2 | I sa „feni kötöhati a di Wöutu u Gadu”

DI BËIBEL TA TAKI TAA: „Fa dee sëmbë sikifi hii dee soni dee bi pasa a fesiten, nöö de sikifi de tuu fu de lei u soni. Dee soni aki ta heepi u fuu hoi dou, söseei fuu feni kötöhati a di Wöutu u Gadu, sö taa u sa ta wakiti dee soni dee Gadu paamusi u taa woo feni.”—LOOMË 15:4.

Andi di soni dë kë taki?

Di Bëibel ta da u taanga ku kötöhati fuu sa hoi dou te wa ta si soni a wan soifi fasi. Dee soni dee sikifi a di Bëibel ta mbei u dë seiki taa abiti möön na wan sëmbë o abi hedi dendu siki möön.

Unfa di soni aki sa heepi u?

Hii u tuu ta abi bookohedi so juu. Ma dee sëmbë dee abi wan hedi dendu siki ta booko de hedi ku soni hiniwan daka, söseei hii juu de ta pakisei soni di ta mbei de ta tjali gaanfa. Unfa di Bëibel sa heepi de?

Di Bëibel ta taki u sömëni soni di sa mbei sëmbë fii bunu (Filipi 4:8). A sa heepi u fuu pakisei soni di sa mbei u fii bunu, söseei di sa heepi u fu wa booko u hedi ku soni gaanfa sö möön.—Psalöm 94:18, 19.
Di Bëibel sa heepi u fu wa ta pakisei taa wa dë na wan hojo soni.—Lukasi 12:6, 7.
Sömëni Bëibel tëkisi dë di ta heepi u fuu biibi taa wa dë u wanwan, söseei taa Gadu, di Sëmbë di mbei u, ta fusutan unfa u ta fii.—Psalöm 34:18; 1 Johanisi 3:19, 20.
Di Bëibel ta piki u taa Gadu o seeka soni, sö taa wa ta mëni dee soni dee bi ta toobi u möön (Jesaaja 65:17; Akoalimbo 21:4). Te u ta bigi pakisei soni di ta mbei u fii tjali, nöö dee soni dee Gadu paamusi u a di Wöutu fëën sa da u taanga fuu hoi dou.

Di fasi fa di Bëibel ta heepi wan mujëë de kai Jessica

Di soni di wan hedi dendu siki ta du ku mi

„Di mi bi abi 25 jaa, hën data ko si taa mi abi wan hedi dendu siki. Hii juu mi bi ta pakisei dee hogi soni dee bi miti mi a di ten di pasa. Dee data bi heepi mi u mi ko fusutan taa mi bi ko abi di siki aki, u di mi bi lo’ u pakisei dee hogi soni dee bi miti mi a mi libi. Boiti dee deesi di dee data bi ta da mi, de bi ta heepi mi u mi ko sabi andi ta mbei ma ta fii bunu, sö taa mi bi sa tooka di fasi fa mi ta pakisei.”

Di fasi fa di Bëibel ta heepi mi

„Te di siki bi ta möön mi poi, nöö ma bi ta böö bunu, mi bi ta booko mi hedi ku soni gaanfa, söseei ma bi sa ta duumi. A bi lo’ u pasa taa a ndeti, dee peipei soni dee bi ta ko a mi pakisei bi ta hia sö tee taa ma bi ta saandi mi musu du. Kumafa Psalöm 94:19 ta taki, nöö Gadu sa da u kötöhati te dee soni dee u ta pakisei ta möön u. Fëën mbei mi ta buta di Bëibel u mi ku wan buku ka mi ta sikifi Bëibel tëkisi di ta da mi taanga, a di bedi u mi bandja. Te ma bi sa duumi, nöö mi bi ta lesi wantu Bëibel tëkisi. A sö wan fasi mi bi ta da Gadu pasi faa da mi kötöhati.

„Di Bëibel ta da u taanga fuu pakisei woto soni te u bigi pakisei soni di an ta kai ku Gadu. Fosufosu mi bi ta si seei kuma sëmbë an lobi mi, söseei taa ma dë wan hojo soni. Ma mi bi ko fusutan taa di fasi fa mi bi ta pakisei an ta kai ku Bëibel, u di di Bëibel ta taki taa Gadu da wan lobihati Tata di ta booko hën hedi ku hiniwan fuu apaiti. Pikipiki mi bi ko ta duwengi miseei u ma ta pakisei soni hia poi. Boiti di dë, mi bi mbei möiti u mi ko ta si miseei kumafa Gadu ta si mi. Dee soni aki bi heepi mi seei u mi ko ta si miseei woto fasi.

„Mi ta wakiti di ten ka ma o ta mëni soni di ta toobi mi möön, söseei ka ma o ta pakisei soni di an bunu. U di mi sabi taa abiti möön dee lö siki aki an o dë möön, mbei mi ta feni kaakiti u mi hoi dou. Di soni dë ta heepi mi tu u mi ta wakiti di ten ka ma o abi hedi dendu siki möön.”