go dou.

3. Andi woo luku a di woto aki?

³ A di woto aki woo taki u dee hakisi aki: Andi o pasa ku dee sëmbë dee tei di së u di tii u Gadu? Söseei andi o pasa ku dee sëmbë dee tei di së u di mbeti di sinkii fëën bë hëiii sö, di di buku Akoalimbo ta taki fëën?

ANDI O PASA KU DEE SËMBË DEE TA HOI DESEEI A JEHOVAH?

4. Un kulupu Johanisi si makandi ku Jesosi a liba ala?

⁴ Apösutu Johanisi bi si tu kulupu di bi dë a di së u di tii u Jehovah a wan wojolimbo sunjan, söseei a bi si taa de bi feni di libi u teego. Di fosu kulupu bi abi 144.000 sëmbë (Ako. 7:4). De tei de puu a goonliba aki u de go tii makandi ku Jesosi a di Könuköndë a liba ala. Nöö hën ku de o tii di goonliba makandi (Ako. 5:9, 10; 14:3, 4). A di wojolimbo sunjan aki Johanisi si fa de ku Jesosi dë taanputaanpu a liba ala a di kuun de kai Sion.​—Ako. 14:1.

5. Andi o pasa ku dee salufuwan dee dë a goonliba aki jeti?

⁵ Sensi di ten u dee apösutu te ko miti di ten aki, Gadu ta tei dusudusu sëmbë u de ko dë sëmbë u di kulupu u 144.000 sëmbë (Luk. 12:32; Lom. 8:17). Johanisi bi ko fusutan taa wantu u dee sëmbë u di kulupu aki nöö bi o dë a libi jeti a goonliba aki a dee lasiti daka. De da „dee oto mii u di mujëë dee bi fika”, nöö ufö di gaan fuka bigi de o kisi di lasiti „sitampu” u Jehovah, di ta lei taa a feni de u bunu (Ako. 7:2, 3; 12:17). Nöö a wan pisiten baka te di gaan fuka bigi, nöö Jehovah o tei dee salufuwan dee dë a goonliba aki jeti, sö taa de sa go miti dee wotowan dee a bi weki baka u go dë a liba ala. Nöö de ku Jesosi o tii makandi a di Könuköndë u Gadu.​—Mat. 24:31; Ako. 5:9, 10.

6-7. (a) Un woto kulupu Johanisi si, nöö andi u sabi u de? (b) Faandi mbei dee sëmbë dee Gadu tei u de go libi a liba ala ku dee „gaan hia sëmbë” tuu musu buta pakisei na Akoalimbo kapitë 7?

⁶ Baka di Johanisi si di kulupu a liba ala, hën a „si wanlö gaan hia sëmbë”. Di Bëibel an ta taki un mëni sëmbë dë a di u tu kulupu aki (Ako. 7:9, 10). Andi u sabi u di kulupu aki? De bi piki Johanisi taa: „Dee sëmbë aki da dee sëmbë dee pasa di gaan fuka libilibi. De wasi dee langa koosu u de ko weti faan ku di buuu u di Sikapu Mii” (Ako. 7:14). Baka te de pasa di gaan fuka libilibi, nöö dee „gaan hia sëmbë” aki o libi a goonliba aki, nöö de o ta dë waiwai, u di de o feni gaan bunu seei.​—Ps. 37:9-11, 27-29; Nöng. 2:21, 22; Ako. 7:16, 17.

⁷ Aantoobi ee u dë sëmbë di Gadu kai u go libi a liba ala nasö ee u dë sëmbë di o fika a goonliba aki, ma a bunu fuu hakisi useei ee a dë sö taa u ta si useei kuma wan u dee sëmbë di o feni dee soni di Akoalimbo kapitë 7 ta taki soni u de. Wë a bi o bunu seei ee u ta si useei sö. A o dë wan piizii ten seei da dee dinima u Gadu di dë a dee tu kulupu aki! Woo wai gaanfa seei taa u tei di së u di tii u Jehovah. Un woto soni di buku Akoalimbo ta taki jeti u di gaan fuka?​—Mat. 24:21.

ANDI O PASA KU DEE SËMBË DEE TA HOPO FIA KU GADU?

8. Unfa di gaan fuka o bigi, nöö andi gaansë u sëmbë o du?

⁸ Kumafa u bi lei a di woto di pasa, nöö abiti möön dee tiima u di goonliba aki o booko di Gaan Babilon. Hën da hii dee poipoi keiki (Ako. 17:16, 17). Te di soni aki pasa, nöö di gaan fuka o bigi. Ma di soni aki kë taki taa sömëni sëmbë o bigi dini Jehovah u? Wë nönö. Biga Akoalimbo kapitë 6 ta lei u taa a di ten dë, dee sëmbë dee an ta dini Jehovah o kule go suku tjubi a dee tiima ku dee seisonima u di goonliba aki, dee di Bëibel ta tei maaka ku kuun. U di dee sëmbë dë an o tei di së u di Könuköndë u Gadu, mbei Jehovah o si de kuma felantima fëën.​—Luk. 11:23; Ako. 6:15-17.

9. Unfa dee sëmbë u Jehovah o tooka ku dee sëmbë dee an ta dini Jehovah a di pisiten u di gaan fuka, nöö andi o pasa ku dee sëmbë u Jehovah?

⁹ A di pisiten u di gaan fuka, dee dinima u Jehovah dee ta dini ën ku hii de hati, o tooka ku dee sëmbë dee an ta dini ën. A di ten dë, de wanwan o dë sëmbë a hii di goonliba di ta dini Jehovah Gadu, söseei de an o tei di së u „di taku mbeti” (Ako. 13:14-17). U di de o lei gbelingbelin taa de dë a Jehovah së, mbei dee felantima u Jehovah hati o boonu ku de gaanfa seei. Te u kaba fëën, dee tiima u di goonliba aki tuu o hopo go feti ku dee dinima u Gadu, dee dë a hii së u goonliba. Di soni aki di Bëibel ta kai di feti di Gögi u Magögi o hopo go feti ku dee sëmbë u Gadu.​—Eze. 38:14-16.

10. Andi Jehovah o du te dee felantima fëën o ko feti ku dee sëmbë fëën, te u luku Akoalimbo 19:19-21?

¹⁰ Andi Jehovah o du te de o hopo u de go feti ku dee sëmbë fëën? Jehovah seei ta piki u taa: „Hati u mi o boonu gaanfa seei” (Eze. 38:18, 21-23). Akoalimbo kapitë 19 ta piki u andi o pasa baka di dë. Jehovah o manda di Womi Mii fëën faa ko tjubi dee sëmbë fëën, söseei faa feti wini dee felantima u de. Jesosi o dë makandi ku „dee sodati u Masa Gaangadu köndë tuu”, de da dee ëngëli dee ta hoi deseei a Jehovah, ku dee 144.000 salufuwan (Ako. 17:14; 19:11-15). Unfa soni o dë baka di feti dë? Baka di feti dë, nöö na wan u dee sëmbë ku dee ölganisaasi dee bi ta hopo fia ku Jehovah o dë möön!​—Lesi Akoalimbo 19:19-21.

BAKA DI FETI, WAN TÖÖU O TÖÖU

11. Fuun gaan fanöudu soni di buku Akoalimbo ta taki?

¹¹ Pakisei unfa dee sëmbë dee bi hoi deseei a Gadu o fii te de pasa di gaan feti libilibi, nöö de si taa na wan u dee felantima u Gadu dë möön! A di ten dë, dee sëmbë o piizii pasa maaka! Hii fa de o wai seei a liba ala te di Gaan Babilon o kisi poi, tökuseei wan woto soni o pasa di o mbei de möön wai (Ako. 19:1-3). Di „Sikafu Mii musu toou ku di mujëë fëën”. Di soni aki da di möön fanöudu soni di di buku Akoalimbo ta taki fëën.​—Ako. 19:6-9.

12. Na un ten di Sikapu Mii o tööu, te u luku Akoalimbo 21:1, 2?

¹² Na un ten di tööu aki ta tööu? Hii dee 144.000 salufuwan o dë a liba ala ufö di feti u Amagedon bigi. Ma di Sikapu Mii an o tööu a di pisiten dë. (Lesi Akoalimbo 21:1, 2.) Di Sikapu Mii o tööu baka te de feti di feti fu Amagedon, söseei baka te hii dee felantima u Gadu poi kaba a sösö.​—Ps. 45:3, 4, 13-17.

13. Andi o pasa te di Sikapu Mii tööu?

¹³ Andi o pasa te di Sikapu Mii tööu? Wë leti kumafa wan tööu ta tja wan womi ku wan mujëë ko makandi, sö nöö di tööu u Könu Jesosi Keesitu ku dee 144.000 salufuwan o tja de ko makandi tu. Hii dee 144.000 salufuwan aki, da di mujëë u Jesosi. Di tööu aki o mbei taa wan njunjun tii ko dë, di o tii di goonliba 1000 jaa longi.​—Ako. 20:6.

WAN GAAN WAITI FOTO KU DEE BUNU DEE A O TJA KO DA I

14-15. Ku andi Akoalimbo kapitë 21 ta tei dee 144.000 sëmbë dee o tii makandi ku Jesosi maaka? (Luku di peentje u di kafiti.)

¹⁴ Akoalimbo kapitë 21 ta tei dee 144.000 sëmbë dee o tii makandi ku Jesosi, maaka ku wan gaan waiti foto de ta kai „di Njunjun Jelusalen” (Ako. 21:2, 9). Di foto aki abi 12 gaan sitonu di dë kuma di goonsei fëën. Nöö „hiniwan u dee sitonu abi di në u wan u de tuwalufu tjabukama u di Sikafu Mii sikifisikifi”. Faandi mbei di soni aki bi musu u hai Johanisi pakisei? Wë u di a bi si di në fëën sikifisikifi a wan u dee sitonu. Di soni aki bi dë wan gaandi seei!​—Ako. 21:10-14; Ef. 2:20.

¹⁵ Di foto aki da wan apaiti foto. A abi wan gaan pasi di mbei ku goutu wanwan, söseei a abi 12 gaandöö di mbei ku di weti konda de kai paaleli, nöö dee peni u di foto ku di goonsei u di peni, mbei ku peipei djamati sitonu. Hii soni u di foto aki bi dë maakamaaka sililii (Ako. 21:15-21). Ma tökuseei wan soni bi ta makei. Johanisi bi taki taa: „Nöö fa mi si di köndë naandë, nöö Wosu u Gadu an dë nëën dendu e. An dë fanöudu, biga Masa Gaangadu di abi hii makiti, ku di Sikafu Mii, nöö de dë a hii di köndë kaa. [An dë fii go a kamian u go begi de möön.] Nöö sonu ku libawojo an dë fanöudu u tuwë limbo da di köndë tu. Biga di waiti u Gadu ku di limbo u di Sikafu Mii ta tuwë limbo da hii di köndë kaa” (Ako. 21:22, 23). Dee sëmbë dee o dë sëmbë u di Njunjun Jelusalen o ta dë ku Jehovah hii juu (Heb. 7:27: Ako. 22:3, 4). Nöö hën da Jehovah ku Jesosi da di Wosu u Gadu u di foto dë.

16. Andi o pasa ku libisëmbë a di pisiten di di Könuköndë u Gadu o tii wan dusu jaa longi?

¹⁶ A dë wan gaan piizii soni da dee salufuwan u de pakisei soni u di foto aki. Ma dee sëmbë dee o libi u teego a goonliba aki seei musu buta pakisei a di foto aki tu. A di pisiten di di Könuköndë u Gadu o tii wan dusu jaa longi, nöö di Njunjun Jelusalen o tja gaan bunu ko a goonliba. Johanisi bi si dee gaan bunu aki ta kule kuma „di lio di abi di wata u di libi u teego”. Nöö a de tu së bandja tela u di lio, i abi di pau de ta kai „Di Pau u di Libi u Teego”. Nöö di uwii fëën ta kula hii nasiön u goonliba (Ako. 22:1, 2). Hii sëmbë a goonliba o feni wini u dee bunu soni aki. Söseei hii dee libisëmbë dee ta piki Jehovah buka o ko dë sëmbë di an abi zöndu möön. Siki ku pen an o dë möön, söseei di këë di sëmbë ta këë u di de ta tjali seei an o dë möön tu.​—Ako. 21:3-5.

17. Ambë o feni wini u di Dusu Jaa Tii, te u luku Akoalimbo 20:11-13?

¹⁷ Ambë o feni wini u dee gaan bunu aki? Dee fosu sëmbë dee o feni wini u de, da dee gaan hia sëmbë dee o pasa Amagedon libilibi ku dee mii di de o pai a di njunjun goonliba. Ma Akoalimbo kapitë 20 ta paamusi u tu taa dee dëdë sëmbë o weki ko a libi baka. (Lesi Akoalimbo 20:11-13.) Dee sëmbë dee bi libi bunu a Gadu wojo, o weki ko a libi baka. Söseei dee sëmbë dee an bi libi bunu a Gadu wojo o weki ko a libi baka, u di de an bi feni di okasi u lei soni u Jehovah Gadu (Tjab 24:15; Joh. 5:28, 29). Di soni aki kë taki taa hii libisëmbë o weki ko a libi baka te di Könuköndë u Gadu o tii wan dusu jaa u? Wë nönö. Dee sëmbë dee an bi kë dini Jehovah ufö de dëdë, an o ko a libi baka. De bi feni di okasi kaa u de dini Jehovah, ma di fasi fa de bi libi bi lei taa de an fiti u libi a di Paladëisi a goonliba aki.​—Mat. 25:46; 2 Tes. 1:9; Ako. 17:8; 20:15.

DI LASITI TESI

18. Unfa soni o dë a goonliba aki a kaba u dee 1000 jaa?

¹⁸ Baka di 1000 jaa, nöö hii dee sëmbë dee o ta libi a goonliba aki an o abi zöndu möön. Na wan sëmbë o ta tja sitaafu möön u di zöndu di Adam du (Lom. 5:12). Na wan u dee fuka dee Adam bi tja ko u di a bi du zöndu o dë möön. A di fasi aki, u sa taki taa dee sëmbë dee o dë a goonliba aki o „toona weki”, nöö de o ko dë sëmbë di an abi zöndu möön te di 1000 jaa kaba.​—Ako. 20:5.

19. Faandi mbei wan lasiti tesi dë fanöudu?

¹⁹ U sabi taa hii fa Saatan bi mbei möiti u Jesosi bia baka da Jehovah, tökuseei Jesosi finga futu dëën. A bi hoi hënseei a Gadu, hii fa tesi bi ta miti ën. Ma hii libisëmbë o hoi deseei a Jehovah te Saatan o pooba de u? Hiniwan sëmbë o sa piki di hakisi aki da hënseei te de puu Saatan a di baaku baka 1000 jaa (Ako. 20:7). Dee sëmbë dee o hoi dou a di lasiti tesi aki o kisi di libi u teego, nöö de o ta wai seei u di de o ko fii tuutuu seei (Lom. 8:21). Jehovah o poi Saatan ku dee taku jeje, ku dee sëmbë dee an kë saka deseei a Jehovah basu.​—Ako. 20:8-10.

20. Unfa dee sipan tjabukama woto u di buku Akoalimbo ta mbei i fii?

²⁰ Unfa i ta fii baka di i toona lei wantu soni u di buku Akoalimbo? I ta wai te i ta pakisei unfa joo dë a di ten di dee tjabukama woto aki o pasa u? Di soni aki an ta mbei i kë kai woto sëmbë u de ko dini di tuutuu Gadu makandi ku i tu ö? (Ako. 22:17) Wë baka di u luku dee soni dee o pasa a di ten di ta ko, nöö leti kuma apösutu Johanisi, useei kë taki taa: „Soni antoobi, Masa Jesosi. Ko fii nöö!”​—Ako. 22:20.