Jehovah ta buta pakisei a dee sëmbë fëën

1. Faandi mbei Jesosi bi hakisi Jehovah faa tjubi dee bakama fëën?

JESOSI bi hakisi hën Tata wan apaiti soni, di ndeti ufö dëdë. A bi hakisi hën Tata faa tjubi dee bakama fëën (Joh. 17:15, 20). An dë u taki taa hii juu Jehovah bi ta booko hën hedi ku dee sëmbë fëën, söseei hii juu a bi ta tjubi de. Ma Jesosi bi sabi taa Saatan o du ku dee bakama fëën seei. Söseei a bi sabi taa de o abi Jehovah fanöudu u heepi de u de finga futu da Didibi.

2. Faandi mbei wa musu fëëë te tesi ta miti u, te u luku Psalöm 33:18-20?

² Di goonliba u Saatan ta mbei soni ta taanga da dee tuutuu Keesitu sëmbë a di ten aki. Tesi ta miti u di sa mbei u lasi hati, söseei di sa mbei wa hoi useei a Jehovah möön. Ma a di woto aki, woo si taa wa abi fu fëëë na wan soni. Jehovah ta si dee fuka fuu, nöö a dë kabakaba u heepi u. Woo taki u tu woto di sikifi a Bëibel di ta lei u unfa Jehovah „ta buta pakisei a dee sëmbë dee ta lesipeki ën”.​—Lesi Psalöm 33:18-20.

TE U TA FII KUMA U DË U WANWAN

3. Na un ten u sa ta fii kuma u dë u wanwan?

³ Hii fa u abi sömëni baaa ku sisa a di kemeente, tökuseei so juu u sa ta fii kuma u dë u wanwan. Kandë dee njönkuwan dee nango a siköö, sa ta fii kuma sëmbë an dë u heepi de te de musu hopo taki u di biibi u de a siköö, nasö de sa ta fii kuma de dë de wanwan te de go a wan njunjun kemeente. So fuu sa ta fii bookosaka, u di u ta si kuma sëmbë an dë u heepi u. Kandë wa o kë fan ku wotowan u di fasi fa u ta fii, u di u ta fii kuma de an o fusutan u. Nöö so juu u sa ta hakisi useei ee sëmbë dë seei di ta booko de hedi ku u. U sa ko dë ku bookohedi te u ta fii kuma u dë u wanwan. Ma Jehovah an kë fuu fii sö. Faandi mbei u sa taki di soni aki?

4. Faandi mbei di tjabukama Elia bi taki taa: „Mi wanwan nöö dë aki jeti”?

⁴ Boo luku di woto u wan womi de kai Elia, di bi ta dini Jehovah ku hii hën hati. Iseibëli bi paamusi ën taa a bi o kii ën. Fëën mbei a fusi go tjubi möön leki 40 daka longi (1 Kön. 19:1-9). Di a bi dë hën wanwan a wan sitonu baaku, hën a bai piki Jehovah taa: „Mi wanwan nöö dë [tjabukama] aki jeti” (1 Kön. 19:10). Ma woto tjabukama bi dë a di köndë jeti. Obadja bi tjubi 100 tjabukama sö taa Iseibëli an feni de kii (1 Kön. 18:7, 13). Wë faandi mbei Elia bi fii kuma a bi dë hën wanwan? Kandë a bi mëni taa dee tjabukama dee Obadja bi tjubi, bi ko lasi libi. Nasö kandë u di woto sëmbë an bi bigi dini Jehovah, hii fa Jehovah bi lei de a di kuun de kai Kamëli taa hën da di tuutuu Gadu. Ma a kan tu taa a bi ta fii kuma na wan sëmbë bi sabi taa dee felantima fëën bi kë kii ën, nasö taa sëmbë an bi ta booko de hedi ku ën. Di Bëibel an konda hii soni da u finifini. Ma di soni di u sabi, hën da taa Jehovah bi fusutan faandi mbei Elia bi fii kuma a bi dë hën wanwan, söseei taa Jehovah bi sabi unfa a bi o heepi ën.

5. Unfa Jehovah bi lei Elia taa an bi dë hën wanwan?

⁵ Jehovah bi du sömëni soni u heepi Elia. A bi da Elia pasi faa konda unfa soni dë dëën. Tu pasi Jehovah hakisi Elia taa: „Faandi mbei i ko aki?” (1 Kön. 19:9, 13) Dee tu pasi dë tuu Jehovah bi haika Elia di a bi ta konda unfa a bi ta fii. Jehovah bi piki Elia u di a bi lei ën taa a dë ku ën, söseei a bi lei ën unfa a abi makiti tjika. Jehovah bi piki Elia tu taa sömëni woto dinima fëën bi dë jeti (1 Kön. 19:11, 12, 18). A musu u dë sö taa Elia bi fii bunu seei baka di a bi konda hii soni da Jehovah, söseei baka di a si unfa Jehovah piki ën. Jehovah bi da Elia wantu gaan faantiwöutu. A bi piki ën faa buta Hasaëli könu u Silia, faa buta Jehu könu u Isaëli, söseei faa buta Elisa ko tjabukama (1 Kön. 19:15, 16). Dee faantiwöutu di Jehovah bi da Elia aki, bi mbei taa Elia bi sa buta hii ën pakisei a soni di bi sa mbei a dë waiwai baka. Jehovah bi dëën wan mati tu, hën da Elisa. Unfa Jehovah sa heepi i te i ta fii kuma i dë i wanwan?

6. Fuun soni i sa ta begi te i ta fii kuma i dë i wanwan? (Psalöm 62:8)

⁶ Jehovah kë fii ta begi ën. A ta si dee fuka dee ta miti i, nöö a ta paamusi i taa hii juu a o ta haika dee begi fii (1 Tes. 5:17). A ta suti dëën te dee dinima fëën ta fan ku ën (Nöng. 15:8). Fuun soni i sa ta begi te i ta fii kuma i dë i wanwan? Wë leti kuma Elia, i sa konda hii soni di dë a i hati da Jehovah. (Lesi Psalöm 62:8.) Konda dee bookohedi fii dëën. Nöö hakisi ën faa heepi i fii ko sabi andi i musu du te i ta fii kuma i dë i wanwan, nasö te i ta fii tjali. Ee i ta fii kuma i dë i wanwan, nasö ee i ta fëëë te dee mii fii kalasi ta hakisi i soni u di biibi fii, nöö i sa hakisi Jehovah faa da i degihati fii sa taki wan soni. I sa hakisi ën faa da i köni seei tu fii sa konda soni u di biibi fii da de (Luk. 21:14, 15). Ee i ta fii bookosaka, nöö i sa hakisi Jehovah faa da i taanga fii go suku heepi a wan baaa nasö wan sisa di dë wan gaangaan sëmbë a di biibi. I sa hakisi Jehovah faa heepi di baaa nasö di sisa dë faa fusutan unfa i ta fii. Konda hii soni da Jehovah, buta pakisei a di fasi fa a o piki dee begi fii, söseei mbei wotowan heepi i. Te i ta du dee soni aki, nöö ja o ta fii kuma i dë i wanwan möön.

7. Andi i ta lei u di woto u Mauricio?

⁷ Jehovah da hiniwan fuu wooko fuu du. I sa dë seiki taa a ta tei hii dee soni dee i ta du a di kemeente, nasö a di peleikiwooko u bigi (Ps. 110:3). Unfa dee soni dë sa heepi i te i ta fii kuma i dë i wanwan? Boo luku di woto u wan njönku baaa de kai Mauricio.b Kölö sö baka di Mauricio dopu, hën pikipiki wan u dee gaan mati fëën bigi go disa di tuutuu lei. A bi taki taa: „Di mi bi si taa a bi nango disa Jehovah, hën mi bi bigi ta fii kuma ma bi o sa hoi dou. Mi bi ta hakisi miseei ee mi bi o sa hoi miseei a di soni di mi bi paamusi Jehovah, nöö mi dini ën go dou. Mi bi fii kuma mi bi dë mi wanwan, söseei taa sëmbë an bi ta fusutan mi.” Andi bi heepi Mauricio? A bi taki taa: „Mi bi bigi ta peleiki möön hia. Di soni aki bi heepi mi u ma buta pakisei a miseei, ku dee bookohedi u mi. Mi bi ta dë waiwai, söseei ma bi ta fii kuma mi dë mi wanwan möön, u di mi bi ta wooko makandi ku wotowan a di peleikiwooko.” Aluwasi ee wa sa ta miti ku wotowan fuu peleiki makandi, tökuseei u ta feni taanga te u ta sikifi biifi makandi ku de, nasö te u ta bëli sëmbë u peleiki da de. Un woto soni bi heepi Mauricio? Wë a bi taki taa: „Mi bi ta suku u du möön wooko a di kemeente. Mi bi ta seeka dee taki u mi ku hii mi hati. Dee lö soni aki bi ta mbei mi fii taa Jehovah ku dee baaa ku dee sisa lobi mi.”

TE U TA FII BOOKOSAKA

8. Unfa dee hogi soni dee ta miti u sa mbei u fii?

⁸ U sabi taa tesi o ta miti u a dee lasiti daka aki (2 Tim. 3:1). Ma hii fa a dë sö, tökuseei a sa bigi da u te so tesi miti u. Kandë u sa ko abi möni fuka, nasö kandë u sa ko jei taa u abi wan siki, ee nasö wan sëmbë fuu sa ko lasi libi. U sa fii bookosaka seei, möönmöön ee a ta djei kuma dee fuka ta miti u baka na baka, nasö ee hii dee tuu ko a u liba wan pasi vou sö. Ma hoi a pakisei taa Jehovah ta si hii dee soni dee ta miti u, nöö a o heepi u.

9. Andi ku andi bi miti Jöpu?

⁹ Luku unfa Jehovah bi heepi Jöpu. Sömëni gaan hogi soni bi miti ën a wan kölö pisiten. A wan kodo daka dendu, Jöpu bi kisi bosikopu taa sëmbë bi fufuu hii dee mbeti fëën, nasö taa hii de tuu dëdë, söseei taa dee futuboi fëën ku dee mii fëën tuu bi dëdë (Jöpu 1:13-19). An bi tei longi seei, hën Jöpu bi kisi wan siki, hii fa a bi ta tjali jeti u dee hogi dee bi miti ën. Di siki dë bi mbei taa sinkii fëën bi ta poi, nöö a bi ta hati ën tu (Jöpu 2:7). Di soni aki bi taanga da Jöpu sö te taa a bi taki taa: „Mi ta buuse di libi u mi, ma kë libi möön.”​—Jöpu 7:16.

10. Unfa Jehovah bi heepi Jöpu faa hoi dou? (Luku di peentje u di kafiti.)

¹⁰ Jehovah bi ta buta pakisei a Jöpu. U di a bi lobi Jöpu, mbei a bi heepi ën faa hoi dou. Jehovah bi fan ku Jöpu. A bi mëni ën unfa a köni tjika, söseei unfa a ta sölugu dee soni dee a mbei. A bi konda soni u sömëni mbeti di a mbei (Jöpu 38:1, 2; 39:9, 13, 19, 27; 40:15; 41:1, 2). Söseei Jehovah bi mbei wan njönku kijoo de kai Elihu dëën taanga ku kötöhati. Elihu bi piki Jöpu taa hii juu Jehovah ta paka dee sëmbë dee ta hoi deseei nëën. Boiti di dë, Jehovah bi mbei Elihu leti Jöpu buta a pasi. A bi heepi Jöpu fu an pakisei hënseei wanwan nöö, ma faa fusutan unfa libisëmbë piki tjika te u tei useei maaka ku Jehovah, di Sëmbë di mbei hii di mundu (Jöpu 37:14). Jehovah bi piki Jöpu faa du wan soni. A bi musu begi da dee dii mati fëën dee bi du zöndu (Jöpu 42:8-10). Unfa Jehovah ta heepi u te gaan soni ta miti u?

11. Unfa di Bëibel ta heepi u te tesi miti u?

¹¹ Jehovah an ta fan ku u, kumafa a bi fan ku Jöpu. Ma a ta fan ku u ku di Wöutu fëën (Lom. 15:4). Dee soni dee a paamusi u da di ten di ta ko, ta da u kötöhati. Boo luku wantu soni di sikifi a Bëibel di sa da u taanga te tesi ta miti u. Di Bëibel ta piki u taa soni an dë di „sa paati u ku di lobi di Gadu lobi u” (Lom. 8:38, 39). Jehovah ta piki u tu taa a „dë zuntu ku hii dee sëmbë dee ta kai ën” te de ta begi (Ps. 145:18). Jehovah ta piki u taa te u ta suku heepi nëën, nöö woo sa hoi dou aluwasi un fuka miti u, söseei woo sa ta dë waiwai hii fa fuka ta miti u (1 Kol. 10:13; Jak. 1:2, 12). Di Wöutu u Gadu ta mëni u taa dee fuka dee ta miti u a di ten aki dë u wan kölö pisiten nöö, te u tei ën maaka ku dee bunu dee woo feni a di ten di ta ko (2 Kol. 4:16-18). Jehovah ta paamusi u taa a o kii Saatan Didibi ku dee sëmbë dee ta djeesi ën, u di de ta mbei taa fuka ta miti u (Ps. 37:10). I sabi wantu Bëibel tëkisi a hedi di sa heepi i fii hoi dou te fuka o miti i ö?

12. Andi Jehovah kë fuu du ee u kë feni wini u di Wöutu fëën?

¹² Jehovah kë fuu buta ten a wan së fuu ta öndösuku di Bëibel, söseei fuu ta pakisei fundu u dee soni dee u lesi. Te u ta du dee soni dee u ta lei, nöö di biibi fuu ta ko möön taanga, söseei u ku di Tata fuu ta ko dë möön gaan mati. Di soni aki o mbei taa woo sa hoi dou te fuka miti u. Jehovah ta da u di santa jeje fëën tu, te u ta lesi di Wöutu fëën. Nöö di jeje aki sa da u „gaan kaakiti” fuu sa hoi dou aluwasi un fuka miti u.​—2 Kol. 4:7-10.

13. Unfa dee soni di „di köni saafu di dë u futoou” ta lei u, ta heepi u fuu hoi dou?

¹³ Jehovah ta mbei „di köni saafu di dë u futoou” tja buku, ku fëlön ku poku ko a döö di sa heepi u fuu ko abi wan taanga biibi, söseei di sa heepi u fuu ku Jehovah dë mati go dou (Mat. 24:45). A dë fanöudu fuu wooko ku hii dee soni dee Jehovah ta da u. Wan sisa fu Amëëkanköndë bi konda unfa a ta tei dee soni aki u bigi tjika. A bi taki taa: „A dee 40 jaa dee mi dini Jehovah aki, nöö sömëni pasi tesi bi miti mi ka mi bi musu lei taa mi ta hoi miseei a Jehovah.” Wan dööngöma bi naki hën öupa ku wagi kii, taku siki bi kii dee gaansëmbë fëën, nöö tu pasi kankël bi kisi ën. Andi bi heepi di sisa aki faa hoi dou? Wë a bi taki taa: „Hii juu Jehovah bi ta heepi mi. Dee soni di Jehovah ta mbei di köni saafu di dë u futoou ta lei u, bi heepi mi u mi hoi dou. Di soni aki mbei mi bi sa taki leti kuma Job taa: ’Mi o ta hoi miseei a Gadu u te böö u mi koti!’”​—Jöpu 27:5.

14. Unfa Jehovah ta wooko ku dee baaa ku dee sisa u heepi u te fuka ta miti u? (1 Tesalonika 4:9)

¹⁴ Jehovah ta lei dee sëmbë fëën unfa de musu ta lobi deseei, söseei unfa de musu ta da deseei kötöhati te di libi ta taanga. (2 Kol. 1:3, 4; lesi 1 Tesalonika 4:9.) Leti kuma Elihu, dee baaa ku dee sisa fuu ta dë kabakaba u heepi u fuu sa abi wan taanga biibi go dou te soni ta taanga da u (Tjab. 14:22). Di di manu u wan sisa de kai Diane bi ko suwaki seei, hën dee baaa ku dee sisa u di kemeente bi dëën kötöhati, söseei de bi heepi ën faa abi wan taanga biibi go dou. Di sisa aki bi taki taa: „A bi taanga da u, ma u bi ta si fa Jehovah bi ta heepi u a di pisiten dë. Dee baaa ku dee sisa u di kemeente bi heepi u a sömëni fasi. De bi ta ko luku u, de bi ta bëli u, söseei de bi ta baasa u, nöö dee soni aki bi heepi u fuu hoi dou. U di ma sa’ u lëi wagi, mbei dee baaa ku dee sisa bi ta ko tei mi tja go a dee komakandi, söseei a di peleikiwooko.” U ta fii bunu seei taa u abi baaa ku sisa di lobi u!

U TA TEI ËN U BIGI SEEI TAA JEHOVAH TA HEEPI U

15. Unfa u du dë seiki taa u sa hoi dou te fuka ta miti u?

¹⁵ Fuka o miti hii u tuu. Ma kumafa u lei, nöö nöiti woo abi u tja dee fuka fuu u wanwan. Leti kumafa wan tata di lobi dee mii fëën ta buta pakisei a de, sö nöö Jehovah ta buta pakisei a u. A dë leti a u bandja. Te u ta kai ën, nöö a dë kabakaba u heepi u (Jes. 43:2). U dë seiki taa u sa hoi dou te fuka ta miti u, u di a da u hii soni di u abi fanöudu. A da u pasi fuu sa fan ku ën te u ta begi, a da u di Bëibel, a da u sömëni woto soni u heepi u u di biibi fuu ko möön taanga, söseei a da u dee baaa ku dee sisa u heepi u te u dë a fuka.

16. Andi u musu du fuu sa dë sëmbë u Jehovah go dou?

¹⁶ U ta tei ën u bigi seei taa u abi wan Tata di ta buta pakisei a u! „Hën ta mbei u ta dë ku wai” (Ps. 33:21). U sa lei Jehovah taa u ta tei di heepi di a ta heepi u u bigi, te u ta wooko ku hii dee soni dee a ta da u. Ma u musu mbei möiti fuu dë sëmbë fëën go dou. Ee u ta du hii soni di u sa du u piki Jehovah buka, nöö a o ta buta pakisei a u u nöömö!​—1 Pet. 3:12.