Saka iseei te wan soni dë di ja fusutan

1. Na un apaiti fasi Jehovah mbei u, nöö faandi mbei?

JEHOVAH mbei u a sö wan fasi taa u sa ta pakisei soni, u sa ta lei njunjun soni, u sa ko ta fusutan soni möön bunu, söseei u sa ta du dee soni dee u lei. Faandi mbei a mbei u a di lö fasi aki? Wë a kë fuu ’ko sabi ën’, söseei a kë fuu wooko ku dee soni fëën dee u sabi sö taa u sa du soni ku köni.​—Nöng. 2:1-5; Lom. 12:1.

2. (a) Andi wa sa du? (Jöpu 37:23, 24) (Luku di peentje tu.) (b) Un wini woo feni te u saka useei, nöö u tei taa wa sabi hii soni?

² Hii fa Jehovah mbei u a sö wan fasi taa u sa lei sömëni soni, tökuseei wa sa sabi hii soni te dou. (Lesi Jöpu 37:23, 24.) Boo luku di woto u Jöpu. Dee sömëni soni dee Jehovah bi hakisi Jöpu bi heepi ën faa bi ko fusutan taa sömëni soni dë di an sabi. Di soni dë bi mbei a bi ko abi sakafasi, söseei a bi heepi ën faa tooka di fasi fa a bi ta pakisei (Jöpu 42:3-6). Useei sa feni wini fëën te u ta saka useei, nöö u hoi taa wa sabi hii soni. Te u abi sakafasi, nöö woo ta hoi taa Jehovah o piki u dee soni dee dë fanöudu fuu sabi, sö taa u sa du soni ku köni.​—Nöng. 2:6.

3. Andi woo luku a di woto aki?

³ A di woto aki, woo luku dee soni dee wa sabi, ku dee soni dee sa miti u, u di wa sabi dee soni dë. Woo luku tu faandi mbei a bunu taa wa sabi dee soni dë. Dee soni dee woo lei o heepi u fuu biibi taa Jehovah, di Sëmbë di sabi hii soni, ta piki u dee soni dee dë fanöudu fuu sabi.​—Jöpu 37:16.

WA SABI NA U TEN DI KABA O KO

4. Andi wa sabi, te u luku Mateosi 24:36?

⁴ Lesi Mateosi 24:36. Wa sabi na un ten di kaba u di goonliba aki o dou. Jesosi seei an bi sabi di „daka ku di juu” di di kaba o ko, di a bi dë a goonliba aki.a A bi piki dee apösutu fëën taa Jehovah hën da di Sëmbë di „abi di taki faa buta di daka ku di juu di de o pasa” (Tjab. 1:6, 7). Jehovah buta kaa na u ten di kaba u di goonliba aki o dou. Ma wa abi di leti u suku u ko sabi finifini, un ten a buta.

5. Andi sa pasa ku u, u di wa sabi na u ten di kaba o dou?

⁵ Te u luku andi Jesosi bi taki, nöö wa sabi un longi u musu wakiti jeti, ufö di kaba ko. Di soni dë sa mbei taa u lasi hati, söseei a sa mbei taa wa ko abi peesa möön u wakiti u di kaba dou, möönmöön ee a dë taa u bi wakiti wan hii pisiten kaa u di daka u Jehovah dou. Boiti di dë, kandë a ta taanga da u fuu hoi dou, u di dee sëmbë fuu nasö woto sëmbë ta mbei u fa, u di di kaba an dou jeti (2 Pet. 3:3, 4). U sa fii kuma ee u bi sabi di daka di di kaba o ko, nöö u bi o abi möön pasensi, söseei an bi o taanga da u sö fuu hoi dou te sëmbë ta mbei u fa.

6. Faandi mbei a dë wan bunu soni taa wa sabi na un ten di kaba o dou?

⁶ U di wa sabi di daka di di kaba o ko, mbei u abi di okasi u lei Jehovah taa u ta dini ën u di u lobi ën, söseei u di u ta futoou ën. Wa kë dini Jehovah u te di kaba ko nöö a kaba, ma u kë dini ën u nöömö. Ka fuu ta buta pakisei a di ten di „di daka u Jehovah” o dou, nöö a möön bunu fuu ta buta pakisei a dee bunu soni dee o pasa a di daka dë, söseei baka di daka dë. Di soni aki o heepi u fuu ko möön zuntu ku Jehovah, fuu ta futoou ën, söseei fuu du soni di sa mbei a wai ku u.​—2 Pet. 3:11, 12.

7. Andi u sabi?

⁷ A dë wan fanöudu soni seei fuu ta buta pakisei a dee soni dee u sabi. U sabi taa dee lasiti daka bigi a di jaa 1914. Jehovah da u tjabukama woto a Bëibel di ta taki soni u di jaa 1914, söseei di ta taki finifini andi bi o pasa a dee jaa baka di dë. Fëën mbei u dë seiki taa „di gaan daka u Jehovah dë zuntu” (Sef. 1:14). Boiti di dë, u sabi di wooko di Jehovah kë taa u musu du. Di wooko aki da di paaja di u musu ta paaja „di bunu buka u di Könuköndë” (Mat. 24:14). Di buka aki ta paaja a söwan 240 köndë, söseei a möön leki 1000 töngö. An dë fanöudu fuu sabi di „daka ku di juu” ufö u sa du di gaan fanöudu wooko aki fajafaja.

WA SABI UNFA JEHOVAH O DU SONI A DI TEN DË

8. Andi da ’dee soni u di tuutuu Gadu’ di di tëkisi aki ta taki? (Peleikima 11:5)

⁸ Na hii juu u ta „saanfa di tuutuu Gadu ta du dee soni fëën”. (Lesi Peleikima 11:5.) Di soni di sikifi a di tëkisi aki nama ku di fasi fa Jehovah ta disa soni u pasa, nasö di fasi fa a ta du soni, sö taa di soni di a kë sa pasa tuutuu. Wa sa sabi seiki faandi mbei Jehovah ta disa wan soni u pasa, nasö andi a o du finifini u heepi u (Ps. 37:5). Di soni aki hebi da u fuu fusutan, leti kumafa wa sa kaba fusutan fa wan mii ta göö a wan mujëë bëë. Wan soni di sabima seei an sa kaba fusutan.

9. Andi u sa pakisei, u di wa sabi fa Jehovah o du soni?

⁹ Te wa sabi finifini unfa Jehovah o heepi u, nöö di soni dë sa mbei taa wa hopo du so soni wantewante. Kandë wa o kë disa so soni wantewante dë, fuu sa peleiki möön hia, nasö fuu sa foloisi go a wan kamian ka möön peleikima dë fanöudu. Boiti di dë, u sa si kuma Jehovah an o wai ku u, ee a ko pasa taa wa du di soni di u bi buta taa woo du a di diniwooko. Nasö ee ko pasa taa u wooko taanga a di peleikiwooko ma wa feni na wan sëmbë u lei soni u Bëibel, nasö ee u ta wooko taanga a di apaiti wooko di u ta du da di ölganisaasi, ma tökuseei soni ta taanga da u a di wooko. Dee soni aki sa mbei u fii kuma Jehovah an ta heepi u.

10. Andi da dee fasi dee u sa ko abi, u di wa sabi unfa Jehovah o du soni?

¹⁰ Te wa sabi unfa Jehovah o du soni, nöö di soni dë sa heepi u fuu ko abi sakafasi. U ta ko fusutan taa di fasi fa Jehovah ta si soni, ku di fasi fa a ta du soni hei möön di fasi fa uu ta pakisei, ku di fasi fa uu ta du soni (Jes. 55:8, 9). Boiti di dë, u ta lei u futoou möön gaanfa taa Jehovah o mbei hii soni waka bunu. Te soni ta waka bunu da u a di peleikiwooko, nasö a wan wooko di u ta du da Jehovah, nöö u ta gafa Jehovah u di a fiti fuu gafëën (Ps. 127:1; 1 Kol. 3:7). Ma ee soni an waka kumafa u bi mëni, nöö tökuseei u musu hoi a pakisei taa hii soni dë a Jehovah maun jeti (Jes. 26:12). U ta du di fuu pisi puu, nöö u ta futoou taa Jehovah o heepi u. U dë seiki taa Jehovah o tii u, aluwasi ee an du ën a wan foombo fasi kumafa a bi du a di ten di pasa.​—Tjab. 16:6-10.

11. Un fanöudu soni u sabi?

¹¹ U sabi taa Jehovah da lobi, taa a köni, söseei taa a ta du soni a wan leti fasi. U sabi taa a ta tei dee soni dee u ta du dëën, ku dee soni dee u ta du da wotowan u bigi seei. Boiti di dë, u sabi taa hii juu Jehovah ta paka dee sëmbë dee ta hoi deseei nëën.​—Heb. 11:6.

WA SABI ANDI O PASA AMANJAN

12. Fuun soni wa dë seiki, te u luku Jakobosi 4:13, 14?

¹² Lesi Jakobosi 4:13, 14. U sa taki ku leti taa wa sabi unfa libi fuu o dë amanjan. A di fa goonliba dë nöunöu, nöö „soni ta miti hiniwan fuu a wan juu di wa bi mëni” (Peleik. 9:11). Fëën mbei wa sa sabi ee dee soni dee u buta taa woo du o waka bunu, nasö ee woo dë a libi fuu sa du de.

13. Unfa u sa fii so juu, u di wa sabi andi o pasa a di ten di ta ko?

¹³ A sa taanga da u fuu hoi dou, u di wa sabi andi o pasa a di ten di ta ko. Unfa sö? Wë ee u ta booko u hedi tumisi ku andi sa pasa a di ten di ta ko, nöö di soni dë sa mbei wa ko ta dë waiwai möön. Libi fuu sa tooka a wan juu di wa bi mëni, nasö hogi sa pasa ku u vou sö, nöö di soni dë sa mbei u tjali gaanfa seei, nasö a sa mbei hati fuu boonu. Boiti di dë, ee soni an waka kumafa u bi mëni, nöö u sa lasi hati.​—Nöng. 13:12.

14. Andi u musu sabi, nasö andi u musu du ee u kë dë waiwai? (Luku di peentje tu.)

¹⁴ Te u ta hoi dou te fuka ta miti u, nöö u ta lei taa aluwasi andi o pasa, woo ta dini di Tata fuu di dë a liba ala go dou, u di u lobi ën. Bëibel ta lei u taa wa musu dë ku di mëni taa Jehovah o ta tjubi u da hii dee soni dee ta miti u, söseei wa musu ta si kuma a taki a fesi kaa andi o pasa ku u. Jehovah sabi taa na te u sabi andi o pasa ku u a di ten di ta ko, nöö woo ta dë waiwai. Di soni di o mbei u dë waiwai hën da, te u ta suku heepi nëën, söseei te u ta piki ën buka (Jel. 10:23). Te u ta suku heepi a Jehovah te u kë du wa soni, nöö a dë kuma u ta taki taa: „Ee Gadu kë, nöö sö wan soni mi o du.”​—Jak. 4:15.

15. Andi u sabi u di ten di ta ko?

¹⁵ Hii fa wa sabi andi o pasa a di ten di ko, tökuseei u sabi taa Jehovah paamusi u taa woo libi u teego, aluwasi ee a liba ala, nasö a goonliba aki. U sabi taa an sa mindi soni, söseei taa na wan soni sa tapa fëën faa du dee soni dee a taki taa a o du (Tit. 1:2). Hën nöö „sa taki a fesi andi o pasa bakaten”, söseei hën nöö bi konda gaanduwe a fesi andi a o du bakaten. Hii dee soni dee a bi taki a di ten di pasa bi pasa tuutuu, söseei dee soni dee a taki u di ten di ta ko o pasa leti kumafa a taki (Jes. 46:10). U dë seiki taa na wan soni sa puu Jehovah faa lobi u (Lom. 8:35-39). A o da u köni, kötöhati, ku di kaakiti di u abi fanöudu fuu sa pasa dee fuka dee ta ko a u pasi. U sa dë seiki taa Jehovah o heepi u, söseei taa a o mbei u feni gaan bunu.​—Jel. 17:7, 8.

WA SA KABA FUSUTAN FINIFINI FA JEHOVAH SABI U TJIKA

16. Andi fuu Jehovah sabi, nöö unfa i ta fii u di a sabi di soni dë? (Psalöm 139:1-6)

¹⁶ Lesi Psalöm 139:1-6. Di Sëmbë di mbei u sabi hii soni fuu. A sabi faandi mbei u ta pakisei kumafa u ta pakisei, söseei faandi mbei u ta fii kumafa u ta fii. A sabi dee soni dee u ta taki, ku dee soni dee dë a u hati. A sabi hii dee soni dee u ta du, söseei a sabi faandi mbei u ta du dee soni dë. Könu Dafiti bi taki taa hii juu Jehovah ta dë kabakaba u heepi u. Na piki wai u ta wai taa di Möön Hei Gadu u mundu, di makiti Gadu di mbei liba ala ku goonliba aki, ta buta pakisei a u sö! Dafiti bi taki taa: „Ma sa fusutan hii dee soni aki. De fundu poi da mi u mi fusutan.”​—Ps. 139:6.

17. Faandi mbei a sa taanga da u fuu fusutan taa Jehovah sabi u bumbuu seei?

¹⁷ Kandë di fasi fa soni bi dë a di wosudendu ka de kiija u, nasö dee soni dee u bi ta biibi ufö u ko sabi di tuutuu lei, sa mbei a ta taanga da u fuu si Jehovah kuma wan Tata di lobi u, söseei di ta buta pakisei a u. Nasö kandë u sa fii kuma dee föutu dee u bi mbei a di ten di pasa bigi sö tee taa nöiti Jehovah o kë sabi soni fuu, söseei taa an dë zuntu ku u. Dafiti seei bi ta fii sö so juu (Ps. 38:18, 21). Boiti di dë, wan sëmbë di ta mbei taanga möiti faa tooka di fasi fa a ta libi, u ko ta libi ku dee mama wëti u Bëibel, sa hakisi hënseei taa: ’Ee Gadu ta fusutan fa mi ta fii, nöö faandi mbei a kë u mi disa wan fasi u libi di mi ta si kuma bunu da mi?’

18. Un wini u ta feni, te u tei taa Jehovah sabi u bunu möön fa u sabi useei? (Luku di peentje tu.)

¹⁸ U sa lei u ko fusutan taa Jehovah sabi u möön bunu, möön fa u sabi useei, söseei taa a ta si wan bunu soni a u, di wa ta si a useei. A ta si dee föutu dee u ta mbei, nöö a ta fusutan faandi mbei u ta pakisei kumafa u ta pakisei, söseei faandi mbei u ta du soni a di fasi fa u ta du ën, nöö a lobi u (Lom. 7:15). Te u ta tei ën u bigi taa Jehovah ta si di sëmbë di u sa ko dë, nöö di soni dë ta da u taanga fuu dini ën go dou ku piizii.

19. Andi u sabi seiki u Jehovah?

¹⁹ U sabi taa Jehovah da lobi. U sa dë seiki u di soni dë (1 Joh. 4:8). U sabi taa a da u wëti u di a lobi u, söseei u di a kë fuu abi di möön bunu libi di u sa abi. U sabi taa Jehovah kë fuu feni di libi u teego. A seeka soni sö taa di lusupaima bi sa paka fuu sa feni di libi u teego. Di lusupaima ta mbei u dë seiki taa u sa dini Jehovah a di fasi fa a kë, hii fa u ta mbei föutu (Lom. 7:24, 25). U sabi tu taa ’Gadu hei möön libisëmbë hati. A sabi hii soni’ (1 Joh. 3:19, 20). Jehovah ta si hii soni fuu, nöö a dë seiki taa woo sa du soni a wan fasi di ta kai ku ën.

20. Andi o heepi u fu wa ta booko u hedi gaanfa poi?

²⁰ Jehovah ta piki u hii dee soni dee dë fanöudu fuu sabi. Te u biibi di soni dë, nöö a ta heepi u fu wa ta booko u hedi tumisi ku dee soni dee wa abi taki a de liba. A sö wan fasi u sa buta pakisei a dee soni dee dë fanöudu tuutuu. Te u ta du sö, nöö u ta lei taa u ta futoou Jehovah te dou. Hën da di Sëmbë di sabi hii soni (Jöpu 36:4). Hii fa wa sa fusutan so soni nöunöu aki, tökuseei u sabi taa Jehovah o ta lei u njunjun soni u nöömö. Nöö u ta wai seei, biga woo ta lei njunjun soni u di Gadu fuu u teego.​—Peleik. 3:11.