1 | Begi „Tuwë hii dee fuka fii tuu da Gadu”

DI BËIBEL TA TAKI TAA: „Tuwë hii dee fuka fii tuu da Gadu e, dee sëmbë, biga a a’ toobi ku i.”—1 PETUISI 5:7.

Andi di soni dë kë taki?

Jehovah ta piki u fuu ta konda dee fuka fuu dëën (Psalöm 55:22). U sa begi ën aluwasi fa di fuka fuu bigi, nasö aluwasi fa a piki. Solanga wan soni ta toobi u, nöö a ta dë kabakaba u heepi u ku ën. Wan soni di o heepi u tuutuu fuu sa ta dë bööböö, hën da te u ta begi ën.—Filipi 4:6, 7.

Unfa di soni aki sa heepi u?

Te u abi wan hedi dendu siki, nöö u sa ta fii seei kuma u dë u wanwan. Na hii juu sëmbë ta kaba fusutan unfa soni ta hebi da u tjika (Nöngö 14:10). Ma te u ta konda da Gadu finifini unfa u ta fii, nöö hii juu a o ta haika u, söseei a o ta fusutan u tu. Jehovah ta si u, söseei a sabi fa soni ta hebi da u tjika, nöö a ta kë fuu ta konda hii dee fuka fuu dëën.—2 Kloniki 6:29, 30.

Te u ta begi Jehovah, nöö u ta ko möön dë seiki taa a ta booko hën hedi ku u. U sa fii kuma wan womi di bi taki taa: „I si di fuka u mi. I sabi bumbuu fa mi ta tja sitaafu” (Psalöm 31:7). Te u sabi taa Jehovah ta si andi ta miti u, nöö di soni dë sa heepi u fuu hoi dou, aluwasi fuka ta miti u. Ma na si nöö a ta si andi ta miti u. Hën da di Sëmbë di ta fusutan möön bunu andi ta miti u, söseei a ta heepi u fuu feni taanga ku kötöhati a di Bëibel.

Unfa di Bëibel ta heepi wan kijoo de kai Julian

Di soni di wan hedi dendu siki ta du ku mi

„Mi bi ta booko mi hedi gaanfa, söseei mi bi ta pakisei soni di bi ta mbei mi ta fuka seei. A ta dë seei kuma mi ta dë te wan pisi, nöö mi ta bigi ta booko mi hedi ku soni. So juu mi ta fii bunu, nöö te u mi mëni, nöö mi ta bigi ta booko mi hedi gaanfa seei söndö u soni du mi. Mi ta möön booko mi hedi, te mi dë a sëmbë dendu. Mi ta booko mi hedi gaanfa seei ku di fasi fa mi ta si kuma de ta si mi.

„Dee mati u mi dee sabi fa mi ta fii, ta du hii soni di de sa du u heepi mi. So juu de ta taki soni di an ta heepi mi. Ma mi ta tei ën u bigi taa de ta mbei möiti u heepi mi.

„So juu di fasi fa mi ta pakisei ku di booko di mi ta booko mi hedi, ta mbei a ta taanga da mi u mi begi. Te mi o begi, nöö mi ta abi u mbei taanga möiti seei u buta pakisei a di begi di mi ta begi. Sömëni tookatooka soni ta ko a mi pakisei, de ta hia te ma ta saandi u mi pakisei möön. Te a dë sö, nöö a ta taanga da mi u mi konda da Jehovah andi mi ta pakisei, söseei unfa mi ta fii.”

Di fasi fa di Bëibel ta heepi mi

„Di mi bi ta lei soni u Bëibel, hën mi ko fusutan taa wa a’ fu ta begi longi, söseei wa a’ fu ta begi a wan kofaliki fasi ufö Gadu o haika dee begi fuu. So juu te a ta taanga da mi u mi konda da Jehovah unfa mi ta fii, nöö mi ta hakisi ën nöö taa: ’Ke Jehovah, heepi mi baa.’ Hii fa mi begi kölö sö, tökuseei mi ta fii taa Jehovah ta fusutan unfa mi ta fii, söseei taa a ta da mi di soni di mi abi fanöudu a di ten dë. Boiti di begi di mi ta begi, mi ta suku heepi a data. Dee tu soni aki heepi mi u mi ko ta fii möön bunu. Hii fa a ta taanga da mi u mi suku heepi a Gadu, tökuseei mi ta du ën u di mi dë seiki taa a lobi mi, söseei taa a kë heepi mi.”