Un dee mama ku dee tata, un heepi dee mii fuunu u de ko lobi Jehovah

1-2. Konda faandi mbei u ta ko si so tëkisi kuma fanöudu tëkisi te wan soni tooka a di libi fuu.

A LO’ u pasa taa te wan womi ku wan mujëë ta tööu, nöö wan gaanwomi u kemeente ta hoi wan taki da de di nama ku di tööu libi. Dee tëkisi di di baaa o lesi da de, da tëkisi di de sabi kaa. Ma fa de o tööu, nöö di womi ku di mujëë ta si taa a dë fanöudu u de buta pakisei a dee tëkisi dë möön gaanfa. Faandi mbei? Wë u di de musu wooko ku de a di tööu libi u de.

² Sö nöö a dë te wan womi ku wan mujëë di dë Keesitu sëmbë pai miii. Kandë sömëni jaa longi de ta jei taki di nama ku di fasi fa sëmbë musu kiija miii. Ma fa de ko abi miii, nöö dee soni di de o jei a dee lö taki dë, o möön hai de pakisei. Wan gaan faantiwöutu wë de abi dë e! Wë u ta si taa te soni ta tooka a di libi fuu, nöö u ta si so Bëibel tëkisi woto fasi. De ta ko dë fanöudu tëkisi da u. Di soni aki mbei dee dinima u Jehovah ta lesi di Wöutu u Gadu, ta kai pakisei a dee soni di de ta lesi, leti kumafa dee könu u Isaëli bi ta du ën.​—Deto. 17:19.

3. Fuun soni woo taki a di woto aki?

³ Un dee mama ku dee tata, un abi wan apaiti gaandi. Un abi di gaandi fuun lei dee mii fuunu soni u Jehovah. Ma na lei nöö un musu ta lei de soni u Gadu nöö a kaba. Ma un musu heepi de u de ko möön lobi ën. Unfa un sa heepi dee mii fuunu u de ko lobi Jehovah? A di woto aki, woo taki u fö mama wëti u Bëibel di sa heepi unu (2 Tim. 3:16). Söseei woo luku unfa so baaa ku sisa di abi miii, bi feni wini di de bi wooko ku dee soni dee sikifi a di Bëibel.

FÖ MAMA WËTI DI SA HEEPI MAMA KU TATA

4. Andi da wan mama wëti di sa heepi mama ku tata u de heepi dee mii u de, u de ko lobi Jehovah? (Jakobosi 1:5)

⁴ Di fosu mama wëti: Suku heepi a Jehovah. Hakisi Jehovah faa da i di köni di i abi fanöudu fii sa heepi dee mii fii u de ko ta lobi ën. (Lesi Jakobosi 1:5.) Jehovah da di möön bunu Sëmbë u piki i andi i musu du. Sömëni soni mbei u sa taki di soni dë. Boo taki u tu u de. Di fosuwan da, Jehovah da wan Tata di abi öndöfeni möön hii sëmbë (Ps. 36:9). Di u tu soni da, dee köni lai dee a ta da u ta tja wini ko da u hii juu.​—Jes. 48:17.

5. (a) Unfa di ölganisaasi u Jehovah ta heepi dee sëmbë dee abi miii? (b) Andi i lei u di fasi fa Baaa Amorim ku Sisa Amorim bi kiija dee mii u de, te i luku di fëlön?

⁵ Jehovah ta lei dee gaansëmbë dee abi mii sömëni soni u Bëibel di sa heepi de u de kiija dee mii u de a sö wan fasi taa de ko ta lobi ën (Mat. 24:45). I sa feni soni a dee woto de kai „Hulp voor het gezin”, di de bi ta sikifi sömëni jaa longi buta a dee Ontwaakt! fuu, ma nöunöu i sa feni de a di website fuu. Boiti di dë, sömëni fëlön dë a jw.org di sa da sëmbë di abi miii taanga u de ta piki Jehovah buka te de ta kiija dee mii u de.b​—Nöng. 2:4-6.

6. Unfa wan baaa ta si di heepi di hën ku hën mujëë ta feni u di ölganisaasi u Jehovah?

⁶ Sömëni mama ku tata bi taki unfa de ta tei dee soni di Jehovah ku di ölganisaasi fëën ta seeka da de u bigi. Wan womi de kai Joe, di abi mii bi taki taa: „An dë wan kösökösö soni u kiija dii mii ku di tuutuu lei. Mi ku mi mujëë ta begi hii juu, ta hakisi Jehovah faa heepi u. Nöö a lo’ u pasa taa wan woto, nasö wan fëlön ta ko a döö di ta heepi u ku di fuka fuu. Hii juu u ta suku heepi a Jehovah.” Joe ku hën mujëë bi ko si taa dee woto ku dee fëlön ta heepi dee mii u de u de ko dë mati u Jehovah.

7. Faandi mbei a dë fanöudu taa mama ku tata ta köni ku dee soni di de ta du? (Loomë 2:21)

⁷ Di u tu mama wëti: I musu dë wan sëmbë di de sa djeesi. Miii ta luku dee gaansëmbë u de fini, nöö de lo’ u du andi de ta du. Mama ku tata o ta mbei föutu so juu (Lom. 3:23). Hii fa a dë sö, tökuseei de musu ta mbei taanga möiti u du soni a wan bunu fasi, sö taa dee mii u de sa djeesi de. (Lesi Loomë 2:21.) Wan womi di abi miii bi taki wan soni u lei unfa miii dë. A bi taki taa: „Miii dë kuma sipönsu di ta hai hii soni tei. De ta piki u te wa ta du dee soni dee u ta piki de u de du.” Fëën mbei ee u kë u dee mii fuu lobi Jehovah, nöö useei musu lobi Jehovah ku hii u hati, söseei a musu dë u si taa sö u lobi ën tuutuu.

8-9. Andi i lei u dee soni dee Andrew ku Emma bi taki?

⁸ Sömëni fasi dë fa sëmbë sa heepi dee mii u de u de ko lobi Jehovah. Wan baaa de kai Andrew, di abi 17 jaa bi taki taa: „Mi mama ku mi tata bi ta lei mi hii juu taa begi dë wan fanöudu soni. Hiniwan ndeti mi tata bi ta begi makandi ku mi, aluwasi ee miseei bi begi kaa. Hii juu de bi ta mëni u taa u sa ta fan ku Jehovah un mëni pasi u kë. Di soni dë mbei mi ta si begi kuma wan fanöudu soni. Nöunöu an ta taanga da mi u mi begi, söseei an ta taanga da mi u mi si taa Jehovah da wan Tata di lobi mi.” Un dee mama ku dee tata, un hoi a pakisei taa di lei di un ta lei taa un lobi Jehovah, sa heepi dee mii fuunu u de ko lobi ën tu.

⁹ Boo buta pakisei a di woto u wan sisa de kai Emma. Di sisa aki tata bi go disa hën, ku hën mama, ku hën piki sisa. A di pisiten di a bi go disa de, a bi abi gaan hia paima u paka, nöö a bi ko pasa taa hën mama bi musu paka hii dee paima dë. Emma bi taki taa: „So juu mi mama an bi abi möni tjika u du so soni, ma hii juu a bi ta taki unfa Jehovah ta heepi dee dinima fëën. Te mi bi ta luku di fasi fa mi mama bi ta libi, nöö mi bi ta si gbelingbelin taa a bi ta biibi di soni dë tuutuu. A bi ta du dee soni dee a bi ta lei mi u mi du.” Andi u ta lei? Wë u ta lei taa mama ku tata sa dë sëmbë di dee mii u de sa djeesi, aluwasi ee soni ta taanga da de.​—Gal. 6:9.

10. Un ten sö dee Isaëli sëmbë bi sa feni okasi u konda soni u Jehovah da dee mii u de? (Detolonomi 6:6, 7)

¹⁰ Di u dii mama wëti: I musu ta da woto ku dee mii fii. Jehovah bi piki dee Isaëli sëmbë taa de musu ta lei dee mii u de soni fëën hii juu. (Lesi Detolonomi 6:6, 7.) Dee Isaëli sëmbë bi abi sömëni okasi hiniwan daka u de heepi dee mii u de u de ko lobi Jehovah. Kandë wan njönku womi mii o wooko goon sömëni juu longi makandi ku hën tata. Nöö kandë hën sisa o dë ku de mama ta heepi ën nai soni, nasö u heepi ën ku woto wooko a wosu. Te dee gaansëmbë ku dee mii u de ta wooko makandi sö, nöö de sa feni okasi u konda soni da dee mii u de. De sa lei de unfa Jehovah abi bunuhati tjika, söseei unfa a ta heepi de a di wosudendu.

11. Na un ten mama ku tata di dë Keesitu sëmbë sa ta da woto ku dee mii u de?

¹¹ Di libi an dë kuma fosu möön. A sömëni köndë, mama ku tata ku mii an sa ta dë makandi hii di daka. Kandë dee gaansëmbë musu go a wooko, nöö kandë dee mii nango a siköö. Di soni aki mbei dee gaansëmbë musu ta suku okasi u de sa ta da woto ku dee mii u de (Ef. 5:15, 16; Fil. 1:10). Sö wan okasi sa dë te de ta hoi di Wosudendu Dini. Wan njönku baaa de kai Alexander bi taki taa: „Hii juu mi tata ta seeka soni fuu sa ta hoi di Wosudendu Dini, nöö an ta mbei na wan soni tapa u fu wa hoi di Wosudendu Dini. Te u hoi ën te u kaba, nöö u ta da woto ku useei go dou.”

12. Andi wan hedima u wan wosudendu musu hoi a pakisei te a ta hoi di Wosudendu Dini?

¹² Andi i kuma wan hedima u wan wosudendu sa du u dee mii fii lobi di Wosudendu Dini? Wë a bi sa dë wan bunu soni seei fii lei dee mii fii soni ku di njunjun buku fuu de kai I sa dë waiwai u teego! Di buku aki ta da unu di okasi fuun ta da woto ku unuseei. An dë u taki taa i kë taa dee mii fii musu konda da i andi de ta pakisei, söseei i kë taa de musu konda dee bookohedi u de da i. Fëën mbei na tei di Wosudendu Dini kuma wan okasi u bai de a soni. Söseei mbei möiti u hati fii an boonu te so juu de taki soni di an ta kai ku Bëibel. Ka u di dë, i musu tei ën u bigi taa de ta piki i unfa de ta fii, nöö da de taanga u de ta du di soni dë hii juu. Te i sabi unfa dee mii fii ta si soni tuutuu, nöö nëën ufö joo sa heepi de a di möön bunu fasi.

13. Na un ten gaansëmbë sa ta heepi dee mii u de, u de ko dë mati u Jehovah?

¹³ Un dee mama ku dee tata, hiniwan daka un musu ta suku okasi fuun heepi dee mii fuunu u de ko dë mati u Jehovah. An dë fuun wakiti u te woon lei de soni u Bëibel ufö woon lei de soni u di Gadu fuu. Wan mujëë de kai Lisa, abi miii. Nöö a bi taki taa: „U bi ta luku dee mbeimbei soni u Jehovah, nöö u bi ta tei dee soni dë u lei dee mii fuu soni u Jehovah. Te di dagu fuu bi du wan soni di mbei dee mii fuu lafu, nöö u bi ta lei de taa di soni dë ta lei taa Jehovah da wan piizii Gadu, nöö a mbei soni a sö wan fasi taa useei sa ta piizii tu.”

14. Faandi mbei a dë fanöudu taa gaansëmbë heepi dee mii u de u de ko abi bunu mati? (Nöngö 13:20)

¹⁴ Di u fö mama wëti: Heepi dee mii fii u de ko abi bunu mati. Di Wöutu u Gadu ta taki gbelingbelin taa dee sëmbë dee u ta tei ko mati fuu sa mbei u du bunu soni, nasö de sa mbei u du soni di an bunu. (Lesi Nöngö 13:20.) Un dee mama ku dee tata, un sabi dee mati u dee mii fuunu ö? Un miti de wan daka kaa u, nasö un bi da woto ku de wan daka kaa u? Andi i sa du u heepi dee mii fii u de ko abi mati di lobi Jehovah? (1 Kol. 15:33) I sa heepi de u de ko abi bunu mati, te i ta kai sëmbë di dë mati u Jehovah ko a i pisi, u de du soni makandi ku unu.​—Ps. 119:63.

15. Andi gaansëmbë sa du u heepi dee mii u de u de ko abi bunu mati?

¹⁵ Boo luku di woto u wan baaa de kai Tony. Di baaa aki ta konda andi hën ku hën mujëë bi du u heepi dee mii u de u de ko abi bunu mati. A bi taki taa: „Sömëni jaa longi, mi ku mi mujëë bi ta kai peipei baaa ku sisa ko a u pisi. Njönkuwan ku dee ko gaandi tuu u bi ta kai. De bi ta njan makandi ku u, söseei de bi ta dë makandi ku u te u bi ta hoi Wosudendu Dini. A di lö fasi aki, i sa ko sabi dee baaa ku dee sisa dee lobi Jehovah, söseei dee ta dini ën waiwai. U bi ta tei dee keling-gaanwomi, dee sëmbë dee ta du di sëndëlengiwooko, ku woto baaa ku sisa a wosu. Nöö dee mii fuu lei sömëni soni u dee woto di de konda da de. De si unfa de bi dë fajafaja u du di diniwooko, söseei de si di wooko di de ta wooko taanga da Jehovah. Dee soni aki heepi dee mii fuu u de ko dë mati u Jehovah.” Un dee mama ku dee tata, un musu dë kabakaba u heepi dee mii fuunu u de ko abi bunu mati.

NA LASI HATI!

16. Andi i musu du ee wan mii fii taki taa an kë dini Jehovah?

¹⁶ Unfa a dë ee hii fa i mbei taanga möiti, tökuseei wan u dee mii fii taki taa an kë dini Jehovah? Na si kuma i da wan sëmbë di an sa’ u kiija mii bumbuu. Jehovah mbei hii u tuu a sö wan fasi taa u sa taki da useei andi u kë. Nöö hiniwan fuu musu taki ee woo dini Gadu, nasö ee wa o dini ën. Ee di mii fii taki taa an o dini Jehovah möön, ja musu si kuma an o dini Jehovah nöiti möön. Hoi di woto u di womi mii di bi lasi a pakisei (Luk. 15:11-19, 22-24). Di njönku kijoo dë bi du sömëni soni di an bi bunu, ma te u kaba fëën a toona ko baka. Ma wan sëmbë sa taki taa ’di woto dë da wan kontu. Di lö soni dë sa pasa tuutuu ö?’ Wë aai o, a sa pasa tuutuu! Di soni aki bi miti wan njönku kijoo de kai Elie.

17. Unfa di woto u Elie ta da i taanga?

¹⁷ Elie bi taki u dee gaansëmbë fëën taa: „De bi mbei möiti u heepi mi u mi lobi Jehovah ku di Wöutu fëën, di Bëibel. Ma di mi bi ko möön bigi, nöö ma bi kë piki de buka möön.” Elie bi bigi ta du soni di an bunu tjubitjubi. Hën mama ku hën tata bi mbei möiti faa dë zuntu ku Gadu, ma an bi haika de. Di a foloisi kumutu a dee gaansëmbë fëën pisi, hën a bi du soni di an bunu. Hii fa a bi dë sö, tökuseei so juu a bi ta konda soni u Bëibel da wan u dee mati fëën. Elie bi taki taa: „Möön mi bi ta konda soni u Jehovah da di mati u mi, möön mi bi ta pakisei soni u Jehovah. Pikipiki dee sii u dee Bëibel lei di dee gaansëmbë u mi bi mbei möiti u paandi a mi hati, bi bigi ta nasi.” Baka wan pisiten, hën Elie toona ko a Jehovah baka.c Dee gaansëmbë fëën bi musu u wai taa sensi di a bi njönku de bi mbei möiti u heepi ën faa ko lobi Jehovah.​—2 Tim. 3:14, 15.

18. Unfa i ta fii te i ta si gaansëmbë ta mbei taanga möiti u heepi dee mii u de, u de lobi Jehovah?

¹⁸ Un dee mama ku dee tata, Jehovah da unu wan apaiti gaandi. A da unu di gaandi fuun kiija miii dee o toon sëmbë di o dini ën bakaten (Ps. 78:4-6). Di soni aki an dë wan kösökösö soni u du. Ma un fiti gafa, u di un ta du hii soni di un sa du u heepi dee mii fuunu. Ee i ta mbei taanga möiti go dou u heepi dee mii fii u de ko lobi Jehovah, söseei ee i ta mbei taanga möiti go dou u heepi de u de ta piki hën buka, nöö i sa dë seiki taa di Tata fuu o fii bunu.​—Ef. 6:4.