WOTO 34
„Ta piki di lei u Masa Gadu”
„Ta piki di lei u Masa Gadu.”—3 JOH. 4.
KANDA 111 Dee soni dee ta mbei u ta wai
WANTU SONI U DI WOTOa
1. Un wini u ta feni te u ta konda unfa u ko sabi soni u di tuutuu lei?
„UNFA i du ko sabi soni u di tuutuu lei?” An dë u taki taa i piki di hakisi aki sömëni pasi kaa. A dë wan u dee fosu soni di u ta hakisi dee baaa ku dee sisa fuu te u kë ko sabi de möön bunu. U lo’ u jei unfa dee baaa ku dee sisa fuu ko sabi soni u Jehovah, söseei unfa de lobi ën tjika, nöö useei lo’ u konda da de unfa u lobi di tuutuu lei tu (Lom. 1:11). Te u ta da dee lö woto aki, nöö de ta heepi u fuu si unfa di tuutuu lei dë wan gaan soni tjika. Di soni aki ta da u taanga fuu ta „piki di lei u Masa Gadu”, nöö a ta heepi u fuu libi a sö wan fasi taa Jehovah feni u u bunu.—3 Joh. 4.
2. Andi woo luku a di woto aki?
2 A di woto aki woo luku wantu soni di ta lei faandi mbei u lobi di tuutuu lei. Söseei woo luku unfa u sa ta lei nöömö taa u lobi di apaiti kado aki. An dë u taki taa te u ta buta pakisei a di soni aki, nöö a o ta mbei taa u ta möön dë ku tangi a hati taa Jehovah hai u ko nëën (Joh. 6:44). Söseei a o mbei u ta möön kë lei sëmbë soni u dee tuutuu lei u Bëibel.
FAANDI MBEI U LOBI DI TUUTUU LEI?
3. Andi da di möön fanöudu soni di ta mbei taa u lobi di tuutuu lei?
3 Sömëni soni ta mbei taa u lobi di tuutuu lei. Di möön fanöudu soni, hën da u lobi Jehovah Gadu, di Sëmbë ka di tuutuu lei kumutu. Wa ta lei a di Wöutu fëën nöö taa hën da di Sëmbë di mbei hii soni a liba ala ku goonliba aki, ma u sabi ën tu kuma di lobi hati Tata fuu di dë a liba ala, söseei taa a a’ toobi ku u (1 Pet. 5:7). U sabi taa di Gadu fuu „abi tjalihati u sëmbë, nöö a lobi sëmbë tu. Hati fëën an ta boonu hesi, a abi bunuhati pasa maaka, nöö hii juu a ta du dee soni dee a ta taki” (Ëki. 34:6). Jehovah lobi letilibi (Jes. 61:8). A ta hati ën te a ta si fa u ta pena. Fëën mbei a ta wakiti di ten ka a o puu hii dee soni dee ta mbei u ta pena (Jel. 29:11). Useei ta wakiti u di ten dë dou tu! Di soni aki da wan u dee soni di ta mbei taa u lobi Jehovah gaanfa seei.
Dee tuutuu lei u Bëibel dë kuma . . . wan hanka
Leti kumafa wan hanka ta heepi wan boto faa hoi gingin a wan kamian, sö nöö dee paamusi dee sikifi a di Bëibel ta heepi u fuu taanpu gingin hii fa fuka ta miti u. Dee tuutuu lei u Bëibel ta da u taanga fuu konda dee soni dee u ta biibi taa woo feni a di ten di ta ko, da wotowan (Luku palaklafu 4-7)
4-5. Faandi mbei apösutu Paulosu bi tei di biibi fuu maaka ku wan hanka?
4 Andi da wan woto soni di ta mbei u lobi di tuutuu lei? Wë di tuutuu lei ta mbei u feni gaan bunu. Dee tuutuu lei dee dë a Bëibel ta lei u taa soni o waka bunu da u a di ten di ta ko. Di apösutu Paulosu bi ta taki unfa di soni aki dë fanöudu tjika, hën a bi taki taa: „Dee soni dee Gadu paamusi u dë kuma wan hanka da di libi fuu. Dee soni aki taanga, nöö de ta mbei u taanpu gingin” (Heb. 6:19). Leti kumafa wan hanka ta heepi wan boto faa hoi gingin a wan kamian, sö nöö dee soni di di Bëibel ta paamusi u ta heepi u fuu taapu gingin te fuka ta miti u.
5 Di Paulosu bi ta taki u di soni aki, nöö a bi ta taki u di libi di dee salufuwan o go libi a liba ala. Ma dee sëmbë dee o libi a di Paladëisi a goonliba aki seei, sa feni wini u di soni di a bi taki tu (Joh. 3:16). Di sabi di u sabi taa woo sa libi u teego, ta mbei taa u ta si di libi fuu kuma wan gaan fanöudu soni.
6-7. Un wini Yvonne feni di a ko sabi unfa soni o waka tuutuu a di ten di ta ko?
6 Boo luku di woto u wan sisa de ta kai Yvonne. Di sisa aki an bi kiija a di tuutuu lei, söseei a bi ta fëëë dëdë. A ta mëni jeti taa a bi lesi wan nöngö di an bi sa fëëkëtë. Di nöngö aki ta taki taa: „Hii sëmbë o dëdë wan daka nömö.” Di sisa aki bi taki taa: „Di soni aki bi mbei taa ma bi ta duumi a ndeti, u di mi bi ta pakisei unfa soni o waka a di ten di ta ko.” Yvonne bi ta hakisi hënseei tu taa faandi mbei wa ta libi longi. Hii fa an bi ta fusutan faandi mbei u dë a goonliba aki, tökuseei an bi kë dëdë.
7 Di Yvonne bi ko möön bigi, hën a bi miti dee Jehovah Kotoigi. A bi taki taa: „Mi bi bigi ta biibi taa mi sa libi u teego a wan paladëisi a goonliba aki.” Unfa di tuutuu lei mbei di sisa fuu aki feni wini? A bi taki taa: „Mi ta duumi a ndeti nöunöu, u di ma ta booko mi hedi möön ku unfa soni o waka a di ten di ta ko, söseei ma ta booko mi hedi ku dëdë möön.” A dë u si taa Yvonne lobi dee tuutuu lei u Bëibel, söseei a ta wai gaanfa seei u konda da sëmbë unfa soni o waka a di ten di ta ko.—1 Tim. 4:16
Dee tuutuu lei u Bëibel dë kuma . . . wan gaan gudu
Di dini di u ta dini Jehovah nöunöu, ku di sabi di u sabi taa woo libi u teego a di tii fëën basu, dë kuma wan gaan gudu da u. Di soni aki bigi gaanfa seei möön hiniwan soni di u musu disa fuu sa dini Jehovah (Luku palaklafu 8-11)
8-9. (a) Unfa wan womi a wan u dee woto di Jesosi bi konda, bi lei taa a bi bigi dëën seei taa a bi feni wan gaan gudu? (b) Unfa di tuutuu lei dë wan gaan dii soni da i tjika?
8 Di bunu buka u di Könuköndë u Gadu seei dë wan pisi u dee tuutuu lei u Bëibel tu. Jesosi bi tei di tuutuu lei u di Könuköndë maaka ku wan gaan gudu di dë tjubitjubi. A Mateosi 13:44 Jesosi bi taki taa di Könuköndë u Gadu „dë leti kuma wan gaan gudu bi dë tjubitjubi a wan pisi goon. Nöö hën wan sëmbë go si ën. Nöö fa a si ën dë, hën a toona tjubi ën te a kaba. Nöö hën a kule go ku gaan wai nëën hati, hën a go sei hii dee soni fëën dee a bi abi tuu fiaa. Nöö hën a tei di möni go bai di goon naandë gbom tei”. Wë di womi aki an bi go a di goon u go suku gudu. Ma di a feni ën kaa, hën a du hii soni faa bi sa ko abi ën. Fuu taki ën kumafa a dë, a sei hii soni di a bi abi. Ma faandi mbei? Wë u di di womi aki bi sabi taa di gudu aki bi dë wan gaan dii soni seei. A bi dii gaanfa möön hii dee woto soni dee a bi sei.
9 Sö iseei ta fii da di tuutuu lei ö? Wë u dë seiki taa sö i ta fii tu! U di u sabi taa wa sa tei na wan soni u di goonliba aki maaka ku di piizii di u ta piizii te u ta dini Jehovah, söseei ku di sabi di u sabi taa woo libi u teego te di Könuköndë u Gadu o tii. Di gaandi di u abi u dë wan mati u Jehovah, bigi gaanfa seei möön hiniwan soni di u musu disa fuu sa dini ën. Di soni di ta mbei u ta wai gaanfa seei, hën da di libi di u ta „libi bunu nëën wojo”.—Kol. 1:10.
10-11. Andi bi da Michael taanga faa tooka soni a di libi fëën?
10 Sömëni fuu disa sömëni gaan soni, sö taa Jehovah bi sa feni u u bunu. So fuu disa dee në bai soni u di goonliba aki di u bi ta du. Wotowan fuu tapa u kule a gudu baka. Söseei so fuu tooka di fasi fa u bi ta libi di u ko sabi soni u Jehovah. Di seei soni aki wan womi de kai Michael bi du. An kiija a di tuutuu lei. Di a bi dë wan njönku kijoo, hën a bi ta lei u koti karate. A bi taki taa: „A bi dë wan gaan fanöudu soni da mi u mi sölugu taa sinkii u mi dë bunu. So juu mi bi ta fii kuma na wan sëmbë bi sa du soni ku mi.” Ma di a bigi lei soni u Bëibel, hën a ko si unfa Jehovah ta pakisei u hogidu (Ps. 11:5). Michael bi taki taa: „Nöiti di baaa ku di mujëë fëën dee bi ta lei mi soni u Bëibel, bi piki mi taa mi bi musu tapa ku di lei di mi bi ta lei feti, ma de bi ta lei mi dee tuutuu lei u Bëibel go dou.”
11 Möön Michael bi ta lei soni u Jehovah, möön a bi ta ko lobi ën. A bi dë wan gaan soni dëën seei di a ko fusutan unfa Jehovah ta booko hën hedi ku dee dinima fëën tjika. Te u kaba fëën, Michael bi ko fusutan taa a bi musu du wan gaan soni. A bi taki taa: „Mi bi sabi taa di tapa di mi bi o tapa u koti karate, an bi o dë wan kösökösö soni da mi seei. Ma mi bi sabi tu taa Jehovah bi o wai ku mi, söseei mi bi dë seiki taa di dini di mi musu dini ën, dë fanöudu möön hiniwan soni di u musu disa.” U di Michael bi ko fusutan taa di tuutuu lei dë wan gaan dii soni, mbei a bi dë kabakaba u tooka sömëni gaangaan soni a di libi fëën.—Jak. 1:25.
Dee tuutuu lei u Bëibel dë kuma . . . wan lampu
Leti kumafa wan lampu di ta sëndë faja bumbuu seei ta heepi u fuu si ka u nango te kamian dungu, sö nöö di Wöutu u Gadu ta lei u unfa u sa du soni a wan köni fasi, hii fa u ta libi a di hogi goonliba u Saatan aki (Luku palaklafu 12-13)
12-13. Unfa dee tuutuu lei u Bëibel heepi Mayli?
12 U di di tuutuu lei dë wan gaan bumbuu soni, mbei di Bëibel ta tei ën maaka ku wan lampu di ta tuwë faja a wan dungudungu kamian (Ps. 119:105; Ef. 5:8). Wan sisa de kai Mayli di ta libi a di köndë Azerbaijan, ta wai gaanfa seei u di fasi fa di Wöutu u Gadu bi heepi ën. Hën mama ku hën tata an bi dë a di wan seei biibi. Hën tata bi dë a di Moslim biibi, nöö hën mama bi dë a di Dju biibi. A bi taki taa: „Hii fa mi bi sabi taa wan Gadu dë, tökuseei soni bi dë di ma bi ta fusutan. Mi bi ta hakisi miseei taa ’faandi mbei Gadu mbei libisëmbë? Söseei faandi mbei wan sëmbë musu ta tja sitaafu hii hën libi longi, ma tökuseei te u kaba fëën a o tja sitaafu a Didibi faja u teego?’ U di sëmbë ta taki taa hii soni ta pasa kumafa Gadu kë, mbei mi bi ta hakisi miseei ee ’Gadu da wan sëmbë di ta du andi a kë ku u, nöö a ta suti dëën te a ta si fa u ta tja sitaafu.’”
13 Mayli an bi tapa u suku dee piki da dee hakisi dee a bi abi. Te u kaba fëën, a bigi lei soni u Bëibel, hën a toon wan Jehovah Kotoigi. A bi taki taa: „Dee tuutuu lei u di Bëibel heepi mi u mi ko dë wan sëmbë di ta möön dë waiwai. Dee soni aki heepi mi tu u mi ko ta dë bööböö, u di de bi dë gbelingbelin u fusutan.” Leti kuma Mayli, hii u tuu ta gafa Jehovah, di Sëmbë di ’kai u puu a dungu tja ko a di waiti limbo fëën’.—1 Pet. 2:9.
14. Unfa u sa ko möön lobi di tuutuu lei? (Luku di pisi „Woto soni di u sa tei di tuutuu lei maaka ku de”.)
14 Dee woto aki da wantu u dee woto nöö di ta lei unfa di tuutuu lei dë wan gaan dii soni tjika. An dë u taki taa i jei sömëni u dee lö woto aki kaa. A bi o bunu fuu mbei möiti u öndösuku möön soni di o heepi u fuu ko fusutan faandi mbei u musu lobi di tuutuu lei. Möön u lobi di tuutuu lei, möön woo ta feni fasi u lei taa u lobi ën.
DI FASI FA U TA LEI TAA U LOBI DI TUUTUU LEI
15. Andi da wan fasi fa u sa lei taa u lobi di tuutuu lei?
15 U sa lei taa u lobi di tuutuu lei te u ta lei soni a Bëibel, söseei te u ta lei soni a dee buku fuu. An toobi un longi u dë a di tuutuu lei, tökuseei nöiti woo sabi hii soni. A di fosu Ingisitöngö Hei Wakitimawosu di de bi tja ko a döö, de bi taki taa: „Di tuutuu lei dë kuma wan piki folo di dë tjubitjubi a wanlö taku uwii dendu. Leti kumafa dee taku uwii ta suku u kii di piki folo aki, sö nöö poipoi lei ta suku u tapa pasi da dee tuutuu lei u Gadu. Ee i kë feni di folo dë, nöö i musu suku ën bunu. I musu mbei taanga möiti. Nöö te i feni ën kaa, nöö ja musu wai ku di wan kodo di i feni dë nöö. Ma i musu suku go dou fii sa feni möön hia folo.” An dë wan kösökösö soni u lei soni u Bëibel, ma woo feni wini fëën te u ta mbei möiti u du ën.
16. Un fasi u lei soni u Bëibel ta heepi i fii ko sabi möön soni? (Nöngö 2:4-6)
16 Na hii u tuu lo’ u lesi nasö u lei soni. Ma tökuseei Jehovah ta da u taanga fuu ’ta suku nöömö’, sö taa u sa ko fusutan soni u di tuutuu lei möön bunu. (Lesi Nöngö 2:4-6.) Te u ta mbei möiti a di lö fasi dë, nöö hii juu woo ta feni wini fëën. Wan baaa de kai Corey bi taki taa te a ta lesi Bëibel, nöö a ta buta pakisei a dee vers wanwan-fu-wan. A bi taki taa: „Mi ta lesi hii dee soni dee taki soni möön fini, ku dee tëkisi dee ta taki möön soni u di woto, söseei mi ta öndösuku soni u de möön fini. . . . Te mi ta lesi di Bëibel a di lö fasi aki, nöö a ta heepi mi u mi lei möön soni.” Aan toobi ee a di fasi aki u ta lei soni u Bëibel nasö ee u ta du ën a wan woto fasi. Ma woo lei taa u ta tei di tuutuu lei u bigi te u ta tei ten u lei soni fëën.—Ps. 1:1-3.
17. Andi a kë taki taa u musu libi ku dee soni dee u ta lei? (Jakobosi 1:25)
17 Wë u sabi taa di lei di u ta lei soni u di tuutuu lei wanwan an tjika. Ee u kë feni wini fëën bumbuu seei, nöö u musu ta du dee soni dee u ta lei. Sö nöö di tuutuu lei sa mbei u ko dë waiwai tuutuu. (Lesi Jakobosi 1:25.) Unfa u sa mbei möiti u libi ku dee soni dee u ta lei? Wan baaa bi taki taa a bunu fuu öndösuku di fasi fa u ta libi, nöö u luku ee u ta du dee soni dee u ta lei. Nöö ee u si taa wa ta du so soni, nöö u musu mbei möiti u du de. Apösutu Paulosu bi taki taa: „Ma nöö di soni di u ko abi fusutan fëën kaa, nöö ku ën fuu libi e.”—Fil. 3:16.
18. Faandi mbei u ta mbei möiti u „ta piki di lei u Masa Gadu”?
18 Pakisei un wini woo feni te u ta mbei möiti u „ta piki di lei u Masa Gadu”! Na waka nöö di libi fuu o ta waka bunu nöö a kaba, ma woo mbei Jehovah wai ku u, söseei dee baaa ku dee sisa fuu o ta dë ku wai tu (Nöng. 27:11; 3 Joh. 4). Awa, dee soni aki hën ta mbei u lobi di tuutuu lei, söseei de ta mbei u ta du dee soni dee u ta lei.
KANDA 144 I musu ta pakisei dee bunu dee joo feni!
a Möön gaanfa u ta kai di biibi fuu ku di fasi fa u ta libi di tuutuu lei. Aluwasi u dë njunjun a di tuutuu lei, nasö u dë nëën longi kaa, tökuseei u sa feni wini te u ta öndösuku luku faandi mbei u ta wai taa u dë wan Jehovah Kotoigi. Di soni aki o heepi u fuu dë kabakaba u du soni di ta kai ku Jehovah.