Heepi dee mii u dee „woto köndë sëmbë”

1, 2. (a) Andi ta miti sömëni u dee mii dee foloisi go libi a wan woto köndë? (b) Un hakisi woo luku a di woto aki?

JOSHUA bi taki taa: „Sensi di mi sa’ u fan, hën mi ta fan di töngö di mi mama ku mi tata ta fan. Mi bi ta fan ën a wosu, söseei a di kemeente. Ma di mi bigi go a siköö, nöö di töngö u di köndë ka u bi foloisi go nöö mi bi ta kë fan. A wantu jaa dendu mi bi ta fan di töngö u di köndë wanwan. Ma bi ta fusutan dee soni dee u bi ta lei a dee komakandi, nöö ma bi ta fii kuma mi bi dë wan sëmbë u di köndë ka mi mama ku mi tata kumutu.” Na Joshua wanwan di soni aki ta miti.

² A di ten aki möön leki 240.000.000 sëmbë an ta libi a di köndë ka de bi pai de. Ee i da wan mama nasö wan tata di go libi a wan woto köndë, nöö unfa i sa heepi dee mii fii a wan möön bunu fasi u de ko lobi Jehovah, söseei u de „ta piki di lei u Masa Gadu”? (3 Johanisi 4) Nöö unfa woto sëmbë sa heepi de tu?

UN DEE MAMA KU DEE TATA, UN DU SONI U DEE MII FUUNU SA DJEESI UNU

3, 4. (a) Unfa mama ku tata sa du soni u dee mii u de sa djeesi de? (b) Andi mama ku tata an musu ta suku a dee mii u de?

³ Un dee mama ku dee tata, un musu buta pakisei gaanfa a dee soni dee un ta du, ee un kë dee mii fuunu ko dë gaan mati ku Jehovah, söseei ee un kë u de libi u teego. Te dee mii fuunu ta si taa un ta buta di Könuköndë a di fosu kamian a unu libi, nöö de o lei u buta futoou a Jehovah a dee soni di de abi fanöudu hiniwan daka (Mateosi 6:33, 34). Be di dini di un ta dini Jehovah dë a di fosu kamian a unu libi, ka fuun ta biinga a gudu baka. Un musu dë tifeedi ku dee soni dee un abi, nöö un musu mbei möiti fu wan go tei paima buta a unu liba. Un musu suku „gudu a Gadu Köndë ala”, hën da di feni di Jehovah o feni unu bunu, ma wan musu suku möni, nasö „bunu në a libisëmbë”.—Lesi Maikusi 10:21, 22; Johanisi 12:43.

⁴ Ja musu ta du woto soni sö tee taa ja ta abi ten da dee mii fii möön. Be de ko sabi taa i ta wai ku de te de ta buta Jehovah a di fosu kamian a de libi, ka u de ta suku nëbai nasö möni da i ku de tuu. Na ta pakisei taa miii hën musu mbei möiti u de mama ku de tata ko abi gudu. Hoi a pakisei taa „wan piki mii an musu ta sölugu ën tata ku ën mama, ma tata ku mama de ta sölugu piki mii”.—2 Kolenti 12:14.

UN DEE MAMA KU DEE TATA, UN HEEPI DEE MII FUUNU BE WAN TÖNGÖ AN DË WAN BOOKOHEDI DA DE

5. Faandi mbei mama ku tata musu ta konda soni u Jehovah da dee mii u de hii juu?

⁵ Di Bëibel bi taki a fesi taa sëmbë di „kumutu a hii dee peipei nasiön, di ta fan peipei töngö” o ko a di ölganisaasi u Jehovah (Sakalia 8:23). Ma ee dee mii fii an ta kaba fusutan di töngö di i ta fan, nöö a sa taanga da i fii lei de soni u di tuutuu lei. Dee mii fii da dee sëmbë dee i musu ta möön lei soni u Bëibel, nöö te „de ko sabi” soni u Jehovah, nöö de o sa feni di libi u teego (Johanisi 17:3). Ee i kë u dee mii fii ko sabi soni u Jehovah, nöö hii juu i musu „ta taki” soni fëën da de.—Lesi Detolonomi 6:6, 7.

6. Un wini dee mii fii o feni te de ko sabi di töngö fii? (Luku di peentje a bigi u di woto.)

⁶ Dee mii fii o lei di töngö u di köndë a siköö, nasö a woto sëmbë. Ma de o ko sa’ u fan di töngö fii te i ta fan ën ku de hii juu. Te dee mii fii ta fan di töngö fii, nöö an o taanga da de u de fan ku i, söseei u piki i unfa de ta pakisei. Ma dee mii sa feni woto wini te de ko sabi di töngö fii. Te dee mii fii ta fan möön leki wan töngö, nöö de o ko ta fusutan soni möön bunu, söseei de o sa ta fusutan unfa wotowan ta pakisei. A sa heepi de tu u de du möön soni a di dini u Jehovah. Di mama ku di tata u wan sisa de kai Carolina, seei da sëmbë di foloisi go libi a wan woto köndë. Carolina bi taki taa: „A bi suti seei di u bi dë a wan kemeente ka de ta fan wan woto töngö. Nöö a ta suti seei te i ta heepi a wan kamian ka möön peleikima dë fanöudu.”

7. Andi i sa du ee i si taa wan töngö ta da unu bookohedi a di wosudendu?

⁷ Te dee mii u sëmbë di foloisi go libi a wan woto köndë lei di töngö ku dee guwenti u di köndë, nöö so u de an ta kë fan di mamabëë töngö u de möön, nasö de an ta sa’ u fan ën möön. Wë un dee mama ku dee tata, ee un si taa sö a ta pasa ku dee mii fuunu, nöö a bi o bunu fuun lei di töngö u di köndë pikisö. An o taanga da i fii kiija dee mii fii kuma Keesitu sëmbë, te i ta fusutan andi de ta taki, te i ta fusutan dee poku di de ta haika nasö dee fëlön di de ta luku, söseei te de ta du siköö wooko, nasö te i musu fan ku dee sëmbë dee ta lei de soni a siköö. A dë sö tuu taa a ta tei ten u lei wan njunjun töngö, söseei i musu mbei möiti, nöö i musu abi sakafasi tu. Ma joo feni wini fëën. Ma boo taa di mii fii jesi ko booko. Ja bi o mbei möiti fii lei tapabukamatöngö fii sa fan ku ën u? Ja si kuma i musu du di wan seei soni da wan mii fii di ta möön fusutan wan woto töngö u?a—Luku di pisi a basu.

8. Unfa i sa heepi dee mii fii hii fa ja ta fan di töngö u di köndë wan bëtë?

⁸ A sa taanga da mama ku tata di foloisi go libi a wan woto köndë u fan di njunjun töngö di dee mii u de ta fan. Di soni aki sa mbei a möön taanga da de u heepi dee mii u de ko fusutan „Masa Gaangadu Buku” (2 Timoteo 3:15). Ee di soni aki ta miti i, tökuseei i sa heepi dee mii fii u de ko sabi Jehovah, söseei u de ko lobi ën. Wan gaanwomi de kai Shan, bi taki taa: „Di mama fuu an bi ta kaba fusutan di töngö di u bi ta fan, nöö mi ku dee sisa u mi seei an bi ta fan di töngö fëën wan bëtë. Ma te u bi ta si unfa a ta lei hënseei soni u Bëibel, fa a bi ta begi, söseei fa a bi ta mbei möiti u hoi di wosudendu dini hiniwan wiki, nöö u bi ta ko fusutan taa a dë fanöudu fuu ko sabi soni u Jehovah.”

9. Unfa mama ku tata sa heepi dee mii u de u de lei soni u Bëibel a tu töngö?

⁹ Kandë so miii musu lei soni u Jehovah a tu töngö. Faandi mbei? Wë u di dee mii aki ta fan wan töngö a siköö, nöö de ta fan wan woto töngö a wosu. Fëën mbei so mama ku tata ta wooko ku buku, soni u haika, söseei ku fëlön a dee tu töngö dë tuu. A dë gbelingbelin u si taa dee mama ku dee tata dee go libi a wan woto köndë musu mbei taanga möiti ee de kë heepi dee mii u de u ko lobi Jehovah.

NA UN KEMEENTE I MUSU GO?

10. (a) Ambë musu taki na un kemeente dee sëmbë u wan wosudendu musu go? (b) Andi wan hedima u wan wosudendu musu du ufö a taki andi de o du?

¹⁰ Te „woto köndë sëmbë” an ta libi zuntu ku di kemeente ka de ta fan di töngö u de, nöö de musu go a wan kemeente di ta fan di töngö u di köndë ka de foloisi go (Psalöm 146:9). Ma ee wan kemeente dë a zuntu di ta fan di töngö u de seei, nöö di hedima u di wosudendu musu luku un kemeente o möön bunu da dee sëmbë fëën. Ufö a taki andi a o du, a musu pakisei fundu fëën, söseei a musu begi Jehovah. A musu fan ku hën mujëë ku dee mii tuu (1 Kolenti 11:3). Andi ku andi a musu hoi a pakisei? Un mama wëti u Bëibel sa heepi ën faa sabi andi a musu du?

11, 12. (a) Unfa wan töngö sa heepi wan mii faa lei soni a dee komakandi? (b) Faandi mbei so miii an ta kë lei de mamabëë töngö?

¹¹ Mama ku tata musu pakisei luku andi dee mii u de abi fanöudu tuutuu. Ee de kë u dee mii fusutan dee tuutuu lei u Bëibel bunu, nöö na dee wantu juu dee de ta lei soni u Bëibel a dee komakandi nöö de abi fanöudu. Ma pakisei di soni aki: Te dee mii nango a wan komakandi ka de ta fan di töngö di de ta fusutan möön bunu, nöö dee mii ta feni wini fëën te de sai dë kaa. Kandë de o lei möön soni möön fa de mama ku de tata bi mëni seei. Ma dee mii an o lei soni ee de an ta fusutan di töngö bumbuu. (Lesi 1 Kolenti 14:9, 11.) Nöö aan fu dë sö taa dee soni di wan mii ta lei nëën mamabëë töngö o ta dou hën hati. So miii sa lei u da piki, u hoi wan demo nasö wan taki a de mamabëë töngö, ma an ta kumutu a de hati tuutuu.

¹² Na dee soni dee u ta taki a wan töngö nöö sa ta dou wan mii hati. Sö nöö a bi dë ku Joshua di u bi taki fëën a di woto aki. Di sisa fëën de kai Esther bi taki taa: „Di töngö u di mama ku di tata, dee guwenti u de, ku di biibi u de, tuu da soni di sa dou wan mii hati.” Ee miii an ta si kuma hën ku hën mama ku hën tata abi di wan seei guwenti, nöö kandë de an o kë lei di töngö u de mama ku de tata, söseei de an o kë tei di biibi u de tu. Andi mama ku tata di go libi a wan woto köndë sa du?

13, 14. (a) Faandi mbei wan womi ku hën mujëë ku dee mii u de bi foloisi go a wan kemeente di ta fan di töngö u di köndë? (b) Andi di mama ku di tata bi du u de ku Jehovah bi sa dë gaan mati u nöömö?

¹³ Mama ku tata di dë Keesitu sëmbë musu ta möön buta pakisei a dee soni u dee mii u de ka u de ta buta pakisei a soni u deseei (1 Kolenti 10:24). Di tata u Joshua ku Esther de kai Samuel, bi taki taa: „Mi ku mi mujëë bi öndösuku dee mii fuu fini fuu ko sabi ee na un töngö dee lei u Bëibel ta dou de hati, nöö u bi ta begi Jehovah faa da u köni tu. Di piki di u bi feni an bi kaba dë kumafa u bi pakisei. Ma di u si taa de an bi ta lei hia soni a dee komakandi a di töngö fuu, mbei u bi buta taa woo go a di kemeente ka de ta fan di töngö u di köndë. Hii u tuu bi nango makandi a dee komakandi ku di peleikiwooko. U bi ta kai dee baaa ku dee sisa u di köndë u de ko njan a u pisi, söseei u bi nango köi makandi ku de. Hii dee soni aki bi heepi dee mii fuu u de ko sabi dee baaa ku dee sisa möön bunu. Nöö a bi heepi de söseei u de ko sabi Jehovah kuma de Gadu, de Tata, ku de Mati. U bi ta si di soni aki möön fanöudu möön di lei di de musu lei di töngö fuu.”

¹⁴ Samuel bi taki möön taa: „U di mi ku mi mujëë bi kë u di biibi fuu ko möön taanga, mbei u bi nango a dee komakandi u wan kemeente ka de ta fan di töngö fuu. U bi ta abi sömëni soni u du, nöö u bi ta wei seei. Ma u ta da Jehovah tangi u di a bi mbei u feni gaan bunu da dee möiti dee u bi mbei. Hii dee dii mii fuu ta du di hii-ten diniwooko.”

DEE SONI DEE NJÖNKUWAN SA DU

15. Unfa a du ko taa wan sisa de kai Kristina bi ko si taa a sa du möön soni a wan kemeente di ta fan di töngö u di köndë?

¹⁵ Te miii ta ko bigi, nöö de ta ko fusutan taa de sa dini Jehovah möön bunu a wan kemeente di ta fan di töngö di de ta fusutan möön bunu. Ee dee mii du di soni aki, nöö de mama ku de tata an musu ta si kuma go dee mii nango disa de. Kristina bi taki taa: „Mi sabi dee fanöudu soni u di töngö u mi mama ku mi tata, ma di töngö di de bi ta fan a dee komakandi bi taanga da mi u fusutan. Di mi bi abi 12 jaa, hën mi bi go a di könklësi di de bi hoi a di töngö di de ta fan a di siköö u mi. A bi dë di fosu pasi di mi bi fusutan taa dee soni dee mi bi ta jei da tuutuu soni! Wan woto bunu soni bi pasa di mi bi bigi ta begi a di töngö di mi bi lei a siköö. Mi bi sa fan ku Jehovah ku hii mi hati!” (Tjabukama 2:11, 41) Di Kristina bi tapa 18 jaa, hën a fan ku hën mama ku hën tata u di soni aki. Hën a foloisi go a di kemeente di ta fan di töngö u di köndë. A bi taki taa: „Di mi bigi lei soni u Jehovah a di töngö di mi lei a siköö, hën mi bigi du möön soni da Jehovah.” Kristina ko ta du di pioniliwooko, nöö a dë waiwai seei.

16. Faandi mbei Nadia ta wai taa a bi fika a di kemeente di ta fan di töngö fëën mama ku hën tata?

¹⁶ Un dee njönkuwan, un bi o kë go a wan kemeente di ta fan di töngö u di köndë ka un dë u? Ee sö a dë, nöö hakisi iseei faandi mbei i kë du ën. Di go di joo go a wan woto kemeente o heepi i fii ku Jehovah dë gaan mati ö? (Jakobosi 4:8) I kë go a wan woto kemeente u di ja kë fii mama ku i tata ta si hiniwan soni di i ta du ö, nasö u di ja kë go a fesi a di biibi ö? Wan sisa de kai Nadia di ta wooko nöunöu a Bëtëli bi taki taa: „Di mi ku dee baaa ku dee sisa u mi bi njönku, nöö u bi kë go a di kemeente ka de ta fan di töngö u di köndë.” Ma de mama ku de tata bi sabi taa ee dee mii u de go a di kemeente dë, nöö kandë de ku Jehovah an bi o dë mati möön. Nadia taki tu taa: „Ma nöunöu u dë ku tangi a hati taa u mama ku u tata bi mbei möiti u lei u di töngö di de ta fan, söseei taa de bi hoi u a di kemeente di ta fan di töngö u de. A bi heepi u fuu du möön soni da Jehovah, söseei fuu feni okasi fuu heepi wotowan u de ko sabi Jehovah.”

UNFA WOTOWAN SA HEEPI

17. (a) Ambë Jehovah da di faantiwöutu u kiija miii? (b) Unfa mama ku tata sa suku heepi a wotowan u de lei dee mii u de soni u di tuutuu lei?

¹⁷ Jehovah da mama ku tata di faantiwöutu u lei dee mii u de di tuutuu lei. Ma Jehovah an da dee mii avo nasö woto sëmbë di faantiwöutu u lei de di tuutuu lei. (Lesi Nöngö 1:8; 31:10, 27, 28.) Tökuseei mama ku tata di an sa fan di töngö u di köndë ka de go, abi woto sëmbë fanöudu u heepi de u di tuutuu lei dou a dee mii u de hati. Te dee mama ku dee tata ta hakisi woto sëmbë u heepi de, nöö an kë taki taa de an kë tja di faantiwöutu di de abi u kiija dee mii u de. Ma a nama ku di kiija de ta kiija dee mii u de a „wan leti fasi ta lei de kumafa Masa Gadu kë u de musu libi” (Efeise 6:4). Mama ku tata sa hakisi dee gaanwomi u di kemeente unfa de musu hoi di wosudendu dini, söseei u heepi de u suku bumbuu mati da dee mii u de.

18, 19. (a) Unfa woto Keesitu sëmbë sa heepi dee njönkuwan? (b) Andi mama ku tata musu ta du hii juu?

¹⁸ Ee mama ku tata kë heepi dee mii u de, nöö so juu de sa ta kai woto baaa ku sisa u ko a di wosudendu dini u de. Söseei sömëni njönkuwan ta lei soni a woto Keesitu sëmbë te de nango peleiki makandi ku de, söseei te de ta du woto soni makandi (Nöngö 27:17). Shan di u taki fëën kaa, bi taki taa: „Ma sa fëëkëtë dee baaa dee bi ta buta pakisei a mi. Te de bi ta heepi mi u hoi wan taki a di kemeente, nöö hii juu mi bi ta lei möön soni. Nöö mi bi lobi te u bi nango piizii makandi.”

¹⁹ Dee sëmbë di dee mama ku dee tata ta hakisi u heepi dee mii u de musu ta da dee mii taanga u ta lesipeki de mama ku de tata hii juu. De sa du di soni aki te de ta taki bunu soni u di mama ku di tata u di mii, söseei de an musu tei di faantiwöutu di di mama ku di tata abi u kiija di mii u de. Söseei dee sëmbë di ta heepi de an musu du na wan soni di an fiti da sëmbë di dë Kotoigi, söseei da sëmbë di an dë Kotoigi (1 Petuisi 2:12). Hii fa mama ku tata sa hakisi wotowan u heepi de, tökuseei de abi di faantiwöutu u lei dee mii u de soni u di tuutuu lei. De musu ta sabi unfa woto Keesitu sëmbë ta heepi dee mii u de.

20. Unfa mama ku tata sa heepi dee mii u de u de ko dë dinima u Jehovah di ta hoi deseei nëën?

²⁰ Un dee mama ku dee tata, un musu ta begi Jehovah faa heepi unu, nöö un musu du hii soni di un sa du fuun heepi dee mii fuunu. (Lesi 2 Kloniki 15:7.) Di dë di di mii fii musu dë mati ku Jehovah musu dë di möön fanöudu soni da i. Du andi i sa du u di Wöutu u Gadu dou di mii fii hati. Hii juu i musu abi di biibi taa di mii fii sa toon wan dinima u Jehovah. Te dee mii fii ta du andi di Wöutu u Gadu ta taki, söseei te de ta djeesi i, nöö joo fii kumafa apösutu Johanisi bi ta fii di a bi taki taa: „Te mi ta jei sö taa dee mii u mi ta piki di lei u Masa Gadu, nöö mi ta wai te na soni. Soni seei an dë a goonliba di ta da mi wai kuma di dë.”—3 Johanisi 4.