De bi si taa dee sëmbë u di kemeente bi lobi de

YOMARA da wan mujëë di ta libi a di köndë Guatemala. Hën ku dee baaa fëën ta libi a di wan kamian. Wan u dee baaa fëën de kai Marcelo, nöö di wotowan de ta kai Hiver. Yomara fosu bi bigi u lei soni u Bëibel ku dee Jehovah Kotoigi, hën bakaten hën dee baaa fëën bigi u lei soni u Bëibel tu. Ma de bi abi wan fuka. Hii de tuu wojo bi booko, nöö de an bi sa’ u lesi braille (wanlö lëtë di dee bookowojoma ta lesi ku finga). Ma di baaa di bi ta lei de soni u Bëibel bi ta lesi dee palaklafu ku dee Bëibel tëkisi da de.

An bi dë wan kösökösö soni da de u go a dee komakandi. De bi musu ta waka 40 miniti longi u de dou a di Könuköndë zali di bi dë möön zuntu ku ka de bi ta libi, nöö de wanwan an bi sa waka go te ala. Ma dee baaa u di kemeente bi seeka soni sö taa de bi sa nango ta tei de ta tja go a dee komakandi. Di de bi bigi da de soni u de du a dee komakandi dee u ta hoi a mindiwiki, nöö dee baaa bi ta heepi de u de hoi dee soni di de bi musu taki a hedi.

A sebitaa-liba u di jaa 2019, dee baaa bi bigi u hoi dee komakandi a di pisiwata ka de bi ta dë. Wan baaa ku hën mujëë di bi ta du di kowoonu pioniliwooko bi foloisi go libi a di pisiwata ka Yomara ku dee baaa fëën bi ta dë. Di baaa ku hën mujëë bi buta taa de o heepi de u de ko sa’ u lesi braille, söseei u de sa’ u sikifi ën, hii fa deseei an bi sa’ u sikifi braille, söseei de an bi sa’ u lesi di töngö dë. Fëën mbei de bi go a wan kamian ka sëmbë ta leni buku, go leni buku di ta taki soni u di fasi fa wan sëmbë sa lei wotowan u lesi, söseei u sikifi braille.

Baka wantu liba, dee dii bookowojoma aki bi sa’ u lesi braille bunu seei. Di soni dë bi heepi de u de ko dë gaan mati u Jehovah. Nöunöu Yomara, Marcelo, ku Hiver ta du di kowoonu pioniliwooko, söseei Marcelo dë wan dinai a di kemeente. Hiniwan wiki de ta heepi du sömëni soni a di diniwooko. U di de ta dini Jehovah fajafaja sö, mbei wotowan ta ko dë fajafaja a di biibi kuma de.

Dee dii bookowojoma aki ta tei ën u bigi seei taa dee baaa ku dee sisa u di kemeente bi lei taa de lobi de. Yomara bi taki taa: „Sensi di fosu pasi di u miti dee Jehovah Kotoigi, hën u si fa de bi lei taa de lobi u tuutuu kumafa Keesitu sëmbë musu ta lobi wotowan.” Marcelo bi taki taa: „U abi bunu mati a di kemeente ka u dë, söseei u abi baaa ku sisa a hii së u goonliba di ta libi makandi kuma wan famii, söseei di lobi de na de.” Yomara ku dee baaa fëën ta wakiti seei u si fa Jehovah o mbei hii di goonliba ko toon wan paladëisi.​—Ps. 37:10, 11; Jes. 35:5