U sa dë bööböö hii fa soni ta miti u

1. Andi da di „kötöhati u Gadu”, nöö unfa u ta feni wini fëën? (Filipi 4:6, 7)

WAN kötöhati dë di dee sëmbë u di goonliba aki an sabi. Di kötöhati aki da di „kötöhati u Gadu”. Hën da di dë di u ta dë bööböö u di u ku di Tata fuu a liba ala dë gaan mati. Te u feni di kötöhati u Gadu, nöö u ta fii bunu seei. (Lesi Filipi 4:6, 7.) U ta dë mati ku dee sëmbë dee lobi Gadu. Söseei u ku Masa Gaangadu ta dë gaan mati tu. Nëën „hii kötöhati ta kumutu” (1 Tes. 5:23). Te u sabi di Tata fuu, söseei te u ta futoou ën ta piki hën buka, nöö di kötöhati fëën o mbei u ko ta dë bööböö hii fa hogi ta miti u.

2. Faandi mbei u sa dë seiki taa u sa ko abi di kötöhati u Gadu?

² I si kuma u sa feni di kötöhati di Gadu ta da sëmbë te siki ta paaja, te gaan ventu nasö gaan wata ko, te sëmbë nango a sitaati ta ligei, söseei te sëmbë ta du ku u ö? Hiniwan u dee soni aki sa mbei u fëëë gaanfa seei. Ma tökuseei Jesosi bi piki dee bakama fëën taa: „Wan musu ta dë fukafuka fëëëfëëë e” (Joh. 14:27). Sömëni baaa ku sisa piki Jesosi buka a di soni aki. U di Jehovah bi heepi de, mbei de bi sa feni kötöhati, hii fa sömëni fuka bi ta miti de.

UNFA U SA TA DË BÖÖBÖÖ TE WAN SIKI KO DI TA PAAJA?

3. Unfa di paaja di wan siki ta paaja sa mbei wa dë bööböö möön?

³ Hii u libi sa tooka seei, te wan siki ta paaja a goonliba nasö a di pisiwata ka u ta libi. Buta pakisei a di fasi fa di kolona siki bi tooka sömëni sëmbë libi. Wanlö sëmbë bi öndösuku soni, hën de ko si taa möön leki hafu u dee sëmbë di de bi hakisi soni, bi taki taa de an bi ta duumi bunu a di pisiten u di kolona siki. Di siki aki bi mbei sëmbë bi ta booko de hedi möön gaanfa, de bi ta kusumi, söseei de bi ta möön bebe daan, ta tei drugs. Boiti di dë, sëmbë u wan wosudendu bi ta feti ku deseei möön gaanfa, söseei sëmbë bi ta möön pooba u kii deseei. Ee wan siki ta paaja a di pisiwata ka i ta libi, nöö unfa i sa du fu ja ta booko i hedi poi, söseei unfa i sa ko abi di kötöhati u Gadu?

4. Unfa di soni di Jesosi bi taki di nama ku dee lasiti daka, ta heepi u fuu ta dë bööböö?

⁴ Jesosi bi taki taa a dee lasiti daka taku siki bi o „ko a mundu” (Luk. 21:11). Unfa di soni aki ta heepi u fuu ta dë bööböö? Wë an ta bigi da u te u ta jei taa taku siki ta paaja a goonliba. U ta si taa soni ta pasa leti kumafa Jesosi bi taki a fesi. Fëën mbei u dee sëmbë dee ta libi a di kaba pisi u di goonliba aki musu haika di soni di Jesosi bi taki, di a bi taki taa: „Wan musu panta e.”​—Mat. 24:6.

5. (a) Fuun soni u musu ta begi te taku siki ta paaja, te u luku andi Filipi 4:8, 9 ta taki? (b) Un wini u sa feni te u ta haika dee pisi u Bëibel di de lesi?

⁵ Te wan taku siki ta paaja, nöö hesihesi u sa bigi ta fëëë, nöö u bigi booko u hedi ku soni. Di soni aki hën bi pasa ku wan sisa de kai Desi.b Di hën tata piki baaa, ku wan mii fëën tata gaan baaa, ku di data fëën ko lasi libi u di di kolona siki bi kisi de, hën a bi ko ta fëëë taa hënseei bi o kisi di siki tu, nöö a bi o tjëën ko da hën mama di bi ko gaandi. A bi ta fëëë tu taa a bi sa lasi di wooko fëën, nöö a bi ta hakisi hënseei unfa a bi o bai soni u njan, söseei unfa a bi o du paka di juu wosu fëën. Di pakisei di a bi ta pakisei dee soni aki bi ta mbei taa an bi sa ta duumi bumbuu a ndeti. Ma Desi bi ko ta dë bööböö baka. Andi bi heepi ën? A bi hakisi Jehovah faa heepi ën fu an ta booko hën hedi möön, söseei faa ta pakisei soni di sa mbei a fii bunu. (Lesi Filipi 4:8, 9.) A bi ta haika te Jehovah bi ta fan ku ën, u di a bi ta „haika” dee pisi u Bëibel di de lesi. A bi taki taa: „Di fasi fa de lesi di Bëibel bi ta mbei mi fii bunu seei, söseei a bi ta toona mëni mi taa Jehovah ta booko hën hedi ku mi.”​—Ps. 94:19.

6. Unfa di lei di joo ta lei soni u Bëibel ku di go di joo nango a dee komakandi o heepi i?

⁶ Te wan taku siki ta paaja, nöö a kan taa wa o sa ta du hii dee soni dee u bi guwenti möön. Ma wa musu mbei di soni dë tapa u fu wa lei soni u Bëibel möön, nasö fu wa go a dee komakandi. Dee woto dee dë a dee buku fuu, söseei a dee fëlön fuu, o toona mëni u taa dee baaa ku dee sisa fuu ta hoi deseei a Jehovah go dou, hii fa dee seei soni ta miti de (1 Pet. 5:9). Dee komakandi o heepi i fii sa ta pakisei soni di o da i taanga, söseei joo sa da wotowan taanga tu (Lom. 1:11, 12). Te i ta kai pakisei a di fasi fa Jehovah bi heepi dee dinima fëën te de bi dë ku suwaki, te de bi ta fëëë, nasö te de bi ta fii kuma de dë de wanwan, nöö di biibi fii o ko möön taanga, söseei joo ko dë seiki taa a o heepi i tu.

7. Andi i sa lei na apösutu Johanisi?

⁷ Mbei möiti fii ta fan ku dee baaa ku dee sisa fii. Te wan taku siki ta paaja, nöö kandë a ta dë fanöudu fu wa ta ko zuntu ku dee wotowan fuu möön. Kandë a di pisiten dë woo ta fii kuma apösutu Johanisi. A bi kë miti hën mati Gajusi u de sa fan fesi ku fesi (3 Joh. 13, 14). Ma Johanisi bi fusutan taa hën ku Gajusi an bi o sa miti u wan pisiten. Fëën mbei Johanisi bi du andi a bi sa, hën a sikifi wan biifi manda da Gajusi. Ee ja sa go luku dee baaa ku dee sisa fii fuun sa fan fesi ku fesi, nöö i sa pooba u bëli de, nasö i sa manda wan bosikopu da de a tëlëfön. Te i ta mbei dee lö möiti aki, nöö ja o ta fii kuma i dë i wanwan, ma joo ta dë bööböö. I sa fan ku dee gaanwomi ee i ta booko i hedi poi, nöö i buta pakisei a dee soni di de o piki i.​—Jes. 32:1, 2.

UNFA U SA TA DË BÖÖBÖÖ TE WAN GAAN HOGI PASA A WAN KAMIAN?

8. Unfa wan gaan hogi soni di pasa a wan kamian sa poi di bööböö libi fii?

⁸ A kan taa i bi ta booko i hedi seei wan longi pisiten baka di wan gaan wata bi ko a di pisiwata ka i ta libi, nasö baka di goon bi seki, nasö baka di kamian bi tjuma a di pisiwata ka i ta libi. Wë ee sëmbë fii lasi libi, ee di wosu fii nasö woto soni fii kaba a sösö, nöö kandë a ta hati i seei. Kandë saanfa-u-du fii kaba, nasö kandë hati fii boonu tu. Di soni aki an kë taki taa i ta si gudu kuma di möön fanöudu soni, nasö taa di biibi fii an taanga. Gaan soni wë miti i dë, nöö kandë so sëmbë o ta dë ku di mëni taa ja o ta dë bunu a dee pisiten dë (Jöpu 1:11). Ma aluwasi ee soni ta taanga da i, tökuseei i sa ko ta dë bööböö. Unfa sö?

9. Andi Jesosi bi taki di ta seeka u da soni di sa miti u?

⁹ Toona mëni di soni di Jesosi bi taki. So sëmbë ta pakisei taa hogi an o miti de wan daka. Ma uu sabi taa hogi soni bi o ta pasa möön hia a di ten fuu aki, nöö dee hogi soni aki sa miti u tu. Jesosi bi piki dee bakama fëën taa „goon o ta seki a sömëni kamian”, söseei taa woto hogi bi o ta pasa ufö di kaba u di goonliba aki (Luk. 21:11). A bi taki tu taa möönmöön sëmbë bi o ta „libi hogi ku deseei”. Di soni aki dë u si a di ten fuu aki, u di sëmbë ta kii wotowan, söseei de ta feti ku deseei (Mat. 24:12). Nöiti Jesosi bi taki taa dee sëmbë dee Jehovah bia baka da wanwan dee soni aki bi o ta miti. Sömëni hogi ta miti dee dinima u Jehovah (Jes. 57:1; 2 Kol. 11:25). Kandë Jehovah an o tjubi u a wan foombo fasi u hogi an miti u, ma a o da u di kötöhati di u abi fanöudu fuu sa ta dë bööböö.

10. Faandi mbei u sa taki taa u abi biibi te u ta seeka soni a fesi ufö wan gaan hogi pasa? (Nöngö 22:3)

¹⁰ Te wan hogi pasa, nöö wa o ta booko u hedi sö ee u bi seeka soni a fesi. Ma di seeka di u ta seeka soni a fesi kë taki taa di biibi fuu an taanga u? Na seei! Fuu taki ën kumafa a dë, nöö di seeka di u ta seeka soni a fesi ta lei taa u ta biibi taa Jehovah o heepi u. Unfa sö? Wë di wöutu u Gadu ta piki u fuu seeka soni a fesi da wan gaan hogi di sa miti u. (Lesi Nöngö 22:3.) Boiti di dë, di ölganisaasi u Gadu ta wooko ku dee buku fuu, ku dee komakandi fuu, söseei ku woto soni u piki u fuu seeka soni a fesi.c U ta futoou Jehovah u? Ee u ta futoou ën, nöö nöunöu kaa woo ta seeka soni a fesi ufö wan gaan hogi pasa.

11. Andi i ta lei u di woto u Margaret?

¹¹ Buta pakisei a di soni di bi miti wan sisa de kai Margaret. Lanti bi piki ën faa kumutu a di wosu fëën u di wan faja bi bigi tjuma di pisiwata ka a bi ta libi. U di sömëni sëmbë bi ta fusi a di seei ten, mbei gaan hia wagi bi ko dë a di pasi liba, nöö de an bi sa lëi bumbuu u de go dou ka de bi nango. Hii di kamian bi dë ku baaka sumuku, nöö wan hii pisiten Margaret an bi sa kumutu a di wagi fëën. Ma an bi lasi hën libi, u di a bi dë seekaseeka. A bi abi wan kaita a di tasi fëën, di a bi sa luku faa sabi na un pasi a musu lëi faa sa kumutu a di pisiwata dë. A bi lëi a di pasi dë a fesi kaa, sö taa a bi sa sabi naasë a musu lëi te wan hogi ko pasa. U di Margaret bi seeka hënseei a fesi, mbei an bi lasi hën libi.

12. Faandi mbei u ta haika di ölganisaasi u Gadu, söseei faandi mbei u ta haika gaan lanti?

¹² Gaan lanti sa hakisi u fu wa kumutu a wosu a wan apaiti pisiten u di daka, fuu fusi go a wan woto kamian, nasö fuu du wan woto soni u di de kë tjubi u, söseei u di de kë tjubi woto sëmbë tu. So sëmbë an ta kë piki lanti buka wantewante, u di de an kë go disa dee gudu u de. Andi Keesitu sëmbë musu du? Wë di Bëibel ta taki taa: „Fa un ko nama ku Masa dë, nöö un musu ta saka da hii dee tii dee lanti buta e. Un musu ta saka da di könu biga hën da di möön hei wan. Nöö un musu ta saka da dee takima tu, dee a pii tei buta a kamiankamian” (1 Pet. 2:13, 14). Di ölganisaasi u Gadu seei ta lei u andi u musu du fuu sa tjubi useei. Ee u tooka soni kuma tëlëfön nöbu fuu sö, nöö u musu toona piki dee gaanwomi, sö taa de sa sabi unfa a nango ku u te wan gaan hogi ko pasa. I bi piki de u? Kandë dee baaa o piki u taa wa musu kumutu a wosu, nasö taa u musu kumutu a wosu. Kandë de o piki u unfa u sa feni dee soni dee u abi fanöudu, nasö unfa u musu heepi wotowan, söseei na un ten u musu heepi de. Ee wa haika, nöö hogi sa miti u, söseei di soni dë sa mbei hogi ko miti dee gaanwomi tu. Hoi a pakisei taa dee womi aki da dee sëmbë dee ta luku u (Heb. 13:17). Sisa Margaret bi taki taa: „Mi ta biibi taa di haika di mi bi haika dee gaanwomi, söseei di haika di mi bi haika di ölganisaasi u Gadu, hën mbei ma bi lasi libi.”

13. Andi ta heepi dee baaa ku dee sisa dee go libi a wan woto kamian u de ta dë bööböö?

¹³ U di wan gaan hogi bi pasa, nasö u di gaan feti bi feti, nasö u di sëmbë bi ta hopo ligei a sitaati, mbei sömëni baaa ku sisa bi foloisi go libi a wan woto kamian. De mbei taanga möiti u ko guwenti di njunjun kamian ka de go libi, söseei u dini Jehovah go dou. Dee baaa ku dee sisa aki „ta tja di buka u Masa Jesosi ta paaja tu”, leti kumafa dee fesiten Keesitu sëmbë bi du ën, di de bi paaja go a kamiankamian u di sëmbë bi ta du ku de (Tjab. 8:4). Di peleikiwooko ta heepi de u de buta pakisei a di Könuköndë, ka u de buta pakisei a dee soni dee miti de. Di soni aki ta mbei de ta dë bööböö.

UNFA U SA TA DË BÖÖBÖÖ TE SËMBË TA DU KU U?

14. Unfa di du di sëmbë ta du ku u sa mbei wa dë bööböö möön?

¹⁴ Te sëmbë ta du ku u, nöö soni an ta dë wan bëtë di sa heepi u fuu ta dë bööböö. U ta wai te u sa ta ko makandi u dini di Gadu fuu, te u sa ta du di peleikiwooko, söseei te u sa ta du dee soni dee u guwenti du, söndö u fëëë taa siköutu o ko kisi u söötö. Ma te de tapa u fuu wa du dee soni aki möön, nöö a sa pasa taa u bigi booko u hedi ku soni, söseei u sa ta fëëë u di wa saandi o miti u. An dë wan föutu soni ee u ta fii sö. Ma tökuseei u musu köni ku wan soni. Jesosi bi taki taa di du di sëmbë bi o ta du ku dee bakama fëën, bi o sa mbei de fëëë sö te taa de an biibi nëën möön (Joh. 16:1, 2). Wë nöö unfa u sa ta dë bööböö go dou, hii fa sëmbë ta du ku u?

15. Faandi mbei wa musu fëëë di du di sëmbë o du ku u? (Joh. 15:20; 16:33)

¹⁵ Di Wöutu u Gadu ta piki u taa: „Sëmbë o du ku hii dee sëmbë dee kë dini Gadu fajafaja kuma bakama u Jesosi Keesitu” (2 Tim. 3:12). A bi taanga da wan baaa de kai Andrei faa fusutan di soni aki, baka di de bi tapa di wooko fuu a di köndë ka a ta libi. A bi ta pakisei taa: ’Gaan hia Kotoigi dë a di köndë aki, nöö unfa dee tiima o sa kisi hii u tuu buta a dunguwosu?’ Di pakisei di Andrei bi ta pakisei di soni aki an bi ta mbei a dë bööböö, ma a bi ta mbei a möön booko hën hedi. Woto baaa bi disa hii soni a Jehovah maun. De an bi ta pakisei taa siköutu an bi o sa kisi de tja go söötö. De bi sabi taa siköö bi sa kisi de, ma de an bi ta booko de hedi kumafa Andrei bi ta booko hën hedi. Fëën mbei Andrei bi buta taa a o mbei möiti faa ko ta si soni kumafa de ta si soni, söseei faa ko ta möön futoou Jehovah. Baka di dë, a bi ko ta dë bööböö, söseei nöunöu a ko ta dë waiwai hii fa sömëni fuka ta miti ën. Useei sa ko dë sö tu. Jesosi bi piki u taa u musu ta dë ku di mëni taa sëmbë o du ku u, ma a bi piki u tu taa woo sa hoi useei a Gadu go dou.​—Lesi Johanisi 15:20; 16:33.

16. Andi u musu du te lanti ta du ku u?

¹⁶ A kan taa di bëikantoo ku dee gaanwomi o piki u andi u musu du te lanti tapa di wooko fuu, nasö te lanti an kë fuu du so soni möön. Dee soni di de o piki u sa tjubi u, de o mbei u feni dee soni dee u abi fanöudu a di së u di biibi, söseei de o heepi u fuu sa ta peleiki go dou. Mbei hii möiti u du dee soni di dee baaa o piki u, aluwasi ee ja kaba fusutan faandi mbei de piki u fuu du dee soni dë (Jak. 3:17). Boiti di dë, nöiti u musu konda soni u dee baaa ku dee sisa fuu, nasö dee soni dee u ta du a di kemeente da sëmbë dee an abi leti u sabi de.​—Peleik. 3:7.

17. Andi u dë kabakaba u du, leti kuma dee apösutu?

¹⁷ Wan u dee soni mbei Saatan ta feti ku dee sëmbë u Gadu, hën da u di de ta „piki Gadu buka ta konda soni u Jesosi da sëmbë” (Ako. 12:17). Na mbei Saatan ku di goonliba fëën mbei i fëëë. Te u ta du di peleikiwooko ta lei sëmbë soni u Bëibel hii fa sëmbë ta du ku u, nöö woo ta dë waiwai, söseei woo ta dë bööböö. A di ten u dee fesiten Keesitu sëmbë, dee heiheima u dee Dju bi piki dee apösutu u de disa u peleiki, ma dee apösutu bi buta taa de o piki Gadu buka. De bi peleiki go dou, nöö di soni dë bi mbei de bi ta dë waiwai (Tjab. 5:27-29, 41, 42). An dë u taki taa u musu ta du soni a wan köni fasi te de tapa di wooko fuu (Mat. 10:16). Ma ee u ta mbei möiti u du andi u sa du, nöö woo ta dë bööböö u di u ta du soni di ta kai ku Jehovah, söseei u di u ta paaja wan buka di ta tjubi sëmbë libi.

DI GADU DI „TA KÖTÖ SËMBË HATI O DË KU UNU”

18. Naasë u sa feni kötöhati tuutuu?

¹⁸ U sa dë seiki taa aluwasi gaan hogi soni ta miti u, tökuseei u sa ta dë bööböö. A dee pisiten dë u musu hoi a pakisei taa u abi di kötöhati u Gadu fanöudu. Jehovah seei hën ta da u di kötöhati dë. Suku heepi nëën te wan siki ko di ta paaja a di köndë ka i ta libi, te wan gaan hogi pasa, nasö te sëmbë ta du ku i. Wooko makandi ku di ölganisaasi fëën. Boiti di dë, kai pakisei a di suti libi di woo feni a di ten di ta ko. Te i ta du dee soni aki, nöö di Gadu di „ta kötö sëmbë hati o dë ku” i (Fil. 4:9). A di woto di ta ko, woo luku unfa u sa heepi dee baaa ku dee sisa fuu u deseei sa feni di kötöhati u Gadu te soni ta miti de.