I Ta Mëni Dee Soni Aki Ö?

I bi lesi dee Hei Wakitimawosu u di jaa aki ö? Wë luku ee i sa piki dee hakisi aki:

Un gaan bunu woo feni te u ta fan ku Jehovah, te u ta haikëën, söseei te u ta kai pakisei a dee soni dee u ta lei fëën?

Woo ta du soni a wan möön köni fasi, woo ko möön sa’ u lei sëmbë soni, di biibi fuu o ko möön taanga, söseei woo ko möön lobi Jehovah.​—w22.01, bld. 30-31.

Un heepi woo feni te u ta futoou Jehovah ku dee sëmbë dee a buta u tei fesi?

Nöunöu kaa u musu ta mbei möiti u futoou di fasi fa Gadu ta du soni, u di wa o ta hakisi useei ee di fasi fa dee gaanwomi ta du soni bunu, nasö dee soni di de ta piki u bunu tuutuu. Te di gaan fuka dou, nöö woo dë kabakaba u piki de buka aluwasi ee wa ta kaba fusutan hii soni.​—w22.02, bld. 4-6.

Faandi mbei di ëngëli bi konda da Sakalia taa wan pisi lötö dë a Gaama Selubabëli maun? (Sak. 4:8-10)

Di wojolimbo sunjan aki bi mbei dee sëmbë u Gadu ko de seiki taa de bi o mbei di wosu u Gadu kaba, söseei taa Gadu bi o wai ku ën.​—w22.03, bld. 16-17.

Unfa u sa dë sëmbë di wotowan sa djeesi a ’di fasi fa u ta fan’? (1 Tim. 4:12)

Te u ta fan a wan suti fasi, söseei a wan lesipeki fasi te u dë a di peleikiwooko, te u ta kanda ku hii u hati, te u ta da piki a dee komakandi, te wa ta mindi soni, te wa ta kosi sëmbë, söseei te u ta da wotowan taanga.​—w22.04, bld. 6-9.

Faandi mbei di mbeti u Akoalimbo 13:1, 2 ta djei dee fö mbeti (Könuköndë) di Daniëli kapitë  7 ta taki u de?

Di mbeti u Akoalimbo kapitë 13 an kë taki wan kodo tii nöö, kuma Loomë. Ma a dë hii dee tii dee bi tii libisëmbë.​—w22.05, bld. 9.

Andi da wan fasi fa u sa lei taa u ta futoou di fasi fa Gadu ta kuutu soni?

Ee wan sëmbë kosi u, nasö ee a du wan soni di hati u, nöö u ta mbei möiti u hati fuu an boonu, söseei fu wa hoi di sëmbë a bëë, ma u ta disa hii soni a Jehovah maun. A o puu hii dee fuka di zöndu tja ko.​—w22.06, bld. 10-11.

Andi wan baaa di ta begi a wan komakandi musu ta hoi a pakisei?

Te u ta begi, nöö wa musu booko wan buka a di begi, nasö bë wojo da sëmbë. Söseei wa musu „begi longi” möönmöön te woo bigi wan komakandi (Mat. 6:7)​—w22.07, bld. 24-25.

Na un fasi dee sëmbë „dee bi libi hogi a Gadu wojo” o „weki ko a libi baka u de kuutu de”? (Joh. 5:29)

De an o kuutu de a wan hogi fasi u di de o luku di fasi fa de bi libi ufö de dëdë. Ma de o luku dee soni di de ta du baka te de weki ko a libi baka.​—w22.09, bld. 18.

Un taanga Baaa J. F. Rutherford bi da sëmbë a wan könklësi di de bi hoi a wajamaka-liba u di jaa 1922?

A wan könklësi di de bi hoi a Cedar Point, Ohio, di dë na Amëëkanköndë, hën a bi taki taa: „Di Könu ta tii! Unu da dee sëmbë dee ta konda soni fëën. Fëën mbei un paaja, paaja, paaja di buka u di Könu ku di Könuköndë fëën!”​—w22.10, bld. 3-5.

Andi da dee dii fasi fa Jesaaja kapitë  30 ta konda da u fa Gadu ta heepi u fuu hoi dou?

Di kapitë aki ta lei taa Jehovah (1) ta haika dee begi fuu, söseei a ta piki de, (2) a ta lei u unfa u musu ta du soni, söseei (3) a ta mbei u feni gaan bunu nöunöu kaa, söseei a o mbei u feni gaan bunu a di ten di ta ko.​—w22.11, bld. 9.

Faandi mbei u sa taki taa dee soni dee sikifi a Psalöm 37:10, 11, 29 bi pasa na awooten, söseei taa de o pasa a di ten di ta ko?

Dee soni dee Dafiti bi taki ta lei unfa soni bi ta waka bunu a Isaëli, möönmöön a di pisiten di Salumon bi ta tii. Jesosi bi taki u wan paladëisi di bi o seti a di ten di ta ko, di a bi taki u wan soni di ta kai ku vers 11. (Mat. 5:5; Luk. 23:43)​—w22.12, bld. 8-10, 14.